Takoha ŭ rajcentrach jašče nie było. U Smarhoni pustujučy zavod pieratvaryli ŭ vielizarny handlovy centr
Adkryć takuju machinu ŭ maleńkim rajcentry moža albo varjat, albo vielmi ambicyjny biznesmien. U jakuju katehoryju trapili ŭładalniki novaha handlovaha centra ZOSS u Smarhoni, pakaža čas. Pad ich čułym kiraŭnictvam byłyja karpusy zavoda aptyčnaha stankabudavańnia pieratvarylisia ŭ sučasnuju prastoru z eskałatarami i panaramnym liftam, piša «Anłajnier».
Z pramysłovych karpusoŭ — u modny moli
Andrej Vitkoŭski, 30-hadovy kiraŭnik HZC ZOSS, kaža, što nazva kompleksu mnohim reža słych, ale jana było abrana nievypadkova.
— Usie miascovyja viedajuć i nazyvajuć heta miesca ZOSam (zavod aptyčnaha stankabudavańnia [abrevijatura pa-rusku]). My vyrašyli zachavać historyju ŭ niejminhu i nie prydumlać ničoha novaha.
Da hetaj vializnaj prastory ź bietonu na vulicy Jakuba Kołasa biznesmieny pryhladalisia jašče da taho, jak jana była vystaŭlena na aŭkcyjon. Sam Andrej byŭ pradprymalnikam, tamu ŭ hałavie ŭ chłopca, jakomu na toj momant było ŭsiaho 25 hadoŭ, pastajanna kruciłasia dumka: jak pieratvaryć zavadskija pabudovy ŭ kruty biznes-prajekt?
— Kožny raz, prajazdžajučy mima pustujučych karpusoŭ ZOSa, my pradstaŭlali na jaho miescy handlova-zabaŭlalny centr. U 2020 hodzie, kali abjekt vystavili na tarhi, kampanija «ŁTK-Ahra» stała jaho ŭłaśnikam. Z hetaha momantu pačalisia maštabnyja raboty pa rekanstrukcyi.
Na toje, kab nablizić karcinku da realnaści, va ŭładalnikaŭ pustujučych karpusoŭ — administracyjnaha i vytvorčaha — syšło čatyry hady. Pa słovach Andreja, płanavali ŭkłaścisia raniej, ale vyjšli za ramki płanavanaha času i adviedzienaha na rekanstrukcyju biudžetu.
— Kali biarešsia za taki bujny abjekt, zaŭsiody jość ryzyka, što ŭ pracesie rabot vylezie šmat niuansaŭ. Dla nas heta nie było niečakanaściu, tym bolš my nie budavali abjekt z nula, a rekanstrujavali isnujučy z savieckich časoŭ budynak. U nas tut dva karpusy: u adnym try vysokija pavierchi, u druhim — šeść. My ich abjadnali i zrabili nievialiki atryum. Tut vosiem eskałataraŭ, panaramny i hruzavy lifty. Ja dumaju, pieršy čas miascovyja buduć chadzić siudy tolki dla taho, kab na ich pakatacca, — śmiajecca Andrej.
Avantura ci paśpiachovy biznes-płan?
Aptymizmu Andreja možna pazajzdrościć: nie ŭsie biznesmieny hatovyja reanimavać budynak płoščaj 13 tys. mietraŭ u nievialikaj hłybincy i adaptavać jaho pad arendnyja «kvadraty».
— U Smarhoni pražyvaje kala 40 tys. čałaviek, ale dadajcie siudy jašče 15 tys., jakija jeduć da nas ź bližejšych nasielenych punktaŭ. Vielmi spadziajemsia, što ZOSS stanie novaj miascovym punktam pryciahnieńnia, tym bolš my padciahnuli siudy niekatorych bujnych hulcoŭ typu «Santy» i KFC. Akramia taho, tut na piatym paviersie adkryjucca adziny ŭ rajonie dziciačy zabaŭlalny centr i nievialiki fud-kort. Mnohija aścierahajucca ŭvachodzić u pustujučyja pamiaškańni, nichto nie choča być pieršym, ale, ja dumaju, paśla adkryćcia praduktovaha mahazina praces paskorycca.
Andrej kaža, što na siońnia kala 60% arendnych płoščaŭ (kala 5 tys. «kvadrataŭ») užo zaniatyja: adny arandatary padpisali damovu, inšyja jašče na stadyi pryniaćcia rašeńnia.
— Zapoŭnić jaho nie tak składana, jak zdajecca, — ličyć Andrej. — Inšaje pytańnie kim. My chočam, kab siudy pryjšli dobryja arandatary, jakija mohuć prapanavać zapatrabavany tavar. Jašče ŭ 2020 hodzie my płanavali pryciahnuć siudy bujnych hulcoŭ retejłu typu LC Waikiki i Sinsay, ale jany pakidajuć biełaruski rynak. Spadziajemsia, ich zamieniać ajčynnyja vytvorcy.
Mnohija bajacca zachodzić u maleńkija harady, choć tut niama kankurencyi. U nas pramysłovy rehijon, jaki ŭvachodzić u svabodnuju ekanamičnuju zonu. Nakolki ja viedaju, u Astraŭcy samyja vysokija zarobki pa krainie, a jon znachodzicca ŭ 20 chvilinach jazdy ad Smarhoni. Nasielnictva tut bolš-mienš płaciežazdolnaje.
Kab padtrymać arandataraŭ na etapie ŭvachodu i dapamahčy im pieramahčy sumnievy, uładalniki handlovaha centra raspracavali sistemu źnižak: pieršy miesiac arendy biaspłatny, nastupnyja dva — sa źnižkaj 50%.
— My hnutkija ŭ hetym płanie, hatovyja iści nasustrač, — tłumačyć Andrej.
Pa słovach maładoha kiraŭnika, usia hetaja zaduma ź pieraŭtvareńniem starych zavadskich karpusoŭ u sučasny HZC u čymści padobnaja da avantury. Pryznajecca: u jaho i jaho kampańjonaŭ pa biznesie byli momanty, kali jany sumniavalisia i chacieli viarnuć čas nazad. Ale ciapier, hledziačy na vynik, razumiejuć: jon kaštuje ŭkładzienych prac.
Kamientary