Žančynanienaviśnictva isnavała zaŭsiody, choć było vyklikanaje roznymi pryčynami i prymała roznyja formy. Inceły — novaja jaho varyjacyja.
Suprać rasijskaha inceła-aktyvista Alaksieja Padniabiesnaha zaviali kryminalnuju spravu. Heta stała vynikam zvarotu ŭ pravaachoŭnyja orhany kiraŭnicy «Lihi biaśpiečnaha internetu» Kaciaryny Mizulinaj, jakaja źviarnuła ŭvahu na kampramietujučaje mužčynu videa.
Na im 46-hadovy Padniabiesny całujecca z 15-hadovaj školnicaj i macaje jaje hrudzi. Sam Padniabiesny śćviardžaje, što ničoha ź dziaŭčynaj u jaho nie było.
U hetaj historyi źviarnuła na siabie ŭvahu charaktarystyka mužčyna jak «inceła». Što heta značyć?
Źjaŭleńnie termina
Termin «inceł» pachodzić ad anhlijskaj abrevijatury incel, jakaja aznačaje «niadobraachvotny celibat (ustrymańnie ad seksu)» (involuntary celibates). Ličycca, što hety termin prydumała žycharka Kanady Ałana ŭ 1997 hodzie, jakaja viała błoh ab svaim dośviedzie žyćcia biez šlubu i seksu pad nazvaj «Involuntary celibates».
Da incełaŭ dziaŭčyna adniesła ludziej, jakija nikoli nie byli ŭ adnosinach i byli niespraktykavanyja ŭ znajomstvach, bo ličyli, što im pieraškadžajuć niaśmieły charaktar ci fizičnaja niepryvabnaść.
Inceły i fiemceły
Ź ciaham času hety termin raspaŭsiudziŭsia siarod anłajn-aŭdytoryi. Incełami stali nazyvać siabie hieteraseksualnyja mužčyny, jakija ličać, što nie mohuć znajści seksualnaha partniora ad taho, što žančyny nie źviartajuć na ich uvahi, nie ličać ich vartymi.
Pryčynu niaŭdač z supraćlehłym połam jany tłumačać asablivaściami svajho vyhladu i aryjentacyjaj žančyn na «alfa-samcoŭ». Inceły miarkujuć, što ŭ sučasnym hramadstvie pryjarytyzujuć patreby i pieravahi žančyn, a nie mužčyn.
Inceły prasoŭvajuć ideju ab pazbaŭleńni žančyn prava admaŭlać mužčynam u intymnaj suviazi.
Praź niekatory čas źjaviŭsia termin «fiemceł» dla charaktarystyki žančyn, jakija ličać siabie niazdolnymi mieć adnosiny z supraćlehłym połam z-za svajho vyhladu, a taksama z-za raspaŭsiudžanaha ŭ hramadstvie kultu peŭnaha typu žanočaj pryhažości, u vyniku jakoha na «niepryhožych žančyn» mužčyny ŭvahi nie źviartajuć.
Inceły i fiemceły, jak zaŭvažajuć śpiecyjalisty, choć i majuć adnolkavaje žadańnie być u adnosinach, pa-roznamu zmahajucca z adzinotaj. Mužčyny vybirajuć ahresiŭny styl pavodzin adnosna supraćlehłaha połu i niaredka ŭžyvajuć hvałt.
Ahresija incełaŭ
Viadoma jak minimum čatyry vypadki masavych zabojstvaŭ u ZŠA, učynienych mužčynami, što samaidentyfikavali siabie jak inceły. Najbolš hučny adbyŭsia ŭ 2014 hodzie, kali student Elijat Rodžer ździejśniŭ šerah napadaŭ u Ajła-Viście (Kalifornija), u vyniku jakich zahinuła šeść čałaviek i čatyrnaccać atrymali ranieńni. Paśla student zabiŭ siabie.
Pierad napadami Rodžer apublikavaŭ na YouTube videa, dzie vykazaŭ svoj namier «pakarać» žančyn za adsutnaść cikavaści da jaho, a zaadno i mužčyn, na jakich hetyja žančyny zapadajuć. Pierad złačynstvam chłopiec adpraviŭ elektronny list z manifiestam na 137 staronak, dzie apisaŭ svajo žyćcio cnatliŭca-izhoja.
Inceły ŭ Biełarusi
Da manifiesta Rodžera adsyłaŭ u svaim filmie «Biełaruski psichapat», źniatym u 2015 hodzie, režysior Mikita Łaŭrecki. U apisańni hetaha artchaŭsnaha filma paznačałasia: «Što budzie, kali na adnoj dačy pakinuć inceła-psichapata i troch małaznajomych žančyn? Volny pieranos na biełaruskuju hlebu manifiesta amierykanskaha masavaha strałka Elijata Rodžera».
Na jutub-kanale Padniabiesnaha raźmieščany niekalki videa razmovaŭ z žycharom Biełarusi Alaksandram Šabunievičam (prynamsi, tak mužčyna byŭ padpisany na adnym ź videa). Jany zapisany kala troch hadoŭ tamu i majuć nazvu «Biełaruski inceł».
Słova «inceł» viadoma i biełaruskaj prapahandzie, jakaja stavić pradstaŭnikoŭ hetaj subkultury ŭ adzin šerah z čajłdfry, piedafiłami i bojłavierami. Naŭrad ci jany, adnak, da kanca razumiejuć, pra kaho i pra što havorać. Chutčej, jany pracujuć na strachach starejšaj častki hramadstva pierad usimi novymi paniaćciami.
Žančynanienaviśnictva isnavała zaŭsiody, choć było vyklikanaje roznymi pryčynami i prymała roznyja formy. Inceły — prosta novaja jaho varyjacyja, sparodžanaja sučasnymi jeŭrapiejskim i amierykanskim hramadstvam, u jakim žančyny stali bolš samastojnymi, a šluby i partniorstvy čaściej zaklučajucca pa kachańni, a nie pa raźliku ci ŭ vyniku damoŭlenaści siamiej. U kožnym razie, kankurencyju ŭ baraćbie za samak i samcoŭ pryroda jašče nie admianiła, navat u čałaviečaj papulacyi. I hetaja kankurencyja ŭsio ž stymuluje čałavieka rabicca lepšym i pracavać nad saboj.
Kamientary