Кіраўнік BYPOL расказаў, якой бачыць галоўную задачу Канферэнцыі Новай Беларусі
Ці можа Ціханоўская быць завербаванай КДБ, ці «аб’яднае» яе офіс астатнія беларускія дэмсілы, што былыя сілавікі чакаюць ад канферэнцыі ў Вільні? Сваё меркаванне ў эфіры «Еўрарадыё» выказаў кіраўнік BYPOL Аляксандр Азараў.
Аляксандра Азарава «Еўрарадыё» папрасіла пракаментаваць прэтэнзіі да офіса Ціханоўскай, якія выказалі апошнім часам Валерый Цапкала, Дзмітрый Балкунец, Вольга Карач і Вадзім Пракоп'еў.
— З нагоды фінансавых абвінавачванняў хачу сказаць, што офіс Ціханоўскай не размяркоўвае ніякіх рэсурсаў. Усе арганізацыі могуць удзельнічаць у конкурсах і атрымліваць гранты ад дабрачынных арганізацый. У тым ліку і офіс Ціханоўскай гэтым займаецца — атрымлівае грант на пэўныя мэты і яго расходуе. У Ціханоўскай няма доступу да рэсурсаў, якія яна можа ўсім раздаваць, — кажа Азараў. — Любыя арганізацыі, якія працуюць за мяжой, гэта разумеюць. Яна можа атрымаць грант на фінансаванне свайго офіса. Усё на гэтым.
Яна не можа ўзяць грошы з гранта і камусьці іх аддаць, таму што там прапісаны канкрэтны радок: гэтыя грошы — на зарплату пэўнаму чалавеку ці нешта яшчэ. Але ніяк нельга аддаць іншай арганізацыі. Гэта нонсэнс. Людзі, якія распаўсюджваюць гэтую інфармацыю, разумеюць гэтую схему. І яны спецыяльна даводзяць так інфармацыю да беларусаў, тых, хто гэтага не разумее.
Ці могуць быць падазрэнні да Ціханоўскай?
«Еўрарадыё» запыталася ў Азарава, як ён ставіцца да меркавання некаторых людзей, што Ціханоўская абавязкова павінна была перад выездам з Беларусі падпісаць паперу аб супрацоўніцтве са спецслужбамі, «інакш яе не выпусцілі б з Беларусі».
Азараў адказаў, што ў BYPOL няма інфармацыі, што яна падпісвала паперы аб супрацоўніцтве.
— Павінна была [падпісаць паперу аб супрацоўніцтве са спецслужбамі] ці не? Я б сказаў, што не.
«Еўрарадыё» спытала меркаванне кіраўніка BYPOL, ці павінна Ціханоўская на канферэнцыі публічна расказаць пра тое, ці падпісвала яна такія паперы, пра тое, што адбывалася ў кабінеце ў Ярмошынай. Ці павінна яна адказаць на гэтыя пытанні з трыбуны канферэнцыі?
— Мы з ёй на гэтую тэму размаўлялі і задавалі ёй гэтыя пытанні яшчэ паўтара года таму, — адказаў Азараў. — І яна нам адказала. І мы задаволеныя яе адказамі
У яе дзеяннях ніякага крыміналу і падазрэнняў, што яна зʼяўляецца агентам КДБ, у нас няма.
Ці будзе яна адказваць на гэтыя пытанні публічна, гэта яе рашэнне. Яна сама павінна прыняць рашэнне, трэба ёй гэта, ці не.
Чаго чакае ад канферэнцыі
BYPOL зʼяўляецца адным з суарганізатараў канферэнцыі Новай Беларусі, якая пройдзе ў Вільні 8—9 жніўня. У BYPOL вельмі канкрэтныя чаканне ад яе.
— Задача BYPOL — гэта стварэнне часовага кабінета, больш за ўсё нас гэта цікавіць. Мы лічым, што кабінет — адзін з асноўных момантаў, неабходных для запуску плана «Перамога».
Кабінет павінен быць створаны і прызнаны сусветнай супольнасцю, каб план «Перамога» дзейнічаў пад легітымнасцю кабінета. Калі гэтага кабінета не будзе, тады ёсць варыянт, што Лукашэнка, як у Казахстане, скажа, што гэта тэрарысты, давайце войскі АДКБ, трэба іх разагнаць, звярнуцца да Расіі, — кажа Азараў.
«Таму мае чаканні — стварэнне гэтага кабінета», — кажа Азараў.
У план «Перамога», па словах Азарава, запісалася каля 200 тысяч чалавек, гэта падпольшчыкі, якія знаходзяцца ў Беларусі, чакаюць каманды.
— Але патрэбная палітычная надбудова, якая будзе кіраваць гэтым нацыянальна-вызваленчым рухам. І гэтым якраз можа заняцца створаны кабінет, дзе кожны міністр будзе адказваць за свой кірунак. Цяпер усе бочкі коцяцца на Ціханоўскую, яна адказвае за ўсе праблемы, ва ўсім вінаватая. А калі будзе кабінет і міністры, канкрэтны міністр будзе адказваць за канкрэтную працу.
Каментары