Padrychtavali dla vas top-10 samych čakanych stužak nastupnaha hoda. Praciah viadomych błakbastaraŭ, miuzikł, chorar, Bred Pit, Leanarda dy Kaprya i niezaležnaje kino — kožny znojdzie tut niešta dla siabie.
Pakul nieviadoma, jak buduć nazyvacca filmy z našaj padborki ŭ biełaruskim prakacie i ci trapiać jany ŭ jaho. Tamu pryvodzim pierakład aryhinalnych nazvaŭ.
Brydžyt Džons: U zachapleńni ad chłapčuka (Bridget Jones: Mad About the Boy)
Upieršyniu my sustreli Brydžyt Džons, samotnuju anhličanku za 30, ažno 23 hady tamu, kali vyjšaŭ pieršy film pra jaje. Ščyraja, trochi niazhrabnaja i niepasrednaja žančyna, jakaja z usich siłaŭ budavała asabistaje žyćcio, palubiłasia hledačam va ŭsim śviecie.
Ciapier Brydžyt — udava z dvuma dziećmi, ale jana znoŭ hatovaja da adnosinaŭ. U novaj stužcy hierainia Renie Ziełviehier sustrenie maładoha chłopca, i, miarkujučy pa naźvie filma, znoŭ zakachajecca na ŭsiu hałavu. U stužku, što vyjdzie ŭ lutym, viernucca zorki franšyzy — budzie i Kolin Fiort, i Chju Hrant.
Małpa (The Monkey)
2024-ty daŭ nam vydatnyja chorary — zhadajcie chacia b «Substancyju» ci «Naśfieratu». Vyhladaje, nastupny hod nie budzie adstavać.
U lutym čakajem premjeru, źniatuju pa raskazie Styviena Kinha. Heta historyja dvuch bliźniat, jakija znachodziać na haryščy svajho baćki staruju lalku-małpu. Paśla hetaha ich pačynajuć pieraśledvać žudasnyja śmierci, i chłopcy sprabujuć pazbavicca ad małpy. Režysioram stužki byŭ Ozhud Pierkins, aŭtar «Źbiralnika dušaŭ» — jašče adnaho chorara, jaki hetym letam mieŭ vielizarnyja zbory ŭ kinateatrach.
Miki 17 (Mickey 17)
Hetuju navukovuju fantastyku źniaŭ karejec Pon Džun Cho, uładalnik «Oskara» za źniatuju im stužku «Parazity» — samy kasavy paŭdniovakarejski film u historyi. I, kaniečnie, vy paznajecie ŭ hałoŭnaj roli Robierta Pacinsana: zorka «Źmiarkańnia» ŭ apošnija hady mała zdymajecca, ale dla Mickey 17 zrabiŭ vyklučeńnie.
Pacinsan hraje Miki Barnsa, kałanizatara ledzianoj płaniety. Barns pahadžajecca, kab paśla śmierci jaho rozum zahružali ŭ novaje cieła-dublikat. Kaniečnie, u niejki momant hety płan daje zboj, i pačynajucca pryhody. Vychad stužki pra Miki Barnsa zapłanavany na krasavik.
Misija nievykanalnaja: Apošniaja raspłata (Mission: Impossible — The Final Reckoning)
Tom Kruz i jaho franšyza «Misija nievykanalnaja» dorać nam topavyja bajeviki ažno z 1996-ha. U hetych filmach biasstrašny Kruz łaziŭ pa dubajskim chmaračosie, skakaŭ sa skały na matacykle i lotaŭ na źniešniaj častcy samalota, a ŭ kancy minułaj stužki adpraviŭ u biezdań niekalki vahonaŭ ciahnika i potym skoknuŭ tudy ž sam (ale nie zabyŭsia na parašut).
Niama sumnievaŭ, što i ŭ bližejšym mai Kruz vydaść nam jakasny ekšn. Kali vam jašče važny siužet, voś jon — hieroj Kruza Itan Chant pavinien źniščyć niebiaśpiečny štučny intelekt i spynić svajho voraha Habryjeła.
Formuła-1 (F1)
Letam 2025-ha na ekrany viartajecca Bred Pit. Supierzorka ŭvasobić rolu honščyka «Formuły-1», jaki pajšoŭ na piensiju, ale viarnuŭsia pa prośbie siabra. Jaho novaje zadańnie — być nastaŭnikam maładoha honščyka-vunderkinda.
U filmie źjaviacca topavyja honščyki «Formuły-1»: čakajcie, da prykładu, Ljuisa Chemiłtana i Maksa Fierstapiena. Kaniečnie, buduć i honačnyja mašyny, i šmat chutkaści.
Bojka za Baktan-Kros (The Battle of Baktan Cross)
U žniŭni nam abiacajuć vysokabiudžetnaje kino ź Leanarda dy Kaprya. Kampaniju jamu składuć Šon Pen i Bienisia del Tora, a zdymaje stužku Poł Andersan, režysior kultavych «Načej u styli buhi» (1997). Biudžet — salidnyja dla Andersana 100 miljonaŭ dalaraŭ.
