«Zdaryłasia niejkaja niešarahovaja padzieja». Čały prahnazavaŭ, što Łukašenka nie pojdzie na vybary, ciapier tłumačyć, čamu ŭsio ž idzie
U svaich vystupach za apošnija miesiacy analityk Siarhiej Čały paśladoŭna davodziŭ, što pa ŭsich prykmietach Łukašenka nie płanuje ŭdzielničać u prezidenckich vybarach u 2025 hodzie. Ale jahony prahnoz nie apraŭdaŭsia. Novy prahnoz analityka jašče bolš tryvožny.
U novym vypusku navin Biełaruskaha rasśledavalnickaha centra Siarhiej Čały pasprabavaŭ patłumačyć, čamu adbyłosia tak, jak jon nie čakaŭ.
Staŭka na Krutoha
Pra toje, što Alaksandr Łukašenka nie płanuje iści na novyja vybary, upieršyniu Čały zajaviŭ jašče ŭ lutym 2024 hoda, a za apošnija miesiacy, pa miery nabližeńnia da mahčymaj daty vybaraŭ, jašče bolš pierakanaŭsia va ŭłasnaj racyi.
Uvieś hod palityk sapraŭdy paźbiahaŭ pramych adkazaŭ na pytańnie pra svoj udzieł u prezidenckich vybarach. Siarhiej Čały taksama nie bačyŭ prykmiet padrychtoŭki da jahonaha ŭdziełu.
Analityk śćviardžaŭ, što padrychtoŭka da tranzitu ŭłady viałasia ŭsie apošnija čatyry hady, i pryhadvaŭ, jak paśla padziej 2020-ha Łukašenka jeździŭ pa krainie, pierakonvajučy miascovych čynoŭnikaŭ paciarpieć jahony apošni termin. Tranzit byŭ paabiacany, na jaho dumku, nie tolki biełaruskim elitam, ale i Rasii.
Sam palityk, na dumku Čałaha, tak i nie pieražyŭ psichałahičnaj traŭmy 2020 hoda, a kiravańnie krainaj, pracoŭnyja pajezdki i mikramieniedžmient jamu nadakučyli i stali pryhniatać. Tym bolš što pachvalicca niejkimi pośpiechami ni ŭnutry krainy, ni na mižnarodnaj arenie, jon nie moža.
U takoj situacyi Łukašenka chacieŭ by vaładaryć, a nie kiravać. A krainaj niachaj kiruje i robić za jaho ŭsiu pracu «kišenny prezident», ličyć analityk.
Mienavita pad taki raskład Usiebiełaruski narodny schod, staršynioj jakoha byŭ abrany Łukašenka, byŭ nadzieleny pravam pryznačać prezidenta i zdymać, kali jon pojdzie nie tym kursam.
Čały źviartaŭ uvahu, što ŭ svaich pramovach Łukašenka ŭsio čaściej havoryć pra tych, chto pryjdzie paśla jaho, što čynoŭnikam varta pryzvyčajvacca žyć bieź jaho. A niadaŭna ŭvohule zajaviŭ, što jany rychtujuć źmienu.
A z druhoha boku, analityk bačyŭ u dziejańniach dziaržaŭnaj prapahandy stvareńnie śvietłaha vobrazu niadaŭna pryznačanaha kiraŭnika administracyi Łukašenki Dźmitryja Krutoha.
Łukašenka taksama, na dumku Čałaha, cudoŭna razumieje svoj stan zdaroŭja i chacieŭ by pakinuć pasadu tady, kali heta budzie vyhladać jak jaho rašeńnie, a nie tady, kali jon užo nie zmoža prymać nijakich rašeńniaŭ. I jamu nie patrebnyja niejkija truki i ŭviadzieńnie ŭ zman svajho elektaratu ŭ situacyi, kali jon całkam kantraluje situacyju ŭ krainie.
«Ola, pajdu»
23 kastryčnika, pakul Alaksandr Łukašenka znachodziŭsia na samicie BRIKS u Kazani, na pasiadžeńni Pałaty pradstaŭnikoŭ zaćvierdzili rašeńnie pravieści čarhovyja prezidenckija vybary 26 studzienia 2025 hoda. Heta až na paŭhoda raniej za maksimalna mahčymy termin.
Łukašenka ŭ toj ža dzień na pytańnie rasijskaj prapahandystki Volhi Skabiejevaj, ci budzie jon sam u vybarach udzielničać, spačatku kakietničaŭ, paźbiahajučy kankretyki, ale ŭrešcie daŭ stanoŭčy adkaz:
«Tak, Ola, pajdu. Kali maje prychilniki skažuć, što heta treba, a jany, viadoma, skažuć, što tut havaryć».
Paśla hetaj zajavy sacsietki vybuchnuli. Usie iranizavali ź pierakananaści Siarhieja Čałaha ŭ tym, što Łukašenka na vybary nie pojdzie, i zadavalisia pytańniem — a jak ciapier analityk patłumačyć, čamu jahony prahnoz nie spraŭdziŭsia?
Tłumačeńnie ad Čałaha
U novym vypusku «Navinaŭ z Čałym» analityk źviarnuŭ uvahu na dziŭnuju historyju z vybaram daty praviadzieńnia prezidenckich vybaraŭ.
Jašče niadaŭna ź niebyćcia vyciahnuli byłuju staršyniu Centralnaj vybarčaj kamisii Biełarusi Lidziju Jarmošynu, kab jana sa spasyłkaj na Stalina ahučyła, što najlepšaj dataj dla vybaraŭ jość sakavik i listapad. Inšyja stavili na luty, «Biełpoł» sa spasyłkaj na svaje krynicy ŭnutry Biełarusi navat nazyvaŭ kankretnuju datu — 23 lutaha.
