Alaksandr Mašenski: hałoŭny małočnik Łukašenki

Mašenskija — adna z samych viadomych biznes-­dynastyj u Biełarusi.

Da słavy Rotšyldaŭ i Rakfieleraŭ im daloka, choć abarot ich «Santa-Bremara» i «Savuškavaha praduktu» nieŭzabavie moža padyści da $1 miljarda za hod. Ich paśpiachovaść pakul łakalnaja.

Imiem zasnavalnika impieryi, Michaiła Mašenskaha, nazvanaja vulica ŭ Breście, što nibyta źjaŭlajecca adzinym vypadkam ušanavańnia pamiaci pryvatnika na terytoryi SND.

A voś syn, Alaksandr Mašenski, ličycca trecim pa ŭpłyvovaści biznesoŭcam u krainie. I nie chavaje ambicyj.

Try pakaleńni Mašenskich

Historyja siamji ŭ Biełarusi pačynajecca z postaci Leanida Isakaviča Mašenskaha.

Jaho, frantavika, uznaharodžanaha, siarod inšaha, ordenam Lenina, paśla vajny razam ź siamjoj nakiravali na pracu ŭ Brest. Tut jon staŭ namieśnikam dyrektara dramatyčnaha teatra, a paśla dyrektaram archieałahičnaha muzieja.

Jahony syn, zasnavalnik «Santa-Bremara» Michaił, naradziŭsia ŭ 1947 u nievialikaj vioscy Buravieśnik na Kurylskich astravach.

Moža, mienavita hetym tłumačycca jaho schilnaść da ryby? Tym nie mienš,

jon vyrašyŭ źviazać žyćcio z čyhunkaj, atrymaŭ u Breście adukacyju inžyniera­elektryka i ŭładkavaŭsia ŭ kanstruktarskaje biuro na miascovy elektramiechaničny zavod.

Tam Mašenski-siaredni adpracavaŭ ažno 22 hady, da razvału SSSR. Darečy, jaho siastra Maja žyvie ŭ Izraili.

Kali Biełaruś zdabyvała niezaležnaść, Alaksandr Mašenski, pradstaŭnik treciaha pakaleńnia, jakraz skančaŭ vučobu ŭ Minsku, na miechanika-matematyčnym fakultecie BDU.

Ale pajści pa śladach baćki i pryśviacić usio žyćcio adnamu pradpryjemstvu jon nie rašyŭsia. Byŭ pačatak 1990-ch — čas, kali možna było ryzyknuć i atrymać vialiki kuš.

Niaŭdały vopyt krevietak i pośpiech sieladca

Pradaŭšy bresckuju kvateru, 45-hadovy baćka i 22-hadovy syn u 1992 stvaryli kampaniju «Niła», jakaja va ŭmovach deficytu zaniałasia impartam zamarožanaj ryby i praduktaŭ mora ź Jeŭropy.

Nieŭzabavie byŭ znojdzieny zamiežny inviestar, hałandskaja kampanija L.Kok Seafood.

Razam z hałandcami Michaił Mašenski zasnavaŭ «Santa Impeks Brest», jakoje zaniałosia pierapracoŭkaj krevietak,

vielmi niaŭdziačnaj i škodnaj dla ruk rabotnikaŭ pracaj. Morapradukty zavozilisia ŭ Brest, ačyščalisia ad pancyraŭ i adpraŭlalisia na prodaž u Jeŭropu. Prybytkovaja biznes­-ideja praisnavała niadoŭha. Hałandcy zrazumieli, što pracoŭnaja siła va Ukrainie navat tańniejšaja za biełaruskuju, tamu pieranieśli vytvorčaść.

Tady ŭsia ŭvaha Mašenskaha pieraklučyłasia na sieladziec. Jon pačaŭ pradavać hatovaje da ŭžyvańnia file pad brendam «Macijas».

Małodšaje pakaleńnie ŭžo nie pamiataje, što ŭ saviecki čas sieladziec najčaściej pradavali cełym, i žančyny sami jaho čyścili i zapraŭlali.

Heta zajmała času. Mašenskija pieranieśli ŭ Biełaruś zachodniuju technałohiju ačystki sieladca, pierapracoŭki ŭ file i prodažu ŭ hiermietyčnaj upakoŭcy.

