Kalijny prajekt Huceryjeva ŭ Lubanskim rajonie zamarožany, techniku viarnuli ŭ Rasiju

Kalijny prajekt rasiejskaha aliharcha Michaiła Huceryjeva ŭ Lubanskim rajonie zamarožany: pamiatny znak z kapsułaj ad Łukašenki prybrali, budaŭničyja pracy spynienyja, techniku adahnali nazad u Rasieju.

Pavialičyć

Sioleta ŭ vieraśni rasiejski pradprymalnik Michaił Huceryjeŭ i Alaksandar Łukašenka ŭračysta zakłali kapsułu ŭ hranitny pamiatny znak u honar zasnavańnia novaha kalijnaha kambinatu ŭ Lubanskim rajonie.

Vystupajučy na ŭračystaj cyrymonii, Alaksandr Łukašenka padkreśliŭ, što heta histaryčny momant i niekalki razoŭ kazaŭ pra toje, što varta datrymlivacca terminaŭ. Jon navat paabiacaŭ pierajmienavać Lubań u Huceryjeŭsk u vypadku jakasnaha i svoječasovaha vykanańnia prajektu.

U čakańni kredytu

Pavodle miascovych žycharoŭ, na siaredzinu śniežnia nijakija budaŭničyja pracy ŭ rajonie vioski Občyn Lubanskaha rajonu, dzie pavinien paŭstać kalijny kambinat, nie viaducca. Pracaŭnikoŭ «Słaŭkaliju» nia zvolnili, im płaciać zarobki, ale na pracu jany nie vychodziać. U kampanii kateharyčna admovilisia kamentavać sytuacyju, analahičny adkaz byŭ atrymany ad namieśnika staršyni Lubanskaha rajvykankamu pa ekanamičnych pytańniach.

Pa słovach Piatra, pracaŭnika «Słaŭkaliju», jaki paprasiŭ nie nazyvać jaho proźvišča, načalstva zapeŭnivaje ludziej, što jany pačnuć vychodzić na pracu ad siaredziny studzienia.

«Zaraz tam tolki mechaniki dziažurać. Hetaha pierapynku nie planavałasia, uźnikli prablemy ź finansavańniem. Abiacajuć, što z 15-ha studzienia budzie praca, pryjazdžali ludzi ź Miensku.

U horadzie biada, nidzie niama raboty. Dumali ludzi, što adkryjecca kambinat, dyk choć praca budzie. A ŭsio zakryvajuć, usio tuchnie».

Inšyja terminy pačatku budaŭničych pracaŭ ahučyła presavaja słužba Mienskaha abłvykankamu — kredyt atrymali, usio adpaviadaje planam i budoŭla adnovicca ŭ sakaviku:

«Vy kamu chočacie vieryć, Huceryjevu, kiraŭniku hetaj kampanii ci miascovym žycharam? Što jany mohuć viedać? Krychu zatarmazili, bo było pytańnie z kredytam, ale ciapier linija adkrytaja, i jany prystupajuć da pracy. Heta praŭdzivaja infarmacyja».

Kapsułu schavali ad… ludziej

Łukašenka i Huceryjeŭ nia tolki vystupali ŭ Lubani — tam była zakładzienaja kapsuła ŭ pamiatny znak la padmurku budučaha pradpryjemstva. Ciapier taho znaku niama na miescy. U horadzie kažuć, što ŭ rasiejskaha investara skončylisia hrošy, prajekt pravaliŭsia, usia technika adpraŭlenaja svaim chodam u Rasieju.

«Sam kamień prybrali, kab jaho nia splažyli miascovyja žychary, vandały, chulihany», — paćvierdziŭ Svabodzie Dźmitry Suchan, namieśnik staršyni Lubanskaha rajvykankamu pa pytańniach architektury i budaŭnictva.

Suchan nastojvaje, što investar prytrymlivajecca terminaŭ, ale paćviardžaje, što kredyt jašče nie atrymany.

«Na hety momant jany pabudavali toje, što ŭ ich było ŭ planach. Na siońniašni dzień staić pytańnie atrymańnia kredytnych resursaŭ ad kitajskaha banku».

Kredyt Huceryjeva

U Mienskim abłasnym vykanaŭčym kamitecie zapeŭnivajuć, što rasiejski investar atrymaŭ pieršy tranš kitajskaha kredytu, a spynieńnie pracaŭ na zimu planavaje.

Dziŭna, što Huceryjeŭ čakaje mienavita kredytnych srodkaŭ i nie śpiašajecca ŭkładać svaje. Pa raniejšaj infarmacyi, jahony ŭniosak pavinien skłaści pryblizna 286 młn. dalaraŭ. A astatnija hrošy z ahulnaj sumy investycyj u 1,5 miljarda dalaraŭ u Dziaržaŭnaha banku raźvićcia Kitaju budzie brać «Biełarusbank» pad harantyi biełaruskaha ŭradu. GMC Global Energy plc, jakoj vałodaje Huceryjeŭ, abaviazvajecca spłačvać tolki pracentnuju staŭku za kitajski kredyt.

Što tyčycca terminaŭ budaŭnictva, to ŭ 2011-m hodzie było abvieščana, što kampanija Huceryjeva pry padtrymcy Biełarusi pabuduje kalijny kambinat užo ŭ 2015-m. Ale sioleta adkłali čakany zapusk na 2020 hod. Pa stanie na śniežań, prajekt zamarožany, byli ździejśnienyja tolki bazavyja ziamielnyja pracy.

• 0
• 0
• 0
• 0
• 0
• 0