Chto taki błohier-kanśpirołah Virus, jaki štodnia abražaje i plažyć biełaruski demakratyčny ruch?
Ź jakoj siamji jon pachodzić, jakija try sudzimaści maje, čamu nienavidzić Śviatłanu Cichanoŭskuju i za što pavažaje Volhu Karač? Składajem partret Vitala Kandracienki.
«*** — heta prarasijski vyradak, jaki vyrašyŭ, što pierafarbavaŭsia, ale jakim byŭ, takim i zastaŭsia». «Słabo padyści da *** i skazać: jakaja ž ty suka». «Nu ty i vylizaŭ joj, ***! Admirał hłybokaha mora byrła, jakoje ty ŭžyvaješ».
Što heta za nabor chamstva? Heta advolnaja padborka cytat z telehram-kanała apazicyjnaha błohiera-kanśpirołaha Vitala «Virusa» Kandracienki, uziataja za adzin dzień. Pryčym zamiest zoračak možna padstaŭlać imia luboha pradstaŭnika demakratyčnych siłaŭ i miedyja. Z łukašencaŭcami Virus vajuje epizadyčna, a voś hienieratar chłuśni, abrazaŭ i ahresii ŭ bok apazicyi pracuje štodnia, bieź pierapynkaŭ i vychodnych.
Chto taki hety Vital Kandracienka, adkul uziaŭsia i ŭ čym jaho fienomien? Davajcie raźbiracca.
U čym niebiaśpieka Virusa?
Kolkaść padpisčykaŭ Virusa nasamreč mizernaja. U telehramie na jaho kanśpirałahičnyja razvahi padpisanyja 1667 akaŭntaŭ, u siarednim kožnuju publikacyju čytajuć usiaho 635 čałaviek.
U jutubie situacyja nie lepšaja — ź piaci strymaŭ za apošni miesiac tolki adzin nabraŭ bolš za 1000 prahladaŭ, astatnija zastajucca nižej navat za hetuju nievysokuju płanku.
Ale Kandracienka stanovicca krynicaj dla rasijskich ŚMI, jakija raznosiać jaho kanśpirałahičnyja teoryi. Dla kahości ź ich heta asensavanaja praca suprać demakratyčnaha ruchu Biełarusi, dla kahości prosta pošuk tannych psieŭdasiensacyj.
Aproč taho, jaho dopisy raspaŭsiudžvaje sietka ananimnych kanałaŭ, stvoranych dla dyskredytacyi dziejnaści demakratyčnych siłaŭ. Jak i Virus, jany nie zmahajucca z Łukašenkam, a sprabujuć pierachapić uładu ŭnutry apazicyi.
Zdarajucca i zusim aburalnyja vypadki, kali błohier chvalicca «insajdami» — i apubličvaje infarmacyju z napaŭzakrytych kanfierencyj, padvodziačy pad represii ludziej unutry Biełarusi.
Dźvie asnoŭnyja kanśpirałahičnyja teoryi Virusa
Za apošni hod błohier staraŭsia raskrucić niekalki asnoŭnych historyj.
Maci Valera Kavaleŭskaha, byłoha «ministra zamiežnych spraŭ» Cichanoŭskaj, mieła rasijskaje hramadzianstva i rabiła biznes u Rasii — heta fakt. Ale z hetaha Virus robić biezapielacyjnuju vysnovu, što Kavaleŭski — rasijski ahient.
Nastupnaja historyja — pra cieścia suzasnavalnika inicyjatyvy By_help Alaksieja Lavončyka. U žonki Lavončyka jość ajčym, Siarhiej Bakłahin. Jon pracavaŭ namieśnikam načalnika adździeła ŭ Radzie biaśpieki, a paśla zajmaŭ pasadu načalnika ŭpraŭleńnia ŭ Kiraŭnictvie spraŭ Łukašenki. Lavončyk zapeŭnivaje, što nie kamunikuje ź cieściem z 2015 hoda — i dokazaŭ advarotnamu apublikavana nie było.
U Virusa ž łohika inšaja. Jon zapeŭnivaje, što toj cieść Bakłahin — pravaja ruka Łukašenki. I maŭlaŭ, praz hetaha cieścia Lavončyk i Andrej Stryžak źlivajuć biełaruskim śpiecsłužbam udzielnikaŭ pratestu. Nie vyvoziać ź Biełarusi i akazvajuć dapamohu — a źlivajuć. Dokazaŭ — iznoŭ nijakich.
