Нямецкае выданне Bild атрымала доступ да сакрэтнага дакумента Бундэсвера, у якім распісаны сцэнар паўнавартаснага расійскага ўварвання ў Еўропу ў 2025 годзе, да ягога цяпер рыхтуецца НАТА. У гэтым сцэнары асноўная роля адведзена Беларусі.
Паводле сакрэтнай справаздачы Мінабароны Германіі (Бундэсвера), НАТА актыўна рыхтуецца да сцэнару поўнамаштабнай вайны з Расіяй ужо ў пачатку 2025 года, калі тая можа вырашыць уварвацца ў Еўропу праз Беларусь.
У сцэнары пад назвай «Абарона Альянсу 2025» падрабязна распісаны магчымыя дзеянні Расіі ў падрыхтоўцы ўварвання, пачынаючы з лютага 2024 года.
Так, ужо ў гэтым лютым, згодна з інфармацыяй нямецкай выведкі, Расія можа правесці чарговую хвалю мабілізацыі і набраць дадаткова 200 тысяч чалавек для новага вясновага наступу ва Украіне, «які павінен адкінуць УСУ яшчэ далей назад з іх цяперашніх пазіцый».
Далей, як піша Bild, Расія летам можа пачаць актыўна здзяйсняць кібератакі на сістэмы НАТА і правакаваць беспарадкі ў краінах Балтыі з удзелам этнічных расіян, што стане падставай для правядзення ў верасні на тэрыторыі Беларусі вучэнняў «Захад-2024» з удзелам 50 тысяч расійскіх салдат.
На падставе вучэнняў Расія, паводле сцэнару, усю восень будзе нарошчваць свой вайсковы кантынгент і арсенал ракет у Беларусі ля межаў Літвы і Польшчы, адначасна робячы тое ж самае і з боку Калінінграда.
Потым у снежні 2024-га ў раёне Сувалкскага калідора Расія можа справакаваць «штучны памежны канфлікт» і «беспарадкі са шматлікімі ахвярамі», як гэта было ў 2021-м з нелегальнымі мігрантамі.
Усё гэта павінна будзе адбывацца ў разгар выбарчай кампаніі ў ЗША, калі ў краіны яшчэ не будзе абранага лідара.
«Менавіта ў той момант Расія пры дапамозе Беларусі можа зладзіць у раён Сувалкскага калідора вайсковае ўварванне, падобнае да расійскіх дзеянняў ва Украіне ў 2014 годзе», — піша Bild, спасылаючыся на сакрэтны дакумент Бундэсвера.
Такі ж сцэнар раней апісвала іншая крыніца выдання ў адной з еўрапейскіх выведак.
Як прагназуе нямецкая выведка, пасля гэтага Расія ў студзені наступнага года скліча пазачарговае паседжанне Рады Бяспекі ААН, на якой звінаваціць краіны Захаду ў падрыхтоўцы нападу на Расію. У гэты ж час ад НАТА чакаецца скліканне свайго ўласнага экстранага паседжання.
Чакаецца, што ў сакавіку 2025 года Расія перакіне ў Беларусь дадатковыя дзве танкавыя дывізіі і больш за 70 тысяч салдат. У адказ на гэта НАТА ў маі перакіне да межаў Расіі і Беларусі 300-тысячны вайсковы кантынгент, сярод якіх будзе 30 тысяч салдат з Германіі.
Далей, па сцэнары, павінен адбыцца «Дзень X» (паўнамаштабнае расійскае ўварванне і вайна з НАТА), зыход якога ў дакуменце застаецца адкрытым, адзначае Bild.
У самім Бундэсверы адмовіліся каментаваць выданню інфармацыю з уцечкі.
Нагадаем, што выданне Bild са спасылкай на высокапастаўленыя крыніцы ў НАТА яшчэ ў 2021 годзе дакладна прадказала момант пачатку вайны ва Украіне і расійскі сцэнар яе правядзення з ўдзелам Беларусі.
Тады Bild пісаў, што Расія ўварвецца ў тым ліку і з беларускага кірунку, а канчатковай мэтай стане знішчэнне ўкраінскіх уладаў разам з далучэннем Украіны да Саюзнай дзяржавы Расіі і Беларусі.
КДБ выпадкова выдаў двух супрацоўнікаў, адказных за стварэнне спіса «тэрарыстаў»22
Каментары