Viersija pra kantakty Huceryjeva i amierykancaŭ: jaho pasłaŭ Łukašenka

Češskija ŚMI niadaŭna pisali pra kantakty naftavaha mahnata Michaiła Huceryjeva z pradstaŭnikami ZŠA. Dadatkovyja detali paviedamlaje papularny partał Seznam.

Jak piša vydańnie, sustreča Huceryjeva i jaho plamieńnika — rasijskaha bankira Michaiła Šyšchanava — z aficeram suviazi FBR Piteram B. adbyłasia ŭ Prazie na miažy zimy i viasny 2022 hoda. Na joj taksama prysutničaŭ aficer češskaj kontrraźviedki BIS, jaki vydavaŭ siabie za ahienta CRU.

Vydańnie piša, što sustreča była inicyjavana Huceryjevym, jaki mieŭ prapanovu dla amierykancaŭ ad Alaksandra Łukašenki. Padrabiaznaściami sustrečy padzialiŭsia jaje piaty ŭdzielnik — češski palicejski hruzinskaha pachodžańnia Levan Hurhienidze.

Jak tłumačyć vydańnie, pryčyna, čamu Hurhienidze, čałaviek z dobrymi suviaziami ŭ Rasii i va Ukrainie, vyrašyŭ praz dva hady raskryć detali hetych sakretnych pieramovaŭ žurnalistam, źviazana ź jaho ŭłasnaj situacyjaj. Historyja supracoŭnictva Levana Hurhienidze i češskich sił biaśpieki pačałasia kala 15 hadoŭ tamu, kali jon pracavaŭ u administracyi Michaiła Saakašvili, dzie adkazvaŭ za baraćbu z arhanizavanaj złačynnaściu. Ale paśla roznahałośsiaŭ z načalstvam jon pakinuŭ pracu i krainu.

Hurhienidze pierajechaŭ u Prahu, dzie paśla atrymańnia hramadzianstva pastupiŭ na słužbu ŭ NCOZ (Nacyjanalny centr pa baraćbie z arhanizavanaj złačynnaściu). Adnak u sakaviku hetaha hoda jaho abvinavacili nie tolki ŭ pieradačy sakretnaj infarmacyi, ale i, pavodle jaho słoŭ, u supracoŭnictvie z Rasijaj.

Hurhienidze śćviardžaje, što mienavita jon arhanizavaŭ sustreču Huceryjeva i Šyšchanava ŭ Prazie. «Mnie pazvaniŭ moj kantakt z ukrainskaj śpiecsłužby i skazaŭ, što Huceryjeŭ i Šyšchanaŭ chacieli b sustrecca z amierykancami ŭ Prazie i spytaŭ, ci zmahu ja heta arhanizavać». Žurnalisty Seznam pravieryli infarmacyju, i jaje sapraŭdnaść była paćvierdžana.

Mužčyna taksama śćviardžaje, što pra intares Huceryjeva da sustrečy z amierykancami jon paviedamiŭ češskaj słužbie biaśpieki BIS, ź jakoj na toj momant taksama supracoŭničaŭ. Pavodle jaho słoŭ, meta zaklučałasia ŭ tym, kab atrymać infarmacyju ad Huceryjeva i ŭciahnuć jaho ŭ supracoŭnictva. Hurhienidze adznačaje, što rasijski aliharch nie viedaŭ, što ŭ kanśpiratyŭnaj kvatery, akramia amierykancaŭ, prysutničaje taksama aficer češskaj kontrraźviedki.

«Huceryjeŭ nie viedaŭ, što tam budzie BIS, jon dumaŭ, što heta ludzi z ZŠA. Kontrraźviedka ŭvieś čas viała aŭdyjazapis, jaki pavinien byŭ pasłužyć dokazam. Huceryjeŭ zajaviŭ, što choča damovicca z ZŠA ad imia Łukašenki. Jon paŭtaryŭ, što Biełaruś nie budzie ŭstupać u vajnu i ŭryvacca va Ukrainu. Kazaŭ, što Łukašenka baicca Pucina», — apisvaje pieramovy Hurhienidze.