Čamu my pierakazvajem hetyja dziŭnyja abvinavačvańni? Bo jany vydatna ilustrujuć asobu samoha Kandracienki.
Kali padsumavać łohiku błohiera, to atrymlivajecca tak: kali ŭ čałavieka maci z Rasii, to jon rasijski ahient, a kali jaho baćka pracuje ź biełaruskimi siłavikami, to jon jašče i łukašenkaŭski ahient. Dobra, niachaj tak, a što ŭ samoha Kandracienki ź bijahrafijaj?
U biełaruskaj pašpartnaj bazie paznačana, što baćka Virusa — 60-hadovy padpałkoŭnik u adstaŭcy Valeryj Kandracienka. Vučyŭsia ŭ rasijskim Sierpuchavie, słužyŭ u štabie 15-j zienitna-rakietnaj bryhady Paŭnočna-Zachodniaha apieratyŭna-taktyčnaha kamandavańnia Vajenna-pavietranych sił i vojskaŭ supraćpavietranaj abarony. A paśla pracavaŭ načalnikam słužby ŭ Ministerstvie abarony. Kali vyjšaŭ na piensiju, to ŭładkavaŭsia ŭ «Ahat» — hałoŭnaje pradpryjemstva vajskova-pramysłovaha kompleksu Biełarusi, jakoje vykonvaje zakazy dla rasijskaj vajennaj mašyny. Jašče pracavaŭ u rasijskaj kampanii «Altchevien Technoładžy» z karaniami ŭ afšornym Bielizie, a taksama na pradpryjemstvie «Atamtech».
Dla paŭnaty karciny zhadajem i pra maci Virusa. 58-hadovaja miedsiastra Łarysa Kandracienka (Byčkova) pachodzić z rasijskaha Sierpuchava, ale ciapier maje biełaruskaje hramadzianstva.
Ci pavinny my rabić vysnovu, što za košt miesca pracy i pachodžańnia baćkoŭ Virus — rasijski i prałukašenkaŭski ahient?
Što rabiŭ Vital Kandracienka da 2020?
Jašče adna pryncypovaja pretenzija Kandracienki da pradstaŭnikoŭ ciapierašniaj apazicyi — toje, što šmat chto ź ich da 2020 nijak nie ŭdzielničaŭ u demakratyčnym ruchu. Tak i jość, i Pavieł Łatuška, i Valer Capkała, i Alaksandr Azaraŭ šmat hadoŭ pracavali na dziaržaŭnaj słužbie, pakul tysiačy aktyvistaŭ apazicyi atrymlivali štrafy, sutki i terminy.
Ale i Vitala Kandracienku nijak nie znojdzieš siarod daŭnich apazicyjanieraŭ. Čym zajmaŭsia jon?
Vyšejšaj adukacyi ŭ Kandracienki niama, skončyŭ tolki PTV. Kolkaść jaho miescaŭ pracy vielizarnaja, jon sprabavaŭ siabie ŭ roznych śfierach: i na fabrycy pa vyrabie miedycynskich vyrabaŭ, i na ramontnym zavodzie, i na budoŭli mastoŭ, i ŭ piceryi. Urešcie aformiŭ IP jak fatohraf, pracavaŭ u parku.
Što jašče dakładna jość u jaho bijahrafii, dyk heta try sudzimaści — dźvie za kradziažy i adna za ŭchileńnie ad pakarańnia. Palityčnaha padtekstu tut nie znojdzieš.
- Častka 1 artykuła 205 KK Biełarusi. 19 sakavika 2004 hoda ździejśniŭ kradziež na sumu 90 tysiač rubloŭ (niedenaminavanyja rubli).
- Častka 1 artykuła 205 KK Biełarusi. 11 śniežnia 2005 pa praśpiekcie Niezaležnaści 157-** u Minsku skraŭ u K.Francava 600 tysiač rubloŭ (niedenaminavanyja rubli).
- Artykuł 416 KK Biełarusi — uchileńnie ad adbyvańnia vypraŭlenčych prac.
