Грамадства

Вярнулася ў Беларусь з Літвы — цяпер пагражае 20 гадоў за тэрарызм. Расказваем пра Алесю Буневіч і падрабязнасці яе затрымання

Беларуска Алеся Буневіч жыла ў Вільні, мела маленькі бізнэс, гадавала сына. У пачатку красавіка яна паехала на гадавіну смерці маці — і знікла. Пазней стала вядома, што Алеся за кратамі: яе вінавацяць у дапамозе «рэйкавым партызанам» і тэрарызме. Расказваем, хто такая Алеся Буневіч.

Алесі 32 гады. Яна родам з Маладзечна, да 2021-га жыла і працавала там. Скончыла гістфак БДУ, апошнія гады працавала ў турыстычным бізнэсе — мела невялікую турфірму.

У 2011 годзе яна пазнаёмілася ў Вільні з вядомым актывістам Алегам Мяцеліцам. 

«Праз пару гадоў у іх нарадзіўся сын. Алеся з малым заставалася ў Маладзечне, Алег жыў у Вільні, вярнуўся ў Беларусь толькі ў 2014 годзе. Малога назвалі Кастусём», — расказаў «Нашай Ніве» блізкі знаёмы Алесі.

Яшчэ да выбараў Мяцеліцу пакаралі суткамі за ўдзел у маўклівых «ланцугах салідарнасці».

Алег Мяцеліца. Фота: «Вясна»

Ён выйшаў на волю 15 жніўня 2020, ужо на наступны дзень выступіў на мітынгу ў Бялынічах. Амаль адразу праз гэты выступ на Алега завялі крыміналку: абвінавацілі ў паклёпе. Ён вырашыў з’ехаць з Беларусі, 26 жніўня пакінуў краіну.

Алеся засталася ў Маладзечне. Пазней і яна адседзела на сутках, бо праходзіла па так званай «справе лыжнікаў»: у лютым 2021 года сілавікі затрымалі амаль два дзясяткі чалавек, якія каталіся на лыжах і мелі бела-чырвона-белую сімволіку.

Перад затрыманнем лыжнікаў. Скрыншот: відэа МУС

Алеся Буневіч тады атрымала 15 сутак. 

У красавіку 2021 года ў дзяўчыны памерла маці. 

«Алеся перанесла гэта вельмі балюча. Маці было недзе каля 56 гадоў, нават яшчэ не пенсіянерка. Але раптам здарыўся інсульт. 

Алеся была вельмі блізкая з маці. Мама была тым, хто ўтрымліваў сям’ю, быў яе сымбалем… Для Алесі смерць маці была вельмі моцным ударам», — згадваюць знаёмыя.

Пасля беларуска вырашыла пераехаць у Вільню. У маі яна прыехала, каб аформіць шлюб з Алегам Мяцеліцам, канчаткова перабралася ў Літву ў пачатку лета.

«У Алесі першы перыяд жыцця ў Вільні быў вельмі няпростым. Бо яна чалавек з падвышаным пачуццём адказнасці і салідарнасці, чалавек, які перажываў за Беларусь: а хто там застанецца, калі ўсе з’едуць? Перажывала і пра людзей за кратамі…

— згадвае сябар Алесі. — На гэта наклалася і смерць маці».

З цягам часу жыццё паціху наладжвалася. Кастуся аддалі ў беларускую гімназію, Алеся разам са знаёмай адкрыла невялікі бізнэс у Вільні: друкавальны цэнтр. 

Але ў красавіку 2022 года Буневіч вырашыла на кароткі час вярнуцца ў Беларусь. Для яе вельмі важна было прыехаць на гадавіну смерці маці, кажуць знаёмыя, плюс яна планавала вырашыць некаторыя пытанні з маёмасцю, якая заставалася ў Маладзечне. Спачатку яна планавала разабрацца з усімі сямейнымі справамі, а пасля прыехаць у Вільню, узяць сына, у якога пачыналіся канікулы, і з’ездзіць разам з ім у Беларусь яшчэ раз.

«Алеся падумвала, што гэта, магчыма, будуць апошнія яе візіты на Радзіму, што больш ездзіць, можа, і не варта», — кажа адзін з яе сяброў.

1 красавіка Алеся Буневіч паехала ў Беларусь. Спачатку ўсё было нармальна. Разам з сям’ёй знаёмых дзяўчына паехала на аграсядзібу ў Гродзенскай вобласці. 

Там яе і затрымалі. 

