«Поўная звязда». Луганскі апалчэнец прарочыць катастрофу расійскай арміі ў зімовых баях
Раскручаны расійскі блогер «Байцовы кот Мурз» — баец брыгады «Призрак» Андрэй Марозаў — апублікаваў роспачны допіс аб праблемах расійскіх вайскоўцаў і некампетэнтнасці камандавання.
«Наперадзе зімой нас чакае пякельны звіздец. Ніякіх значных шанцаў утрымаць цяперашні фронт не будзе, і праціўнік пра гэта выдатна ведае, канцэнтруючы свае сілы там, дзе яму зручна і выгадна. Ні па адным з пунктаў, забеспячэнне якіх вызначае паспяховасць абароны, ніякага прагрэсу няма, толькі рэгрэс», — піша Марозаў.
Мурз ваюе ў расійскіх сілах на Данбасе з 2014 года. Ëн належыць да брыгады «Призрак», якая ўваходзіла ў склад арміі так званай «Луганскай народнай рэспублікі».
Мурз піша, што пасля пакідання Херсона грамадскасць, замест таго, каб цвяроза ацаніць сітуацыю, узялася з актыўнай дапамогай СМІ, ваенкараў і ўсіх іншых падручных сродкаў высмоктваць «пазітыўчык» з любой «хераты», якая часцяком дэманструе сітуацыю наадварот.
Паводле яго, замоўчваецца катастрафічны снарадны голад у артылерыі, таму танкамі замяняюць артылерыю на пастаяннай аснове. Бо для танкаў снарады «быццам бы яшчэ ёсць».
«У рэальнасці такая стральба — экстранная часовая мера ў сітуацыі, калі трэба разава накрыць буйную навалу праціўніка, а артылерыі свабоднай пад рукой няма або выкарыстоўваць яе немагчыма».
Такім чынам расійскія танкі выпрацоўваюць свой рэсурс.
«Гладкаствольныя танкавыя гарматы не прызначаныя для таго, чым яны цяпер займаюцца цэлымі днямі, — для бесперапыннага закідвання аскепкава-фугаснымі снарадамі пазіцый праціўніка».
У той жа час артылерыя — небаяздольная, нізкапрафесійная.
«Эшалоны боепрыпасаў, якія паляцелі ў нікуды пад ухвальнае блекатанне прапагандонаў», — піша блогер.
Таксама ён распавядае, што расійскае камандаванне без шкадавання знішчае сваю пяхоту.
«Расійскія вайскоўцы валодаюць неймаверным талентам ператвараць любы пасёлак з парай пасадак і свінафермай у Вердэн, дзе сточваюцца ўласныя, а не варожыя падраздзяленні».
Ён наракае на адсутнасць нармальнай радыёсувязі ў расійскай арміі і, як наступства, — на праблемы з кіраваннем войскамі.
«Нічым буйнейшым за «рэшткі мотастралковага батальёна» ва УС РФ кіраваць як адзіным арганізмам не могуць», — піша блогер.
Мабілізаваных расійскае камандаванне гоніць на забой, бо «ў сілу адсутнасці нармальных камандных кадраў і адсутнасці сродкаў сувязі, падраздзяленні проста створаныя для таго, каб пажыраць чалавечы рэсурс і не ўяўляць сабой ніякай баявой каштоўнасці».
Таксама блогер піша аб праблемах з выкарыстаннем авіяцыі, БПЛА, забеспячэннем арміі, у тым ліку і высокімі тэхналогіямі.
У той жа час луганскі апалчэнец высока ацэньвае баявую падрыхтоўку ўкраінскай арміі. Паводле яго, украінцы гадамі вучыліся правільна ваяваць. «У іх ёсць тактыка, у іх ёсць сістэма прымянення гэтага».
«Вучыцца ў праціўніка нашай арміі западло, а між тым гэтай вясной і летам праціўнік прадэманстраваў на Данбасе ўсе неабходныя складнікі паспяховай доўгачасовай абароны, якая папіла вельмі шмат крыві нашым войскам.
Паўтару яшчэ раз — такога ўзроўню ваеннай некампетэнтнасці проста не існуе. Гэта — наўмыснае шкодніцтва, сабатаж і здрада», — піша ён.
Блогер мяркуе, што наперадзе расійскую армію чакае горшае. «Ніякіх значных шанцаў утрымаць цяперашні фронт не будзе, і праціўнік пра гэта выдатна ведае, канцэнтруючы свае сілы там, дзе яму зручна і выгадна. Ні па адным з пунктаў, забеспячэнне якіх вызначае паспяховасць абароны, ніякага прагрэсу няма, толькі рэгрэс, прычым які сістэмна заахвочваецца».
«Расійскай арміі яе камандаванне не пакідае аніводнага шанцу на поспех», — рэзюмуе ён.
Зняволены расказаў, як сядзеў у калоніі ў Глыбокім у суседняй камеры са Статкевічам3
Каментары
Сардэчна запрашаем у руzzкі свет!