Pačatak palityčnaj aktyŭnaści
Ruch za pieramieny, jaki vykryštalizavaŭsia ŭ 2020 hodzie, achapiŭ ludziej samych roznych prafiesij i roznaha sacyjalnaha statusu. U viry padziej apynuŭsia i Vital Kandracienka.
Jon byŭ prychilnikam błohiera Uładzimira Cyhanoviča — MozgON'a, jaki ciapier adbyvaje 16-hadovy termin za «arhanizacyju pratestaŭ». MozgON i paznajomiŭ jaho ź Siarhiejem Cichanoŭskim.
Vopytny palityk Mikoła Statkievič prydumaŭ stratehiju «kandydataŭ pratestu» — kab jak maha bolš aktyvistaŭ zarehistravalisia pretendentami ŭ prezidenty i atrymała mahčymaści ładzić lehalnyja pratesnyja akcyi. Kožnamu ź ich byli patrebnyja siabry inicyjatyŭnaj hrupy. I voś Kandracienka zapisaŭsia ŭ hrupu Siarhieja Cichanoŭskaha. Kali ž błohiera nie zarehistravali, jaho śpis prychilnikaŭ addali ŭ Centrvybarkam jak śpis inicyjatyŭnaj hrupy jaho žonki, Śviatłany Cichanoŭskaj.
Tak Kandracienka staŭ zborščykam podpisaŭ za Cichanoŭskuju — jakuju ciapier nienavidzić i ličyć zdradnicaj i ahientkaj ruskaha śvietu.
Pieršasnaja kamanda Cichanoŭskaj była małalikaj, ludzi nie mieli nijakaha palityčnaha i vybarčaha dośviedu. Naprykład, u pieršy dzień zboru podpisaŭ na Kamaroŭcy ŭ Minsku, kali ŭtvarylisia čerhi achvotnych padpisacca za Cichanoŭskuju, usich ludziej zapisvali na adzin arkuš — choć pa zakonie tak rabić nielha. Žychary Frunzienskaha rajona zapisvajucca asobna, Maskoŭskaha asobna — bo hetyja śpisy treba budzie zdavać u adpaviednyja rajonnyja administracyi. A kamanda Cichanoŭskaj, nabranaja z entuzijastaŭ, spačatku hetaha prosta nie viedała.
Kandracienku tady navat pastavili kaardynataram zboru pa Minskaj vobłaści. Jon adznačaje, što byŭ adkaznym jašče i za piać rajonaŭ Minska. U niekatorych takich ža kaardynataraŭ podpisy adbirała milicyja. A voś Kandracienka zdoleŭ zachavać papiery ŭ svajoj zdymnaj kvatery.
Vyjezd ź Biełarusi
Ciapier Kandracienka abvinavačvaje palitykaŭ za toje, što jany abrali bieśpierśpiektyŭny mirny šlach baraćby z Łukašenkam, i nastojvaje na siłavym zmahańni. Sam ža jon źjechaŭ ź Biełarusi paśla taho, jak jamu stała pahražać pieršaja administratyŭka.
6 červienia 2020 hoda padčas zboru podpisaŭ u Horkach adbyŭsia incydent. Milicejski pravakatar začapiŭ Kandracienku aŭtamabilem, toj vyklikaŭ DAI, ale siłaviki zrabili vinavatym mienavita Kandracienku — maŭlaŭ, jon zrabiŭ iłžyvuju zajavu.
Za heta jamu mahli prysudzić štraf ci adpravić na 15 sutak. Kab nie iści ŭ milicyju, 19 červienia 2020 hoda, u apošni dzień zboru podpisaŭ, Kandracienka źjechaŭ va Ukrainu.
Jon raskazvaje ŭ intervju, što prydumaŭ aryhinalnuju schiemu —źjechaŭ na niejtralnuju pałasu Biełarusi i Ukrainy, a paśla viarnuŭsia ŭ Biełaruś, kab dva tydni lehalna siadzieć u karancinie i nie iści ŭ milicyju. «Ale potym mianie znoŭ pačali čapać, ja zrazumieŭ, što heta kaput i ź mianie nie źlezuć. Tamu ŭ lipieni źjechaŭ va Ukrainu», — raskazvaŭ Kandracienka «Našaj Nivie».
