Izrail zaklikaŭ AAN terminova prybrać ź Livana svaich miratvorcaŭ «dziela ich ža biaśpieki». Tam słužać i biełarusy
Biełaruskija aficery SSA i supracoŭniki miedycynskaha atrada śpiecyjalnaha pryznačeńnia słužać u składzie italjanskaha kantynhienta AAN u Livanie, jaki znachodzicca na linii bojesutyknieńniaŭ pamiž CACHAŁ i «Chiezbałoj». Izrail płanuje istotna pašyryć nastupleńnie ŭ hetym rehijonie.
Premjer-ministr Izraila Bińjamin Nietańjachu zapisaŭ videazvarot, u jakim zaklikaŭ AAN nieadkładna vyvieści svaje časovyja miratvorčyja siły ŭ Livanie (UNIFIL) z paŭdniovaj častki krainy, dzie znachodziacca bajeviki i abjekty radykalnaj isłamisckaj hrupoŭki «Chiezbała». Niekalki miratvorcaŭ užo byli paranienyja z-za ŭdaraŭ izrailskaj armii pa pazicyjach «Chiezbały», pieradaje The Guardian.
«Spadar hienieralny sakratar, pierakanajcie siły UNIFIL pakinuć zonu ryzyki. Heta treba zrabić prosta zaraz, nieadkładna. Admova evakuiravać sałdat UNIFIL robić ich zakładnikami «Chiezbały». Heta stavić pad pahrozu jak ich samich, tak i žyćci našych vajskoŭcaŭ», — skazaŭ Nietańjachu ŭ zvarocie da hienieralnaha sakratara AAN Antoniu Huteryša.
Izrailski premjer dadaŭ, što škaduje z-za ranieńniaŭ niekatorych sałdat UNIFIL padčas izralskaj naziemnaj apieracyi na poŭdni Livana, i adznačyŭ, što CACHAŁ robić usio mahčymaje, kab praduchilić padobnyja vypadki. Adnak samy prosty i vidavočny šlach zabiaśpiečyć biaśpieku miratvorcaŭ — prosta vyvieści ich ź niebiaśpiečnaj zony, padahulniŭ Nietańjachu.
U svaju čarhu, pradstaŭnik UNIFIL raniej zajaviŭ, što miratvorcy nie płanujuć pakidać paŭdniovy Livan, bo ich prysutnaść važnaja dla infarmavańnia AAN pra toje, što adbyvajecca ŭ zonie kanfliktu. Sami siły UNIFIL, pry hetym, nie ŭmiešvajucca ŭ bajavyja dziejańni. Ich kolkaść na siońnia skaładaje kala 10 tysiač sałdat z 50 krain śvietu.
Varta adznačyć, što na linii bojesutyknieńniaŭ pamiž CACHAŁ i «Chiezbałoj» znachodziacca i biełaruskija miratvorcy. Jak minimum siem aficeraŭ ź liku miratvorčaj roty Biełarusi i miedycynskaha atrada śpiecyjalnaha pryznačeńnia (MASP) 432-ha Hałoŭnaha vajennaha kliničnaha miedycynskaha centra Uzbrojenych Sił Biełarusi ciapier słužać u italjanskaj zonie adkaznaści AAN, jakaja miažuje ź linijaj frontu na poŭdni Livana i ŭ jakoj znachodzicca hałoŭny štab UNIFIL.
Misija biełaruskich miratvorcaŭ znachodzicca ŭ Livanie jašče z 2010 hoda. Za hety čas u misii słužyli zvyš 50 biełaruskich vajskoŭcaŭ, u tym liku pradstaŭniki Sił śpiecyjalnych apieracyj Biełarusi.
Izrail uryvaŭsia na terytoryju Livana dvojčy. Pieršy raz — u 1982 hodzie, kali Izrail vajavaŭ suprać Arhanizacyi vyzvaleńnia Paleściny i padčas kampanii zachapiŭ livanskuju stalicu Biejrut razam z poŭdniem krainy. Izrailskaja armija kančatkova syšła ź Livana tolki ŭ 2000 hodzie, a zatym praz 7 hadoŭ paŭtaryła ŭvarvańnie ŭžo suprać «Chiezbały», jakoje skončyłasia dziakujučy ŭmiašalnictvu AAN i stvareńniu misii UNIFIL.
Za ŭvieś čas isnavańnia misii z-za abstrełaŭ Izraila i «Chiezbały» zahinuli zvyš 300 miratvorcaŭ UNIFIL. Adkaznaść za ich śmierć baki kanfliktu pierakidvajuć adzin na adnaho.
Bajpoł nazvaŭ imiony mahčymych zabojcaŭ Andreja Zielcera. I zajaviŭ, što siłavika «Nirvanu» zastreliŭ svoj ža3
Kamientary