Dakładny siužet stužki pakul nie atrymałasia paćvierdzić, piša Vanity Fair. Viadoma, što heta kryminalnaja drama. U sieciva trapili fota sa zdymak, dzie ŭ dy Kaprya jość vusy, a taksama jon z aktrysaj Tejanaj Tejłar ładzić niešta padobnaje da kradziažu. Ale kamu patrebny siužet, kali za spravu ŭzialisia takija majstry?
Buhonija (Bugonia)
Hałoŭny dzivak Halivuda, hrek Jorhas Łancimas, rychtuje na listapad novuju stužku. Da metra znoŭ dałučycca jaho muza — aktrysa Ema Stoŭn, jakaja tolki sioleta atrymała «Oskar» za rolu ŭ «Niebarakach» Łancimasa.
«Buhonija» — fantastyčnaja kamiedyja, rymiejk paŭdniovakarejskaj stužki 2003-ha «Uratujcie zialonuju płanietu!». Heta historyja kanśpirataraŭ, jakija vykradajuć kiraŭnicu vialikaj kampanii i dapytvajuć jaje, upeŭnienyja, što heta niebiaśpiečnaja inšapłaniecianka.
Avatar: Połymia i popieł (Avatar: Fire and Ash)
Na śniežań 2025-ha zapłanavany vychad užo treciaha z «Avataraŭ». U stužku viernucca hałoŭnyja hieroi minułych filmaŭ sieryi — hieroi Sema Uorcinhtana, Zoŭi Sałdana i Sihurni Uivier. Abiacajuć i niekalki novych piersanažaŭ.
Možna čakać, što my pabačym jašče bolš rehijonaŭ tajamničaha spadarožnika Pandora, na jakim adbyvajecca ŭsio dziejańnie, i pahłybimsia ŭ charaktar piersanažaŭ, prahnazujuć i niečakanyja siužetnyja pavaroty. Zdymaje karcinu, kaniečnie, Džejms Kemieran, tak što ŭsio znoŭ budzie vidoviščna.
Frankienštejn (Frankenstein)
Maestra žachaŭ Hiljerma del Tora žadaŭ źniać hety film bolšuju častku svajho žyćcia, i ŭ 2025-m jaho mara ździejśnicca. Miesiac vychadu stužki pakul nieviadomy.
Hety siužet užo staŭ kłasičnym: navukoviec Viktar Frankienštejn žadaje stvaryć čałavieka ź niežyvoj materyi, ale daje naradžeńnie monstru. Da hetaj historyi del Tora dadaŭ šmat detalaŭ, narodžanych jaho ŭłasnaj fantazijaj. Atrymałasia razvaha pra spadčynu i suviaź z ułasnym stvareńniem, a taksama pra toje, kudy ŭsio heta moža zavieści.
Maci Maryja (Mother Mary)
Jašče adna stužka, što dahetul nie maje dakładnaj daty vychadu — viadoma tolki, što jaje možna čakać u 2025-m. Bujnaja niezaležnaja kinakampanija A24 zdymaje film pra adnosiny pamiž pop-zorkaj (En Cheteŭej) i jaje dyzajnierkaj (Mikiejła Koŭł). Muzyki budzie šmat — za jaje tut adkaznyja ŭ tym liku śpiavačka Charli XCX i amierykanski muzyka Džek Antonaf.
Režysior stužki Devid Łoŭry paśpieŭ zaintryhavać budučych hledačoŭ. Jon abiacaje film, jaki budzie pravakavać šmat pačućciaŭ u kožnym mahčymym kirunku.
Što jašče?
Niemahčyma achapić usie topavyja stužki 2025 hoda ŭ adnoj padborcy. Tamu voś jašče niekalki filmaŭ, jakija mohuć padacca vam cikavymi:
- «Kachańnie — heta baluča» (Love Hurts), luty 2025 — kamiedyja pra byłoha kilera z karejskaj zorkaj stužki «Usio paŭsiul i adrazu» («Oskar-2023»);
- «Padynhtan u Pieru» (Paddington in Peru), luty 2025 — čarhovaja stužka pra taho samaha miadźviedzia, na jakuju vy pojdziecie ź dziciem;
- «Čornaja torba» (Black Bag), sakavik 2025 — špijonski tryler z Kiejt Błanšet ad režysiora Styviena Soderbierha;
- «Amatar» (The Amateur), krasavik 2025 — Rami Malek, vykanaŭca roli Fredzi Mierkjury, hraje ŭdaŭca-kryptohrafa, čyju žonku zabili terarysty;
- «Vialikaje advažnaje cudoŭnaje padarožža» (A Big Bold Beautiful Journey), maj 2025 — ramkam z Marho Robi i Kolinam Farełam;
- «Pieraradžeńnie śvietu jurskaha pieryjadu» (Jurassic World Rebirth), lipień 2025 — Skarlet Jochansan i dynazaŭry;
- «Majkł» (Michael), kastryčnik 2025 — plamieńnik Majkła Džeksana hraje jaho ŭ muzykalnym bajopiku.
«Naša Niva» — bastyjon biełaruščyny
PADTRYMAĆŠto za studentka Uljana, ź jakoj na bali valsiravaŭ Łukašenka?9
Kamientary