Vypiski z pamiežnych bazaŭ abviarhajuć jaho słovy. Kandracienka źjechaŭ ź Biełarusi 19 červienia 2020 hoda i bolš nie viartaŭsia. Tamu navat u mirnych pratestach jon nie ŭdzielničaŭ, nie kažučy ŭžo pra niejki ŭzbrojeny supraciŭ, da jakoha zaklikaje.
Praca na radyjo
Za miažoj Vital Kandracienka staŭ viadučym Radyjo-97 razam z Maksam Morysanam. Radyjo-97 — jutub-prajekt z razmovami pra palityku. Nie skazać, kab hetyja efiry adrazu zdabyli šalonuju papularnaść, ale ŭ toj čas stvarałasia bieźlič roznych amatarskich prajektaŭ i kala kožnaha hurtavałasia jakaja-nijakaja aŭdytoryja. Stvaralniki atrymlivali danaty ad słuchačoŭ, a taksama źviartalisia pa finansavuju dapamohu ŭ roznyja arhanizacyi.
Kandracienka kazaŭ, što kamandzie Radyjo-97 tady mocna dapamahaŭ «Naš Dom» Volhi Karač. Heta pradvyznačyła jaho palityčnuju pazicyju na hady napierad. Jon źmiešvaje z brudam amal usich astatnich palitykaŭ, a da Volhi Karač stavicca z pavahaj.
Kryŭda na Cichanoŭskuju
Pa słovach znajomych Kandracienki, u toj čas — vosień 2020 hoda — u jaho sfarmiravałasia śmiarotnaja kryŭda na Śviatłanu Cichanoŭskuju i pieradusim na jaje Ofis.
Pieršasnaja kamanda Cichanoŭskaj — tyja amatary, jakija dastalisia joj ad Siarhieja Cichanoŭskaha i źbirali za jaje podpisy, — faktyčna razvaliłasia. Niechta ź ich byŭ aryštavany ŭ Biełarusi jašče pierad vybarami, niechta akazaŭsia adarvany terytaryjalna — apynuŭsia nie ŭ Litvie, a ŭ inšych krainach. I tolki adzinki zmahli znajści parazumieńnie z palitykami, jakija zhurtavalisia vakoł Cichanoŭskaj i ŭtvaryli jaje novuju kamandu.
Tamu asnoŭny ŭdar Kandracienka i sprabuje nanieści pa atačeńni Cichanoŭskaj. Hałoŭnyja vorahi — Franak Viačorka, Anatol Labiedźka, Alaksandr Dabravolski, Valer Kavaleŭski (choć užo i zvolniŭsia), Alina Koŭšyk.
U kancy 2020 hoda Kandracienka jašče siabravaŭ z kolišniaj kiraŭnicaj štaba Cichanoŭskaj Maryjaj Maroz (jakuju ciapier taksama ličyć svaim voraham), jaho bačyli i ŭ Ofisie. Ale ŭ kamandy Cichanoŭskaj užo tady było šmat pytańniaŭ i niedavieru — tak, Virus nibyta aktyŭny, ale nichto nie razumieŭ, adkul jon uziaŭsia, što ŭ jaho za bekhraŭnd.
Pa słovach znajomych Kandracienki, jon pierakanany ŭ svaich unikalnych analityčnych zdolnaściach i zasmučany, što palityki zajmajuć miesca, jakoje musiła b naležać jamu.
Vybar palityčnaj pazicyi
U mai 2021 hoda viadučyja Radyjo-97 pierasvarylisia, i Kandracienka adpraviŭsia ŭ svabodnaje płavańnie. Błohier stvaryŭ padobny prajekt — «Aściarožna, Virus», tolki ciapier pracavaŭ u adzinočku. Ź ciaham času prajekt byŭ pierajmienavany ŭ «Fieniks».
Padziei 2021 hoda padajucca nadzvyčaj dalokimi, choć z taho času prajšło ŭsiaho try hady. Mahčyma, šmat chto ŭžo nie ŭzhadaje, ale tady siarod mnohich prychilnikaŭ apazicyi byli modnymi razmovy pra toje, što ŭładu ŭ Biełarusi treba brać siłaj. Maŭlaŭ, Cichanoŭskaja sa svaim mirnym pratestam ničoha nie pakazała, tamu treba pierachoplivać u jaje inicyjatyvu.
