«Russkij Newsweek»: Rasija budzie nazirać za vybarami ŭ Biełarusi razam z ABSIE

Vajna pamiž Miadźviedzievym i Łukašenkam dasiahnuła kulminacyi, ličyć časopis.

Jak piša «Russkij Newsweek», u minułuju piatnicu ŭ Jerevanie adbyŭsia, napeŭna, samy dziŭny samit ADKB u historyi hetaj arhanizacyi. Prezidenty, što prybyli na sustreču, razmaŭlali adzin z adnym vybaračna — i ŭsio praz kanflikt pamiž Rasijaj i Biełaruśsiu.

Dźmitryj Miadźviedzieŭ admoviŭsia ad dvuchbakovaj sustrečy z Alaksandram Łukašenkam. I nie jon adzin. Ihnaravaŭ biełaruskaha kiraŭnika i prezident Kazachstana Nursułtan Nazarbajeŭ.

Pry hetym prezidenty ŭsio-taki prymusili Łukašenku pryniać staršynstva ŭ ADKB u śniežni. Biełaruś pavinna była ŭznačalić arhanizacyju jašče hod tamu, adnak tady Łukašenka admoviŭsia pryjechać na samit u Maskvu praz «małočnuju vajnu» pamiž dźviuma krainami. Ciapier ža Łukašenka paabiacaŭ pryjechać u rasijskuju stalicu. «Prezident Biełarusi vykazaŭ hatoŭnaść pryniać [staršynstva], nas heta vielmi raduje», — iranična zaŭvažyŭ Miadźviedzieŭ.

Rasija i Biełaruś užo amal paŭtara miesiaca viaduć vajnu niervaŭ, i da śniežnia jana nie skončycca. Pieršaja ataka była praviedzienaja z Maskvy: 4 lipienia telekanał NTV pakazaŭ dakumientalny film «Chrosny Baćka». Na nastupny dzień Miadźviedzieŭ i Łukašenka prylacieli ŭ Astanu na samit JeŭrAzES i zaadno pavinšavali Nazarbajeva z dniom naradžeńnia. I tut adbyŭsia kančatkovy razryŭ. U asabistaj hutarcy z Nazarbajevym, uspaminaje blizkaja da MZS krynica, mocna pakryŭdžany Łukašenka skazaŭ niešta abraźlivaje ŭ adras rasijskaha prezidenta. Nazarbajeŭ tut ža ŭsio pieradaŭ Miadźviedzievu, a sam z tych časoŭ z Łukašenkam nie razmaŭlaje. U Maskvie taksama vyrašyli: heta apošniaja kropla.

Pačałasia vajna na źniščeńnie. Krynica ŭ Kramli raskazvaje, što na adnoj z naradaŭ Miadźviedzieŭ sfarmulavaŭ novy padychod da Łukašenki prykładna tak: «Ź im ciapier budziem jak ź Juščankam».

Da prezidenckich vybaraŭ u Biełarusi zastajecca kala pałovy hoda. Skrajni termin — 6 lutaha, ale apazicyja ŭpeŭnienaja, što Łukašenka pryznačyć ich na śniežań. I, vierahodna, pravilna zrobić: sa studzienia jaho čakaje ekanamičnaja błakada z boku Maskvy. U Kramli i ŭ Biełym domie ŭpeŭnienyja, kaža krynica Newsweek, što nie siońnia, dyk zaŭtra ciažkaja ekanamičnaja situacyja ŭsio roŭna nie dazvolić Łukašenku ŭtrymacca.

Pamiž Pucinym i Miadźviedzievym

Łukašenku aficyjna nie abviaścili piersonaj non hrata, jak Juščanku. Zatoje da «Chrosnaha Baćki» dadalisia jašče dźvie sieryi telekampramatu, a Miadźviedzieŭ zajaviŭ, što Łukašenka jašče ŭ 2008 pry śviedkach abiacaŭ pryznać niezaležnaść Abchazii i Paŭdniovaj Asiecii, a potym padmanuŭ. Zatym pamočnik Miadźviedzieva Siarhiej Prychodźka pryhraziŭ apublikavać stenahramy vystupu Łukašenki, jakija heta paćviardžajuć.

Spačatku Łukašenka sprabavaŭ dziejničać praz Uładzimira Pucina. Jon jamu patelefanavaŭ paśla pieršaj sieryi «Chrosnaha Baćki», kaža krynica ŭ Kramli. Pucin nibyta adkazaŭ, što ŭ Rasii svaboda słova, a NTV — pryvatny telekanał, i paŭpłyvać na jaho ŭłady nie mohuć. U Pucina ź Miadźviedzievym ŭzhodnienaja pazicyja pa Biełarusi, paćviardžajuć surazmoŭcy Newsweek.

Pieršyja dźvie sieryi «Chrosnaha Baćki» vyklikali ŭ Minsku balučuju reakcyju, raskazvajuć krynicy ŭ atačeńni biełaruskaha prem'jer-ministra Siarhieja Sidorskaha, a apošniaja, pakazanaja 15 žniŭnia, pra paluboŭnic i pazašlubnych dziaciej Łukašenki ŭ Minsku była rascenienaja ŭžo jak naŭprostaja abraza. U hetym ža filmie jamu staviać dyjahnaz «mazaičnaja psichapatyja». Ale skardzicca ŭ Maskvie ŭžo nie było kamu.

