Polskaja Vyšejšaja kantrolnaja pałata dała zaklučeńnie pa prahramie Business Harbour

Spravazdača taksama ŭtrymlivaje vysnovy NIK adnosna prahramy Poland. Business Harbour, jakaja nakiravana na pryciahnieńnie IT-śpiecyjalistaŭ, u tym liku ź Biełarusi. Prahrama była prypyniena ŭ pačatku hetaha hoda, piša Reform.news.

Zhodna z danymi pałaty, za pravierany pieryjad było padadziena 6,57 młn zajaŭ na atrymańnie vizaŭ, a vydadziena amal 6,17 młn dazvołaŭ na ŭjezd, ź jakich nacyjanalnyja vizy skłali 4,9 młn, a šenhienskija — 1,26 młn.

Asnoŭnymi atrymalnikami vizaŭ byli hramadzianie Ukrainy, Biełarusi i Rasii. Ukraincy atrymali 3,42 młn vizaŭ, abo 55% ad ahulnaj kolkaści, biełarusy — 1,64 młn vizaŭ abo 26,6%, a rasijanie — 357,42 tys. abo 5,8%.

U spravazdačy NIK havorycca, što prahrama Poland. Business Harbour była zapuščana biez naležnaha jurydyčnaha afarmleńnia.

«Ministerstva zamiežnych spraŭ pačało realizacyju prahramy Poland. Business Harbour, jakaja była ŭviedziena bieź jurydyčnaj padstavy. Prahrama nie była zaćvierdžana Savietam ministraŭ i nie ŭniesiena ŭ jakaści ministerskaj prahramy, navat nie było piśmovaha varyjantu», — havorycca ŭ spravazdačy.

U dakumiencie adznačajecca, što ni dyrektar konsulskaha departamienta MZS, ni dziaržaŭny sakratar — namieśnik ministra, jaki kuryruje hetaje napramak, ni sam ministr nie kantralavali vykanańnie pracedur u miežach prahramy.

«Realizacyja naśpiech padrychtavanaj prahramy pryviała da taho, što atrymańnie vizy (D23-P.BH) stała samym prostym, chutkim i tannym sposabam atrymańnia mahčymaści ŭjezdu na terytoryju Polščy i Jeŭrasajuza, a rola konsuła ŭ pracesie razhladu zajaŭki na atrymańnie hetaj vizy praktyčna zvodziłasia da jaje vydačy. Nadańnie pravoŭ, nie charakternych dla inšych typaŭ viz, adsutnaść patrabavańniaŭ da členaŭ siamji ci partnioraŭ, jakija nie źjaŭlajucca sužencami, i minimalnyja patrabavańni da ŭdzielnikaŭ prahramy pryviali da taho, što dziasiatki tysiač zamiežnikaŭ, u asnoŭnym ź Biełarusi i Rasii, zmahli ŭjechać u Polšču. Da taho ž heta znachodziłasia pa-za poŭnym kantrolem i intaresami kiraŭnictva MZS, što, na dumku NIK, mahło značna źnizić biaśpieku dziaržavy. Nienadziejny i niedastatkovy nahlad za dziejnaściu konsułaŭ pryvioŭ da taho, što pa prahramie P.BH było vydadziena 419 vizaŭ nieŭpaŭnavažanym zamiežnikam z 29 krain», — havorycca ŭ spravazdačy.

Usiaho pa prahramie było vydadziena 95 545 vizaŭ, 97,6% rašeńniaŭ byli stanoŭčymi. Bolšaść vizaŭ było vydadziena na padstavie rekamiendacyj Polskaha ahienctva inviestycyj i handlu, kampanii, jakaja ŭdzielničała ŭ realizacyi prahramy.

NIK asabliva niehatyŭna acaniła vydaču vizaŭ hramadzianam Biełarusi i Rasii paśla pačatku ŭvarvańnia Rasii va Ukrainu. Adznačajecca, što z 1 sakavika pa 31 śniežnia 2023 hoda hramadzianam Rasii było vydadziena 1838 vizaŭ.

«NIK źviartaje ŭvahu, što MZS nie daŭ mahčymaści pravieryć pravilnaść vydačy vizaŭ pa prahramie P.BH. U miežach prahramy P.BH było try šlachi — indyvidualny, dla startapaŭ i biznesu. Kožny z hetych šlachoŭ mieŭ roznyja ŭmovy (naprykład, datyčyŭ hramadzian roznych krain), a taksama vizu mahli atrymać IT-śpiecyjalisty i členy ich siemjaŭ. Konsulskim adździełam nie raspracavany instrukcyi dla dypłamatyčnych pradstaŭnictvaŭ i vizavaha centra pa ŭliku danych u sistemie «Viza-Konsuł» asobna pa kožnaj hrupie zajaŭnikaŭ, u vyniku čaho niemahčyma vyznačyć, ci była vydadziena viza dla IT-śpiecyjalista abo dla člena jaho siamji, i jaki šlach vykarystoŭvaŭsia», — havorycca ŭ spravazdačy.

U chodzie pravierki taksama analizavałasia vydača pracoŭnych, studenckich i inšych typaŭ vizaŭ, u tym liku dla realizacyi inviestycyjnych prajektaŭ i inš.

Pa vynikach kantrolu pałata zrabiła šerah zaŭvah i rekamiendacyj. Jany datyčać raźmierkavańnia nahladnych paŭnamoctvaŭ u Ministerstvie zamiežnych spraŭ, uzmacnieńnia konsulskaj słužby, udaskanaleńnia elektronnaj sistemy, jakoj karystajucca konsulskija rabotniki dla vydačy vizaŭ. Ministerstvu rekamiendujecca farmalizavać vizavyja prahramy, u tym liku raspracavać miechanizmy validacyi mety vydačy vizy i jaje faktyčnaha vykarystańnia. U častcy sistemnych rekamiendacyj kantralory prapanujuć raspracavać vizavuju i mihracyjnuju palityku, a taksama aktyvizavać pracu pa vyjaŭleńni asob i arhanizacyj, jakija z metaj zarobku pradastaŭlajuć dakumienty, što ŭ dalejšym vykarystoŭvajucca ŭ jakaści padstavy dla atrymańnia vizy.

• 0
• 0
• 1
• 0
• 0
• 0
• 0
• 0