Volha Karač ź Iharam Makaram rychtavałasia da Dnia Ch, Juraś Ziańkovič i Alaksandr Fiaduta damaŭlalisia ź siłavikami, a tajamničy Dys z Hiermanii stvaraŭ atrady samaabarony, jakija pavinny ździajśniać dyviersii na terytoryi Biełarusi.
Heta paśla stała zrazumieła, što Dzień Ch Volhi Karač tak i nie nadyšoŭ, Ziańkoviča raźviali śpiecsłužbisty, jany ž byli infiltravanyja i ŭ atrady samaabarony. A Dys raptoŭna źnik u nieviadomym kirunku, bolš jaho nichto nie bačyŭ.
I voś u hetaj palityčnaj baraćbie Virus-Kandracienka — jaki, nahadajem, źjechaŭ ź Biełarusi pad pahrozaj pieršaj administratyŭki, — rašuča padtrymaŭ kaalicyju prychilnikaŭ prymianieńnia siły. Tady jaho razychodžańnie z pohladami Ofisa Cichanoŭskaj adbyłosia kančatkova.
Admietna, što kali prahartać kanał «Aściarožna, Virus» za siaredzinu 2021 hoda, to navinaŭ pra poŭny razhrom usich hetych atradaŭ samaabarony, našpihavanych kadebešnikami, nie pabačyš zusim. Jak i zvyčajna ŭ takich vypadkach, pra svaje pamyłki jon starajecca nie ŭzhadvać. Prosta robić vyhlad, što ničoha takoha nie adbyłosia.
Chto siabry, a chto vorahi dla Virusa?
Da kaho ž z palitykaŭ i palityčnych inicyjatyŭ Vital Kandracienka stavicca z pavahaj? Nasamreč śpis skłaści niaprosta. Amal usie — vorahi. Pra Cichanoŭskuju i Viačorku nie varta i zhadvać, tut usio zrazumieła. Łatuška — vorah. Prakopjeŭ ź Jahoravym i Knyrovičam — vorahi, Bajpoły i Biełpoły — vorahi. «Viasna» i asabista Bialacki — vorahi. Stryžak — uvohule stvareńnie ź piekła.
Toje samaje možna pračytać i pra Babaryku z Kaleśnikavaj. Pryčym Kandracienka miesiac za miesiacam zaciata pierakonvaje, što Łukašenka voś-voś adpuścić Kaleśnikavu, kab jana praciahvała znutry źniščać pratest. Naturalna, prahnoz nijak nie spraŭdžvajecca.
Varta zhadać i ŚMI. Kandracienka nienavidzić nie tolki «Našu Nivu», ale i «Lusterka», i «Biełsat», i «Svabodu», i «Jeŭraradyjo», i «Reform», i inšych — usie demakratyčnyja miedyja.
I heta nie prosta krytyka. Heta dziciačaje pierakryŭlivańnie imionaŭ i proźviščaŭ, ździeki z vyhladu apanientaŭ, tualetnyja albo seksualnyja namioki. «Heta žyvioły — nie ludzi, niama čaho ich čałaviečymi imionami nazyvać, jany dziela babła hatovyja ŭsich zdradzić», — tłumačyć Virus.
Uzrovień dyskusii ci abmierkavańnia całkam supadaje sa stylistykaj Ryhora Azaronka. Pryčym jakraz Azaronka Kandracienka amal nie zaŭvažaje.
«Zaraz dla mianie jość tolki ŠOS, «Supraciŭ», Zianon», — pisaŭ Kandracienka ŭ 2021 hodzie.
ŠOS (Štab abjadnanaha supracivu) — abjadnańnie palitykaŭ-adzinočak, siarod jakich samymi paznavalnymi byli Volha Karač i Dźmitryj Ščyhielski. Inšyja imiony mała što kažuć navat prychilnikam pieramienaŭ: Anton Małkin, Michaił Kučaraŭ, Viera Chortan i inšyja.