Па інфармацыі «Нашай Нівы», у нейкі момант сям’я знаёмых паехала ў краму. Алеся засталася адна на аграсядзібе. Выйшла прагуляцца — і знікла. 

Як паведамляюць крыніцы «Нашай Нівы», дзяўчына паспела адправіць знаёмым кароткае паведамленне: тут нешта дзіўнае адбываецца. У тэксце было шмат абдруковак, што было нетыпова для вельмі пісьменнай Алесі, было зразумела, што паведамленне набіралася ў спешцы. 

Звязацца са знаёмымі Алесі, якія былі разам з ёю на аграсядзібе, «Нашай Ніве» не атрымалася.

Але па нашай інфармацыі, пасля знікнення Алесі адразу выклікалі міліцыю, ратавальнікаў. Усе хваляваліся, падазравалі рознае: можа на дзяўчыну нехта напаў? Звярнуліся да памежнікаў — аграсядзіба знаходзілася ў памежнай зоне. Ніхто не мог нічым дапамагчы. Куды і як знікла Алеся было невядома.

Толькі ўвечары стала вядома, што Буневіч затрыманая і яе падазраюць у «здзяйсненні тэрарыстычнага акта групай асоб па папярэдняй змове» (ч. 2 арт. 289 КК РБ). 

Па інфармацыі «Нашай Нівы», Алесю Буневіч вінавацяць у дапамозе «чыгуначным партызанам», якіх затрымалі 30 сакавіка са стральбою па нагах. Буневіч падазраюць у тым, што яна магла дапамагаць «партызанам» у падрыхтоўцы нелегальнага перахода мяжы з Літвой.

Знаёмыя Алесі кажуць: «Яе затрыманне выглядае проста дзіўным збегам абставінаў. Магчыма, яна проста аказалася не ў той час і не ў тым месцы?»

Яшчэ ў верасні 2021 года Следчы камітэт Беларусі паведаміў аб пачатку крымінальнай справы супраць групы асобаў, якая дапамагала беларусам нелегальна ўцякаць у Літву. Па БТ нават знялі пра гэта чарговы фільм, дзе вінавацілі Наталлю Калегаву і Алега Мяцеліцу ў дапамозе тым, хто бег з Беларусі па палітычных прычынах.

Але ж Алесю затрымлівалі ўвечары 3 красавіка у Гродзенскай вобласці. На той момант «чыгуначныя партызаны» ўжо некалькі дзён былі за кратамі. Сілавікі паведамілі, што «партызанаў» схапілі яшчэ 30 сакавіка, прычым у Бабруйскім і Барысаўскім раёнах.

Цяпер Алесі Буневіч пагражае ад 8 да 20 гадоў.

Буневіч знаходзіцца ў магілёўскім СІЗА. Вядома, што Алеся не прызнае віну, праз адваката перадае, што адчувае сябе нармальна.

Што вядома пра хлопцаў, затрыманых са стралянінай за дыверсіі на чыгунцы?

Каментары

Што вядома пра грамадзяніна Германіі Рыка Крыгера, якому ў Беларусі прысудзілі расстрэл

Што вядома пра грамадзяніна Германіі Рыка Крыгера, якому ў Беларусі прысудзілі расстрэл

Усе навіны →
Усе навіны

Экс-прэм'ер Сяргей Румас з'явіўся на пахаванні Вергеенкі ФОТАФАКТ6

Рыжанкоў: У мяне і бабуля, і мама былі чыстымі полькамі52

Пуцін прапанаваў Ірану рэкордныя аб'ёмы расійскага газу са зніжкай 75%4

Лідар чэмпіянату Беларусі вылецеў з нятопавага еўракубка ўжо на першай стадыі кваліфікацыі

У Пінску пенсіянер уцякаў з месца ўчыненага ім наезду і па дарозе падбіў яшчэ дзве машыны

Вядомы блогер набыў кватэру ў Польшчы — вось як гэта ў яго атрымалася20

Байдэн можа выйсці з выбарнай гонкі ўжо на гэтыя выхадныя12

Мінскі хірург выдаў зборнік эстэцкай прозы. Так па-беларуску раней не пісалі

У Драздах збіраюцца завесці плывучыя альтанкі3

больш чытаных навін
больш лайканых навін

Што вядома пра грамадзяніна Германіі Рыка Крыгера, якому ў Беларусі прысудзілі расстрэл

Што вядома пра грамадзяніна Германіі Рыка Крыгера, якому ў Беларусі прысудзілі расстрэл

Галоўнае
Усе навіны →