Dla taho kab pašyryć vytvorčaść, byli patrebnyja hrošy. Biznesoviec naźbiraŭ $750 tysiač svaich hrošaj, stolki ž dali niamieckija partniory i jašče $4,5 miljona daŭ u kredyt Jeŭrapiejski bank rekanstrukcyi i raźvićcia.

Jeŭrapiejcy ŭkładali hrošy ŭ stanaŭleńnie pryvatnaha biełaruskaha biznesu.

Supolnaje pradpryjemstva było zasnavana na terytoryi svabodnaj ekanamičnaj zony «Brest» u 1998 hodzie i atrymała nazvu «Santa Bremar».

«Heta była takaja śviataja ŭ Hałandyi, jakaja čakała marakoŭ, kali jany viartalisia z ułovam»,

— raskazvaŭ pra značeńnie nazvy Mašenski-małodšy. Darečy, siamja ŭziała sabie 51% akcyj, rešta zastałasia ŭ niemcaŭ.

Samastojnaje płavańnie

U samym kancy tysiačahodździa los raźbiŭ siamiejny duet baćki i syna.

Za hrošy zdaroŭja nie kupiš. Michaił Mašenski ŭ 2000-m pieranios dva infarkty i pamior.

U Breście zastałasia pa im dobraja pamiać.

Alaksandr staŭ adzinym uładalnikam biznesu. I 30-hadovy novy bos zdoleŭ nie tolki ŭtrymać spravu ŭ svaich rukach, a i raźvić.

Jon vyrašyŭ ruchacca kursam, jaki pačaŭ baćka. Vytvorčaść razrastałasia, zastajučysia tolki rybnaj.

Z hetym časam źviazanaja historyja ikry mojvy, jakaja z honaram raskazvajecca supracoŭnikami «Santa-Bremara».

Hety śpiecyfičny isłandski pradukt nie karystaŭsia asablivym popytam u śviecie — jaho kuplali tolki japoncy, bo vieryli ŭ jaje ŭpłyŭ na mužčynskuju patencyju.

Mašenski ž prydumaŭ vypuskać jaje ŭ jakaści buterbrodnaj pasty i adrazu zachapiŭ hety rynak i ŭ Biełarusi, i ŭ Rasii, i va Ukrainie. Za takija zasłuhi pierad isłandskaj ekanomikaj jaho pryznačyli hanarovym konsułam hetaj krainy ŭ Biełarusi.

Apisvać rybnyja pośpiechi Mašenskaha možna doŭha, ale dastatkova pieraličyć niekatoryja brendy jaho biznes­impieryi, kab zrazumieć jaje ŭsioabdymnaść. Marožanaje «Juki» («Top», «Saleta»), pielmieni «Babula Ania», vareniki «Eniki-Beniki»…

I heta aproč sałataŭ, marskoj kapusty, pitnoj vady i bieźličy rybnych praduktaŭ. Ahulny abarot kampanii aceńvajecca pryblizna ŭ $300—350 miljonaŭ.

Małočny bierah

Svaju druhuju pałovu biznes­-impieryi, małočnuju, Mašenski zdabyŭ u 2006 hodzie, kali kupiŭ 75% AAT «Savuškaŭ pradukt».

Astatnija akcyi raźmierkavanyja pamiž dziaržavaj, 55 kałhasami-pastaŭščykami i mnostvam jurydyčnych i fizičnych asobaŭ.

«Savuškaŭ pradukt» — heta były Brescki małočny kambinat, pryvatyzavany ŭ 1994 hodzie.

Jahony dyrektar, 58-hadovy Alaksandr Saŭčyc, pracuje na pradpryjemstvie z dnia jaho zasnavańnia — z 1976. Cikava, što vyšejšaja adukacyja ŭ jaho — piedahahičnaja zavočnaja. Tak ci inakš, ale

na čale z Saŭčycam, jaki znachodzicca ŭ rejtynhu paśpiachovaści biełaruskich biznesoŭcaŭ na 89-m miescy, małakazavod staŭ najbujniejšym vytvorcam małočnaj pradukcyi ŭ krainie.