U «Supraciŭ» uvachodzili «Kibierpartyzany», «Družyny Narodnaj Samaabarony» i inicyjatyva «Busły laciać». Aktyvisty «Busłoŭ», jakija pravodzili partyzanskija akcyi — paškodzili sistemu videanazirańnia, psavali aŭtamabili sudździaŭ i prapahandystaŭ, — byli aryštavanyja i atrymali vielizarnyja terminy — až da 15 hadoŭ źniavoleńnia. Jany pryznanyja palitviaźniami.
Niejki čas Kandracienka sapraŭdy ledź nie maliŭsia na Zianona Paźniaka, ale ŭrešcie zapisaŭ u vorahi i jaho.
A voś Dźmitryja Bałkunca spačatku zaciata krytykavaŭ, bo ličyŭ prarasijskim, a ciapier daravaŭ jamu rasijskaje minułaje: «Mnie žyć nie pieraškadžaje. Choć repościć, i na hetym dziakuj».
Byŭ hatovy zapluščvać vočy i na łukašenkaŭskaje minułaje Valeryja Capkały — bo ŭsprymaŭ jaho jak situatyŭnaha sajuźnika pa baraćbie ź Cichanoŭskaj.
I jašče Siamion Šarecki. Kandracienka pavažaje byłoha śpikiera Viarchoŭnaha Savieta Biełarusi i pierastaŭlaje ŭsie jaho prahramnyja artykuły. Šarecki, nahadajem, emihravaŭ u ZŠA ŭ pačatku 2000-ch.
Kanśpirałahičnaja analityka
Kali raniej Virus prosta pierapoščvaŭ u svoj kanał naviny z usich mahčymych niezaležnych miedyja, to paśla jon staŭ dadavać ułasnuju analityku — pieravažna heta byli nie padmacavanyja ničym kanśpirałahičnyja teoryi.
U navinach pieryjadyčna paviedamlajuć pra zatrymańni administrataraŭ čataŭ dyjaspar. Ludzi, jaki nie ažyćciaŭlali nijakaj palityčnaj dziejnaści, zajazdžajuć u Biełaruś — i ich aryštoŭvajuć, bo čaty abvieščanyja «ekstremisckimi farmiravańniami». Zdavałasia b, da jakoj vysnovy možna było pryjści?
Virus pierakonvaje svaju aŭdytoryju, što heta łukašenkaŭskija śpiecsłužby adklikajuć svaich ahientaŭ nazad: «Bolšaść adminaŭ — pacuki, za vyklučeńniem niekatorych, ale ich adzinki».
U pačatku 2010-ch u «Svobodnych novostiach plus» — tady aficyjna zarehistravanaj niezaležnaj haziecie, jakaja była zakrytaja paśla 2020 hoda — publikavalisia hutarki viadomaha žurnalista Źmitra Łukašuka z roznymi hierojami. Naturalna, kožny vypusk haziety traplaŭ u biblijateki. I voś ciapier Kandracienka patrapiŭ na sajt Prezidenckaj biblijateki Biełarusi i znajšoŭ tam u katałohu staryja artykuły «Svobodnych novostiej».
«Łukašuk — čysta łukašyscki žurnalist. Jak heta dakazvajecca? Dy na raz-dva. Tamu što ŭ adkrytym dostupie Łukašukom by ŭ Prezidenckaj biblijatecy nie pachła ŭ katałohach. Było b, naprykład, u zakrytych biblijatekach adpaviednych arhanizacyj. Ale nie tak adkryta. [Značyć], Łukašuk tysiačy razoŭ byŭ dazvoleny i tysiačy razoŭ pravierany chuntaj», — robić vysnovu kanśpirołah. Nie razumiejučy — abo śviadoma zamoŭčvajučy, što hetaksama ŭ katałohu možna znajści lubyja artykuły aficyjna zarehistravanych haziet.
Što jašče? Naprykład, błohier sumniajecca, što Maksim Znak, Maryja Kaleśnikava i Viktar Babaryka ŭvohule znachodziacca za kratami. «A kali i siadziać, to ŭ vielmi dobrych umovach», — pierakanany jon. Dokazaŭ hetamu naturalna niama i nie moža być. Inšyja palitviaźni bačyli ich za kratami, ich utrymlivajuć u hranična ciažkich umovach.
Adno z «rasśledavańniaŭ» Virusa było pryśviečana byłomu palitviaźniu Alehu Kulešu i jaho siamji. Čym błohier upikaje ŭdzielnika pratestaŭ?