Kampramietujučyja stenahramy Kreml, mabyć, publikavać nie budzie. Akramia abiacańniaŭ pryznać Abchaziju z Asiecijaj u Kramla jość, naprykład, zapisy z adnaho z samitaŭ ADKB, na jakich Łukašenka razvažaje pra sijanisckuju zmovu i habrejski kapitał, kaža blizkaja da MZS krynica, ale publikacyja takich adkryćciaŭ była b parušeńniem Vienskaj kanviencyi ab tajamnicy dypłamatyčnych pieramovaŭ.

Baraćba ź biełaruskim kiraŭnikom, miarkujučy pa ŭsim, pojdzie pa zvykłym scenary.

U noč na 1 studzienia 2011 zakančvajecca čarhovy hazavy kantrakt pamiž Maskvoj i Minskam, a značyć, znoŭ pačniecca hazavaja vajna.

Pamiž Maskvoj i Bruselem

U Minsku, kali išli na kanflikt z Rasijaj, raźličvali na pastaŭki nafty ź Vieniesueły, kaža surazmoŭca, blizki da ŭrada Biełarusi. Adnak zamienaj tannaj biazmytnaj rasijskaj nafcie jana ŭsio roŭna nie stanie. U lipieni hetaha hoda Biełstat raskryŭ košt travieńskaj partyi vieniesuelskaj nafty dla Biełarusi — $656 za tonu. Dla paraŭnańnia: pakul Biełaruś mieła mahčymaść kuplać rasijskuju naftu biez mytaŭ, joj davodziłasia płacić usiaho $398 za tonu. Z ulikam mytaŭ tona rasijskaj nafty ŭ traŭni abyšłasia b u $682, to bok krychu bolš, čym tona vieniesuelskaj. Takim čynam, addajučy pieravahu Karakasu, Alaksandr Łukašenka zrabiŭ tolki pryhožy žest, pakazaŭšy, što moža abyścisia i biez Rasii. Ale biełaruskuju ekanomiku brackaja dapamoha Uha Čaviesa zusim nie ratuje.

Akramia taho, surjoznyja prablemy ŭ Biełarusi ŭźnikajuć i z maršrutami dastaŭki. Užo šeść vieniesuelskich tankieraŭ byli razhružanyja ŭ porcie Adesy, adtul naftu dastaŭlajuć u Biełaruś pa čyhuncy. Pa padlikach Fonda nacyjanalnaj enierhietyčnaj biaśpieki, tolki dastaŭka tony nafty tankieram ŭ Adesu kaštuje Biełarusi $76,24, da hetaha treba dadać dastaŭku pa čyhuncy ad Adesy da Mazyra i tranzit. Da taho ž, u traŭni ŭkrainski Mintrans ustalavaŭ košt tranzitu na 30% vyšejšy, čym dla ŭnutranych spažyŭcoŭ. Vychadam sa stanovišča moh by stać zapusk naftapravoda Adesa-Brody ŭ aviersnym kirunku, ale suprać hetaha vystupaje Rasija. I administracyja Janukoviča dakładna nie budzie nastojvać.

Biełaruskija ŭłady na praciahu hoda sprabavali znajści alternatyŭny maršrut praz krainy Bałtyi. Samy zručny i blizki port — łatyšskaja Kłajpieda, ale ŭ haradskoj administracyi skazali, što pra takija pieramovy im ničoha nie viadoma. Inšy varyjant — litoŭski Bucinhie. Ale ŭ Ministerstvie transpartu Litvy taksama ničoha nie viedajuć pra pieramovy ź Litoŭskaj čyhunkaj, bieź jakoj tranzit nafty niemahčymy.

Adzin tankier z naftaj dla Biełarusi razhruziŭsia na minułym tydni ŭ estonskim porcie Muuha. Ale nie fakt, što heta budzie rehularnaja praktyka: sumnieŭnyja pakul vyhady ad tranzitu nafty ŭ Biełaruś pastaviać pad pytańnie biedny, ale stabilny hruzapatok z Rasii.

Naprykład, dla porta Muuha štodzionny prychod sastava z mazutam z Kiryšskaha NPZ — heta harantavany prybytak.

Łukašenka sapraŭdy ŭ ciažkim stanoviščy, tym bolš što siońnia Jeŭrasajuz nie na jaho baku.

U minułym hodzie ŭ Bruseli sprabavali naładzić dyjałoh ź Minskam, ale hetaja palityka ŭžo pryznanaja niepraduktyŭnaj.

U kastryčniku Jeŭraparłamient płanuje pravieści śpiecyjalnuju siesiju, pryśviečanuju prablemam Biełarusi. Prahramu rychtuje deputat ad Niderłandaŭ Jochanes van Balen. U traŭni hetaha hoda jon zajaviŭ u intervju EUHerald.net, što «Biełaruś niezdarma nazyvajuć apošniaj dyktaturaj Jeŭropy, a samoha Łukašenku možna paraŭnać sa Stalinym i Hitleram».

Upieršyniu za ŭvieś čas prezidenctva Alaksandra Łukašenki Rasija i jeŭrapiejskija instytuty hatovyja abjadnacca ŭ baraćbie ź im.

• 0
• 0
• 0
• 0
• 0
• 0
• 0
• 0