Pa słovach Hurhienidze, Huceryjeŭ paviedamiŭ jamu, što «pryjechaŭ pa prośbie Łukašenki, jaki turbujecca za svajo žyćcio i žyćcio svaich dziaciej».

«Jon chacieŭ zaklučyć pahadnieńnie z ZŠA, što Biełaruś nie ŭstupić u vajnu i nie napadzie na Ukrainu. (…) U jakaści harantyj jon prapanoŭvaŭ, kab Huceryjeŭ pieradaŭ ZŠA kalijnyja šachty, jakija jon maje na poŭdni Biełarusi. Biełaruś taksama maje svaje šachty, i jany taksama hatovyja pieradać ich ZŠA ci treciaj asobie, jakuju paznačać amierykancy», — apisvaje detali sustrečy Hurhienidze.

Jak adznačaje partał Seznam, češskaja kontrraźviedka BIS, a taksama niekatoryja češskija ŚMI apisvajuć abstaviny sustrečy inakš, čym Levan Hurhienidze. Pres-sakratar BIS zajaviŭ žurnalistam, što BIS nie była arhanizataram i inicyjataram nijakaj sustrečy. Jon admoviŭsia kamientavać detali sustrečy, adnak nie admaŭlaŭ mahčymaść taho, što jana sapraŭdy adbyłasia.

Aficer suviazi FBR u Prazie Piter B. paśla taho, jak jamu zadali pytańnie pra pieramovy z rasijskim aliharcham, skazaŭ: «Nie kryŭdujcie, ale ja nie mahu z vami razmaŭlać».

Češskaje vydańnie śćviardžaje, što jaho žurnalisty na praciahu troch miesiacaŭ praviarali detali sustrečy, źbirajučy infarmacyju ŭ roznych krainach Jeŭropy. U Hiermanii reparcior sustrakaŭsia z vysokapastaŭlenym aficeram ukrainskaj śpiecsłužby, jaki paćvierdziŭ, što infarmacyja pra žadańnie Huceryjeva pahavaryć z amierykancami pastupiła ad ich. Metaj rasijskich udzielnikaŭ było pahavaryć z amierykancami na niejtralnaj terytoryi.

Jak piša vydańnie, pieramovy ŭ Prazie zaviaršylisia tym, što Huceryjeva zapeŭnili ŭ tym, što prapanovu Łukašenki abmiarkujuć u CRU, i paśla hetaha budzie pryniataje rašeńnie.

Pa słovach Hurhienidze, letam 2022 hoda jamu dali zadańnie arhanizavać novuju sustreču. Jaje ŭdzielnikami stali tyja ž asoby, što i ŭ pieršym vypadku.

Mužčyna śćviardžaje, što na pieramovach aliharch Huceryjeŭ prasiŭ amierykancaŭ (aficera FBR i mierkavanaha ahienta CRU, jaki nasamreč byŭ aficeram BIS), kab jaho syna, jaki žyvie ŭ Anhlii, vyklučyli z sankcyjnaha śpisu. «Pradstaŭnik FBR adkazaŭ, što nie maje paŭnamoctvaŭ dla hetaha i pieradaść pytańnie na razhlad. «Ahient CRU» paviedamiŭ, što ich nie cikaviać kalijnyja šachty. U kancy Huceryjeŭ skazaŭ, što ŭvohule nie razumieje, što robić u Prazie», — raskazaŭ Hurhienidze.

Pa jaho słovach, rasijski miljarder nastojliva prasiŭ udzielnikaŭ sustrečy, kab u Rasii nichto nie daviedaŭsia pra pieramovy, «bo jamu pahražajuć fizičnaj likvidacyjaj usioj siamji». «Paśla hetaha ja bolš nikoli nie sustrakaŭ Huceryjeva», — śćviardžaje Levan Hurhienidze.

Varta adznačyć, što navat kali kantakty Huceryjeva z pradstaŭnikami amierykanskich śpiecsłužbaŭ i mieli miesca, namiery i mety Alaksandra Łukašenki i samoha miljardera nie abaviazkova byli takija, jak apisvajuć češskija vydańni.

• 0
• 0
• 12
• 1
• 0
• 0
• 1
• 0