Hnili ŭ akopach — pojdziem u ziamlanki?
Čarhovuju vajnu z Rasijaj Łukašenka trymaje ŭ biesprecedentna niavyhadnych ŭmovach. Piša ŭ svaim błohu na NN Alaksandr Kłaskoŭski.
Na pieršy pohlad — całkam dežaviu. Roźnica, adnak, u tym, što čarhovuju vajnu z Rasijaj Łukašenka trymaje ŭ biesprecedentna niavyhadnych ŭmovach.
Letaś taksama ŭ červieni hrymnuła małočnaja vajna, ciapier voś — zdajecca, piataja hazavaja. Tady Łukašenka padviesiŭ damovu ab KSAR, ciapier — Mytny źviaz. Ale stupień ryzyki dla biełaruskaha kiraŭnictva zaraz nieparaŭnalna bolšaja.
Kali Maskva stanie mačyć pa poŭnaj prahramie, to płakali sakralnyja 500 dołaraŭ pad vybary. Dy i sam
siužet vybarčaj kampanii ŭ takim razie abiacaje niaźmiennamu prezidentu bahata niepryjemnych siurpryzaŭ z klajmom Made in Russia.
Ale ž i kapitulavać zaraz, umomant spłacić zapazyčanaść dy pajści ŭ toj Mytny źviaz na ŭmovach Rasii — heta, asabliva paśla hučnych zajaŭ, što nichto nas nie nachilić, aznačała b dla Łukašenki poŭnuju stratu abličča.
Miž tym 4–5 lipienia ŭ Astanie — novy dedłajn. Maskva raźličvaje, što tam na samicie JeŭrAzES, sumieščanym sa śviatkavańniem 70-hodździa Nazarbajeva, naravisty biełaruski partnior uzdymie ruki, pahodzicca na mytnuju trojku.
Vidavočna, što Łukašenka pieraacaniŭ mahčymaść zhulać na zacikaŭlenaści Maskvy ŭ hładkim starcie Mytnaha źviazu. Kaniečnie, zacikaŭlenaść vialikaja, adnak
Rasija trymajecca pryncypu: kudy jon dzieniecca z padvodnaj łodki!
Sapraŭdy, voś i dziejačy z Kijeva padkłali śvińniu, adrapartavaŭšy Maskvie, što hatovy pampavać haz u Jeŭropu ŭ abychod siniavokaj respubliki. Zamuravali, demany!
Jeŭropa ž reahuje viała. Svaja kašula bližejšaja da cieła. Šaniec zblizicca za košt «Uschodniaha partniorstva» biazdarna zmarnavany jak Minskam, tak i Brusielem. Dačynieńni sa Štatami taksama zastajucca na punkcie zamiarzańnia. Voś i kryčy zaraz, jak toj pastušok: vaŭki! vaŭki!
Ekśpierty schilajucca da dumki, što Kreml naŭrad ci pačnie hetym razam paŭnamaštabnuju apieracyju pa zamiaščeńni ŭłady. Niama ni naležnych vaharoŭ, ni nadziejnaj zamieny. Ale za prałanhacyju rasijskaje kiraŭnictva pastarajecca vycisnuć pa maksimumie. Kolki budzie kaštavać Biełarusi čaćvierty termin Łukašenki — zastajecca tolki hadać.
Pryčym
płata akažacca surovaj u lubym razie: ci ŭ sensie zdačy, ci ŭ sensie zapoźnienaj dyviersifikacyi dy zmušanaj ekanamičnaj łomki. Z rytoryki ajčynnaha načalstva vynikaje poŭnaja biespraśvietnaść: hnili ŭ akopach — pojdziem u ziamlanki.
«Jana nie ŭ turmie, a na śpiecdačy KDB!» Kanśpirołahi nakinulisia na Kaleśnikavu12
Kamientary