Naprykład, tym, što jaho brat uznačalvaje haspadarku ŭ Pružanskim rajonie. Ale kim Virus ličyć hetaha dyrektara kałhasa? «Hałoŭny łukašyscki ideołah Pružanaŭ», — paviedamlaje Kandracienka svaim padpisčykam.
Hałoŭny ideołah — načalnik adździeła ideałahičnaj pracy rajvykankama, ale pryčym tut brat Kulešy, kali jon zajmaje absalutna inšuju pasadu? Pryčyna ŭ tym, što niekali raniej toj byŭ druhim sakratarom rajonnaha BRSM. Ale ŭ fantazijach Virusa heta adno i toje ž.
«Čarhovy svajačok — Vadzim Anatoljevič Kuleša. Mamant savieckaj i rasijskaj palityki 1990-ch». Jak vyśviatlajecca, dzied hetaha Vadzima Kulešy ŭ 1915 hodzie padčas vajny źjechaŭ z Pružanaŭ na ŭschod, u Rasiju, i nikoli nie viartaŭsia ŭ Biełaruś. Niama navat nijakaha namioku na svajactva, prosta adnolkavaje proźvišča. Ale dla Virusa heta nie maje značeńnie. Kali toj Kuleša i hety Kuleša — značyć, svajaki!
Kandracienka hanarycca takimi rasśledavańniami i ździŭlajecca, što nichto nie choča ich repościć.
«Matolka napisaŭ danos na Palčysa»
Adnak dla farmulavańnia hłybokich kanśpirałahičnych teoryj usio ž treba mieć jakuju-nijakuju erudycyju, a hetaha Kandracienku časta brakuje. Jon pryjšoŭ u apazicyju tolki ŭ 2020 hodzie, tamu prapuściŭ tyja pracesy, što adbyvalisia raniej. U vyniku jahonyja razvahi vyhladajuć prymityŭnymi i dyletanckimi, ale jon sam hetaha nie zaŭvažaje.
Voś niekalki prykładaŭ.
Luty 2022 hoda, refierendum. Śviatłana Cichanoŭskaja zaklikaje pryjści na ŭčastki ŭ 14:00.
Virus piša: «Raman Pratasievič kaža, što na ŭčastkach dla hałasavańnia z 14.00 da 16.00 pierapynak! Uspomnicie, u kolki štab kliča adeptaŭ? Pravilna! U 14.00! Heta chunta rychtuje 2 hadziny sabie na začystku? Uvohule, mnie cikava, čamu štab da hetaha času nie pamianiaŭ svaju niedataktyku, abo im prosta nas*ać na ludziej?»
Kali čałaviek choć trochi raźbirajecca ŭ biełaruskaj palityčnaj sistemie, to viedaje, što pierapynak byvaje ŭ dni daterminovaha hałasavańnia (ciapier jaho admianili). A ŭ asnoŭny dzień nijakaha abiedu ŭ pryncypie niama.
A voś jašče adna historyja. U 2018 hodzie Anton Matolka napisaŭ zvarot u KDB, adpraviŭšy im spasyłku na antykarupcyjnaje rasśledavańnie Eduarda Palčysa pra Kurapaty na sajcie 1863x.
Kali Kandracienka daviedaŭsia pra heta, ubačyŭšy zvarot va ŭzłamanaj bazie Kibierpartyzanaŭ, jon pryjšoŭ da vysnovy:
«Heta značyć, *** užo nie chavajecca, što pisaŭ zvaroty ŭ KDB. Samaje hałoŭnaje ŭ danosie Antona Matolki mienavita toje, što artykuł byŭ napisaŭ inkohnita, a Antoša źliŭ, što aŭtaram artykuła źjaŭlajecca mienavita Palčys. I hałoŭnaje, hladzicie, radavaŭsia tamu, što źliŭ apanienta. Matolka žyvie prypiavajučy, Palčys siadzić».
U 2018 hodzie Palčys i Matolka byli arhanizatarami śviatkavańnia stahodździa BNR, jany nie byli apanientami. Dy i Palčys nijak nie chavaŭ na toj momant, što mienavita jon viadzie sajt 1863x. Ale dla Virusa heta niavažna — dla jaho važniej ukinuć chłuśniu, spadziejučysia, što nichto nie budzie raźbiracca ŭ joj.
