U Breccie razharajecca novy karupcyjny skandał

Hałoŭnym upraŭleńniem pa baraćbie z arhanizavanaj złačynnaściu i karupcyjaj MUS zatrymany pasiarednik u pieradačy bujnoha chabaru, pryznačanaha dla słužbovych asob pravaachoŭnych orhanaŭ.

Infarmacyi pa novym karupcyjnym skandale pakul vielmi mała. Jak vyśvietliŭ «Ježiednievnik», apieratyŭnikami byŭ zatrymany 55-hadovy žychar Bresta, jaki ź listapada 2009 pa žnivień 2010 padbuchtorvaŭ dvuch dyrektaraŭ bujnych pradpryjemstvaŭ da pieradačy chabaru słužbovym asobam pravaachoŭnych orhanaŭ za spryjalnaje vyrašeńnie pytańnia ab vyzvaleńni ich ad kryminalnaj adkaznaści. U miežach damoŭlenaści pasiarednik atrymaŭ 150 miljonaŭ rubloŭ, paśla čaho byŭ zatrymany.

Cikavaść u hetaj historyi ŭjaŭlaje toje, dyrektary jakich pradpryjemstvaŭ zapłacili za vyzvaleńnie ad kryminalnaj adkaznaści. Heta dyrektar ZAT «Brestabłraps» i hienieralny dyrektar SP «Sielskahaspadarčyja pasłuhi».

Mienavita hetymi pradpryjemstvami apošnim časam zajmaŭsia Kamitet dziaržaŭnaha kantrolu, jaki ŭ žniŭni apynuŭsia ŭ centry kontrkarupcyjnaj apieracyi, raspačataj Kamitetam dziaržbiaśpieki.

Nahadajem, što padčas hetaj apieracyi byŭ aryštavany načalnik upraŭleńnia pa rasśledavańni złačynstvaŭ departamienta finansavych rasśledavańniaŭ Kamiteta dziaržaŭnaha kantrolu Dźmitryj Adamovič.

Niahledziačy na toje, što ŭ MUS pakul nie vydajuć infarmacyju ab tym, dla kaho braŭ hrošy pasiarednik, usie dadzienyja znoŭ pakazvajuć na KDK, jaki ščylna zajmaŭsia spravami ZAT «Brestabłraps».

U svoj čas hetaje pryvatnaje pradpryjemstva abaviazałasia pabudavać zavod pa vytvorčaści rapsavaha aleju ŭ Bresckaj vobłaści. Tamu jano było ŭklučana ŭ dziaržprahramu raźvićcia haliny i atrymała dziaržzamovu. Bolš za toje, ZAT «Brestabłraps» atrymaŭ šerah ilhot nie tolki pad budaŭnictva zavoda, ale i pad zakupku ŭ nasielnictva rapsu. Adnak svaich abaviazalnictvaŭ pradpryjemstva nie vykanała. Jak zajaviŭ staršynia Kamiteta dziaržaŭnaha kantrolu Zianon Łomać, «fizasoby atrymali dziaržzakaz i zanialisia zamiest pierapracoŭki realizacyjaj hetaha rapsu jak kamiercyjnaja struktura». KDK pravioŭ pravierku pradpryjemstva i vyjaviŭ jašče mnostva faktaŭ pratekcyjanizmu z boku asobnych čynoŭnikaŭ.

Tak, naprykład, było vyjaŭlena, što firma jašče ŭ 2006 była ŭklučanaja ŭ śpis pierapracoŭčych pradpryjemstvaŭ, jakim ź biudžetu była vydzielenaja materyjalnaja dapamoha dla zakupki nasieńnia rapsu.

ZAT «Brestabłraps» było vydatkavana 100 miljonaŭ rubloŭ, u toj čas jak pierapracoŭčy zavod navat nie pačynaŭ jašče budavacca. Raps, viadoma, byŭ zakupleny, ale ŭ dalejšym vykarystany ŭ kamiercyjnych metach — nasieńnie było vyviezienaje za miažu.

Staršynia KDK Zianon Łomać tady zajaviŭ, što dziaržkantrol maje namier žorstka razabracca z hetym pradpryjemstvam i vyśvietlić, «na jakoj padstavie ZAT było ŭklučana Bresckim abłvykankamam u pieralik dziaržzamovaŭ».

U svaju čarhu prem'jer-ministr Biełarusi Siarhiej Sidorski zapatrabavaŭ ad KDK nie tolki pravieści dadatkovyja pravieračnyja mierapryjemstvy pa vykanańni ZAT «Brestabłraps» dziaržzamovy, ale i pieradać materyjały ŭ Departamient finansavych rasśledavańniaŭ albo ŭ inšyja pravaachoŭnyja orhany dla pravavoj acenki dziejańniaŭ kiraŭnikoŭ pradpryjemstva. Adnak navat praz dva hady KDK nie raspačaŭ nijakich dziejańniaŭ, kab pryciahnuć da adkaznaści kiraŭnikoŭ ZAT «Brestabłraps».

Pryčym mienavita ŭ toj čas, kali nad ZAT «Brestabłraps» pačali zhuščacca chmary, na dyrektara pradpryjemstva i vyjšaŭ pasiarednik z prapanovaj dać na łapu kamu treba.

Ciapier u dačynieńni da zatrymanaha pasiarednika raspačataja kryminalnaja sprava pa prykmietach ździajśnieńnia im złačynstva, praduhledžanaha č.5 st.16, č.2 st.431 Kryminalnaha kodeksa Biełarusi (padbuchtorvańnie da davańnia chabaru ŭ bujnym pamiery). Viadziecca prapracoŭka jaho suviaziaŭ z metaj vyśviatleńnia pytańnia, kamu jon mieŭ namier pieradać atrymanyja 150 miljonaŭ rubloŭ.

• 0
• 0
• 0
• 0
• 0
• 0
• 0
• 0