Германія адмовіла ў абароне ўдзельніцы пратэстаў і яе сямʼі — там лічаць, што дома беларусам нічога не пагражае
Гамяльчанцы Аксане Ліхадзіеўскай, яе мужу і дваім дзецям адмовілі ва ўсіх відах абароны ў Германіі, распавядае Deutsche Welle. Ім не паверылі, што такі пераслед наогул магчымы. А таксама нямецкія чыноўнікі лічаць, што беларусам на радзіме нічога не пагражае, бо ўсе яны здолелі зʼехаць з краіны.
У 2020 годзе беларуска хадзіла на пратэсты і арганізоўвала пікеты, яе неаднаразова затрымлівалі, штрафавалі і звольнілі з працы за палітычную актыўнасць. Разам з сяброўкай яна прыдумала знакамітую ляльку «Беларускі ждун», падобную на Аляксандра Лукашэнку.
Дадому ў Ліхадзіеўскіх з ператрусам прыйшоў аддзел па барацьбе з наркотыкамі. У сямʼі канфіскавалі тэхніку, на наступны дзень Аксану адвезлі на допыт.
У канцы снежня гамяльчанка зʼехала з дзецьмі Польшчу. Там яна папрасіла абароны, але польскія ўлады адправілі падаваць дакументы ў Германію, бо ў ЕС яна заехала па нямецкай візе. Сямʼя паўгода жыла ў лагерах для бежанцаў.
Рашэнне па абароне Ліхадзіеўскія атрымалі ў лістападзе 2023, ім адмовілі ва ўсіх відах абароны.
«Незразумела, чаму супрацоўнікі міліцыі, АМАП і аддзела па барацьбе з наркотыкамі прыйшлі да заяўніка дадому», — не паверылі ў гісторыю з ператрусам нямецкія чыноўнікі.
Нямецкія ўлады лічаць, што ў Беларусі Ліхадзіеўскім нічога не пагражае. Аксана з сямʼёй мусілі пакінуць Германію, але яны падалі апеляцыю на рашэнне. Цяпер у іх — чарговы «ждун».
Каментары
Паўсюль людзі як людзі. Да 20га ў Беларусі таксама людзі ня верылі, што калі да кагосьці прыйшлі зь ператрусам, то гэта таму што ў міліцыі бандзюкі сядзяць. Таксама вешалі на нявінных людзей цэтлікі і ганарыліся што самі "ў палітыку ня лезуць" быццам гэта нешта кепскае. У 20м многім давялося зразумець, што аказваецца яны такія ж як тыя "апазіцыянеры", і што гэдак жа могуць пацярпець, але гэтае разуменне далося балюча.
Тут справа проста ў тым, што людзі - гэта людзі. Ні больш ні менш. І псіхіка людская вось так працуе. І калі ты не гатовы сутыкнуцца з гэтай рэальнасьцю, ты нічога ня зможаш патлумачыць чалавеку, які раней не пацярпеў асабіста ад падобнай несправядлівасьці да сябе. Максімум - ўпэўніць яго што ты ці вар'ят ці хлус.
Шкада, што так не пашанцавала зь нямецкай візай. Зычу знайсьці спосаб дагрукацца.
ПС. Нават зараз многія кажуць, што вось "старая апазіцыя" адграбала за справу, а вось яны - ні за што. Быццам у "старой апазіцыі" ўсё ж былі нейкія іншыя людзі. Псіхіка супраціўляцца ўмее.