Prahnozy i insajdy
Kali ž Virus daje prahnozy, atrymlivajecca nie lepš. Havorka nie pra abstraktnyja razvahi, naprykład, pra toje, što Biełaruś rana ci pozna moža pajści na zbližeńnie z Zachadam. A pra situacyi, kali Kandracienka sprabuje sfarmulavać niešta kankretnaje na blizkuju pierśpiektyvu.
Jak zvyčajna i adbyvajecca ŭ takich vypadkach, pra 80% niaspraŭdžanych prahnozaŭ jon bolš i nie ŭzhadvaje. Zatoje pra tyja 20%, što ŭdałosia ŭhadać — chacia b prosta pa teoryi imaviernaści, — jon budzie z pafasam nahadvać raz za razam.
Kastryčnik 2023: «Siabry, ad čatyroch krynic, jakija nikoli nie padvodzili, u mianie jość dakładnaja infarmacyja: užo ŭ 2025 hodzie Franak [Viačorka] budzie ŭdzielničać u prezidenckich vybarach jak…. kandydat ad abjadnanych apazicyjnych sił. Jon vierniecca ŭ Biełaruś i trapić pad amnistyju».
Taki absurd navat kamientavać składana, ale, viartajučysia da raniejšaha tezisu pra adsutnaść erudycyi Virusa, udakładnim, što na momant vybaraŭ Viačorku budzie 36-37 hadoŭ. A ŭ abnoŭlenaj Kanstytucyi prapisana, što kandydatu pavinna być minimum 40 hadoŭ.
Śniežań 2023: «Cichanoŭskaja abvieścić [Illu] Panamarova lidaram rasijskich demakratyčnych siłaŭ, Panamaroŭ u adkaz pryznaje jaje lehitymnaść». Niešta takoje adbyłosia? Naturalna, nie.
Jość i zusim śviežaja analityka. U razmovie sa svaimi padpisčykami Kandracienka prahnazuje, što Łukašenka moža pajści va-bank i ŭ 2025 hodzie arhanizavać sumlennyja vybary z usimi naziralnikami. A kali i budzie ŭdzielničać u vybarach, to naminalna. Praz paŭhoda možna budzie čarhovy raz pravieryć hłybiniu analityki pakryŭdžanaha na ŭsich błohiera.
Ahient ci nie ahient?
Ciapier Vital «Virus» Kandracienka žyvie va Ukrainie. Najchutčej, što ŭ adnosna mirnym Užharadzie. Na jakija hrošy? Jakija-nijakija sumy atrymlivaje ad hledačoŭ padčas strymaŭ, ale vyhladaje, što hrošy tam źbirajucca minimalnyja.
Admietna, što kali pačałasia vajna, Kandracienka, zaciaty prychilnik siłavoha zmahańnia z łukašenkaŭskaj i pucinskaj dyktaturami, nijak nie vykazaŭ žadańnia asabista dałučycca da supracivu. Zatoje časam abviaščaje zbory na dapamohu ŭkrainskim vajskoŭcam.
Sprabuje aformić sabie šenhienskuju vizu — ale marna, Polšča nie choča bačyć Kandracienku ŭ siabie.
Kali čałaviek pavodzić siabie jak ahient i pravakatar, to jość vialikaja spakusa i ličyć jaho ahientam i pravakataram na zadańni. Ale ci moža być takoje, što heta nie płatnaja dziejnaść na raźjadnańnie pratestu i dyskredytacyju ŭsich demakratyčnych siłaŭ, a prosta śpiecyfičnaje bačańnie śvietu? Ničoha vyklučać nielha.
Telehram-kanał Vitala Kandracienki abvieščany ŭ Biełarusi «ekstremisckim farmavańniem», tamu daroha na radzimu jamu jak minimum farmalna zakrytaja. Dakumientavanych dokazaŭ jaho pracy na łukašenkaŭskija śpiecsłužby niama. Dakładnyja adkazy na pytańnie, ci ahient jon, źjaviacca tolki tady, kali adkryjucca archivy łukašenkaŭskaha KDB.
Kamientary