Čały ličyć niepierakanaŭčaj viersiju, što vybary byli pieraniesienyja na 26 studzienia, kab źmienšyć vuličnuju pratesnuju aktyŭnaść, bo marazy nie pieraškodzili «Płoščam» 2006 i 2010 hadoŭ. I spadziavacca na niejkuju pratestnuju aktyŭnaść, na jaho dumku, va ŭmovach tatalnych represij nie davodzicca ŭvohule.
Zamiest hetaha analityk prapanuje źviarnuć uvahu na datu, kali było zaćvierdžana rašeńnie ab praviadzieńni vybaraŭ. U płanie mierapryjemstvaŭ Pałaty pradstaŭnikoŭ z 22 kastryčnika i da kanca miesiaca ŭvohule nie było praduhledžana nijakich pasiadžeńniaŭ, najbližejšaje było tolki ŭ listapadzie.
23 kastryčnika pavodle płana deputaty musili pracavać u kamisijach. Za dzień da hetaha, 22 kastryčnika, adbyłosia sumiesnaje pasiadžeńnie dźviuch pałat, na jakim premjer Snapkoŭ raspaviadaŭ pra dasiahnieńni biełaruskaj ekanomiki. Kali b źbiralisia pryznačyć datu vybaraŭ, praciahvaje Čały, to łahična było b zrabić heta mienavita ŭ toj dzień.
Heta aznačaje, na dumku analityka, što «akno», u jakoje ŭźnikła nieabchodnaść razhledzieć pytańnie pryznačeńnia vybaraŭ, heta «litaralna ličanyja hadziny».
«Zdaryłasia niejkaja niešarahovaja padzieja, jakuju dakładna nielha patłumačyć ni raptoŭnym zakančeńniem piacihadovaha cykła ekanamičnaha płanavańnia, ni adpačynkami i śviatami, ni chaładami. Ničym!»
Pavodle Čałaha, hetaja padzieja prymusiła Łukašenku pryniać raptoŭnaje rašeńnie nie tolki ŭdzielničać u vybarach, ale i pravieści ich maksimalna chutka. Jašče tydzień tamu, na «Dažynkach» u Vałožynie palityk paźbiahaŭ pramoha adkazu na hetaje pytańnie, a prapahanda raskručvała za jahony košt asobu Krutoha, mahčymaha pierajemnika Łukašenki.
Hetaja padzieja, jak ličyć analityk, naŭrad ci źviazanaja z unutranymi spravami, bo ŭnutry Biełarusi siońnia ničoha nie adbyvajecca, i naŭrad ci źviazanaja sa źniešniaj palitykaj i ekanomikaj, bo tam pracesy raźvivajucca nie tak imkliva.
Što zdaryłasia
Čały vykazvaje dźvie hipotezy. Pavodle pieršaj, pryčynaj stała imklivaje paharšeńnie prahnozu zdaroŭja Łukašenki. Ale ŭ takim razie jakraz bolš łahičny paskorany tranzit ułady, kab paźbiehnuć «niekiravanaha tranzitu» ŭ vypadku niemahčymaści vykonvać palitykam svaje abaviazki.
Druhaja hipoteza bolš złaviesnaja — Łukašenka moh daviedacca pra płany Rasii pa rezkaj eskałacyi situacyi nie tolki va Ukrainie. Eskałacyja hetaja moža zdarycca ŭ pačatku nastupnaha hoda, na dumku Čałaha najbolš vierahodna, što nie paźniej za luty.
Analityk miarkuje, što eskałacyja płanujecca takoj, što Łukašenka nie moža ŭ hety čas pieradać svaju ŭładu kamuści jašče.
23 kastryčnika ŭ Biełaruś na pieramovy jakraz pryjazdžaŭ ministr abarony Rasii Andrej Biełavusaŭ, na jakich zaćvierdzili zadumu sumiesnych vajskovych vučeńniaŭ «Zachad-2025». Papiarednija vučeńni ŭ 2021 hodzie skončylisia ŭvarvańniem va Ukrainu.
Pavodle mierkavańnia Siarhieja Čałaha, vymaloŭvajecca tryvožny scenaryj.
Padobnaje mierkavańnie, što pieranos daty prezidenckich vybaraŭ u Biełarusi słužyć dla realizacyi Rasijaj peŭnych vajenna-stratehičnych met u kancy zimy ci viasnoj 2025, raniej vykazvaŭ i kiraŭnik Narodnaha antykryzisnaha ŭpraŭleńnia Pavieł Łatuška.
Adnak nie vyklučana, što Siarhiej Čały prosta pamyliŭsia.
«Naša Niva» — bastyjon biełaruščyny
PADTRYMAĆ«Hniłaž i razmandykvańnie». Čały tłumačyć, jak Łukašenka prydumaŭ idealnuju prahramu pracy na budučyniu
Łukašenka prosić vyratavać jaho ad Pucina — mierkavańnie Čałaha
Bolš za paŭmiljona biełarusaŭ znachodziacca ŭ Jeŭrasajuzie — Čały
Čały tłumačyć, čamu ŭ Biełarusi rastuć dachody i ludzi pabiehli pa kredyty
«Ciabie b baćka praklaŭ»: Maci fihuranta «małočnaj spravy» prabiłasia na spatkańnie ź im, kab ślozna paprasić nie supracoŭničać sa śledstvam3
Kamientary