Jahonyja asnoŭnyja brendy — małočnyja «Brest-Litoŭski», «Moncik», «Łaskavaje leta», a taksama soki «Sapraŭdny» dy «iFrukt».

Z prychodam Mašenskaha, jaki ŭžo mieŭ «rybnyja» suviazi z Rasijaj, «Savuškaŭ pradukt» pačaŭ imkliva pavialičvać svaju dolu na rasijskim rynku.

Ekspartnaja pieravaha

Małočnaja pramysłovaść u Biełarusi stała prybytkovaj litaralna hod tamu.

Jašče pazaletaś u śpisie samych stratnych akcyjaniernych tavarystvaŭ byli spres małakazavody. Paśla devalvacyi zakupnyja ceny trochi vyraśli, ale praz roźnicu cenaŭ u Biełarusi i susiednich krainach «małočniki» atrymali vydatnuju mahčymaść dla prybytku.

U 2010 było ekspartavana 550 tysiač ton małaka, masła, tvaraha i syroŭ — heta 5% ad suśvietnaha rynku.

Ale spažyviec biełaruskaj pradukcyi faktyčna adzin — 90% ekspartavanaha tavaru adpraŭlajecca ŭ Rasiju.

«Savuškaŭ pradukt», zvarot jakoha składaje kala $250 miljonaŭ štohod, kankuruje na rasijskim rynku z karparacyjami «Danone-Junimiłk» i «Vim­BilDan».

Toje samaje, tolki ŭ mienšych abjomach pastavak, robiać i inšyja biełaruskija małakazavody. Kab abjadnać ich vysiłki i atrymać častku prybytku, Alaksandr Łukašenka vyrašyŭ stvaryć «Abjadnanuju małočnuju kampaniju». Jaje źjaŭleńnie na bazie «Savuškavaha praduktu» čakałasia jašče ŭ kancy minułaha hoda, ale płany adkłalisia.

Biez dapamohi,

ale sa zhody

Svoj biznes Mašenskija stvaryli z nula, nie ŭziaŭšy ŭ dziaržavy ni rubla.

Ale ŭ krainie z aŭtarytarnym kiravańniem ekanomikaj zastacca ŭ baku ad palityki niemahčyma.

Jak adbyvalisia konkursy Kiraŭnictva spravami prezidenta, na jakich «Santa-Bremar» atrymlivaŭ niemałyja kvoty na impart ryby?

Pytańnie, adkaz na jakoje nieviadomy.

Mašenski-baćka imknuŭsia abminać palityku, čaho nielha skazać pra syna.

Padkreślić svaju hłybokuju pavahu da ŭłady taksama treba ŭmieć. Kali z ahladam na pradpryjemstva pryjechaŭ Alaksandr Łukašenka, Mašenski-małodšy vynies jamu ŭ padarunak karparatyŭny ściah kampanii. Za heta jon, adziny kiraŭnik pryvatnaj kampanii, atrymaŭ dazvoł paviesić čyrvona­-zialony ściah nad uvachodam na pradpryjemstva.

Davieranaja asoba kandydata ŭ prezidenty Alaksandra Łukašenki na vybarach-­2010, udzielnik tak zvanaha «usiebiełaruskaha narodnaha schodu», siabar respublikanskaj rady «Biełaj Rusi» — usio heta kaštuje dla biełaruskich biznesoŭcaŭ niamałaha.

Mahčyma, Abjadnanuju małočnuju kampaniju ŭznačalić mienavita Alaksandr Mašenski. Ale mienavita nabližanaść da Łukašenki moža kaštavać Mašenskamu reputacyi: razam ź Piefcijevym i Čyžom, Mašenski moža trapić u čorny vizavy śpis Jeŭrasajuza.

* * *

Samyja darahija biełaruskija brendy­ -- 2011

1) Santa-Bremar. Košt brenda — $72,5 miljona (hod tamu — 2-je miesca).

…

4) Savuškaŭ pradukt. Košt brenda — $50 miljonaŭ (hod tamu — 7-je miesca).

• 0
• 0
• 0
• 0
• 0
• 0
• 0
• 0