Jak dziaciej u Hiermanii pazbaŭlajuć ad strachu čytańnia ŭsłych? U škołu kličuć sabaku-słuchača!
Mnohija niamieckija (i nie tolki) školniki adčuvajuć mocny strach pierad čytańniem usłych. Vinoj adnakłaśniki, jakija časta padymajuć na śmiech i tym samym raźvivajuć u dziciaci kompleksy. U vyniku dzieci pačynajuć zapinacca i jašče bolš bajacca čytać pierad inšymi.
Vyrašać hetuju prablemu ŭ niekatorych niamieckich škołach pačali aryhinalna — z dapamohaj śpiecyjalna navučanych sabak-słuchačoŭ, paviedamlaje telehram-kanał «Što tam u niemcaŭ?».
«Sabaka nie moža papravić abo pierapynić, kali jany čytajuć usłych. Jana lubić słuchać», — kaža 30-hadovaja piedahoh Safi Hotchart, jakaja ŭžo vosiem hadoŭ pravodzić takija ŭroki ŭ školnikaŭ horada Majnc. Jaje supravadžaje kinh-čarlz-spaniel pa imieni Łoci.
Pierš čym pačać urok, Hotchart tłumačyć dzieciam pavodziny sabaki i matyvuje ich pračytać joj što-niebudź — bo sabaka čytać nie ŭmieje!
Časam Łoci navat sama vybiraje knihu, tykajučy ŭ jaje nosam, i heta pryvodzić školnikaŭ u poŭnaje zachapleńnie.
Asabliva karysnyja takija ŭroki dla dziaciej, jakija pieražyli dośvied uciokaŭ sa svajoj krainy i nie vielmi dobra vałodajuć niamieckaj, kaža Hotchart. Jana choča pazbavić vučniaŭ ad «strachu pierad knihami». Pobač sa spanielem dzieci adčuvajuć siabie ŭpeŭniena, bo»dla Łoci ŭsie adnolkavyja».
Stanoŭčy efiekt ad prysutnaści sabaki dakazany i daśledavańniami psichołahaŭ, bo pahładžvańnie sabaki źnižaje ŭ dziaciej stres. Sustreć takich sabak-słuchačoŭ u Hiermanii možna nie tolki ŭ škołach, ale i ŭ haradskich biblijatekach, naprykład u Kiolnie, Bierlinie ci Rehiensburhu.
«Tania, my z taboj!» Ułady zapuścili fłešmob u padtrymku žančyny ŭ čyrvona-zialonym VIDEA27
Kamientary