Da 15 tysiač za ramont. Što z aŭto, zatoplenymi padčas mocnaj zalevy ŭ Minsku?
Zaleva, jakaja abrynułasia na Minsk 18 lipienia, stała samaj mocnaj za ŭsiu historyju mieteanazirańniaŭ. Mnohija aŭtaŭładalniki, čyje mašyny zatapiła, užo paśpieli źviarnucca na STA i pačuć niejkija vierdykty. Chtości pajšoŭ pa kampiensacyju ŭ strachavyja kampanii, astatnim, padobna, daviadziecca samastojna spraŭlacca ź niespadziavanymi vydatkami. I paradak ličbaŭ pałochaje, piša «Anłajnier».
Parkinh kavorkinha Campus. Z 14 mašyn tolki adna była na kaska
Spačatku padrabiaznaści ab nastupstvach zatapleńnia parkinha kavorkinha Campus, raźmieščanaha pablizu pierasiačeńnia vulic Jakuba Kołasa i Vałhahradskaj.
U Biełaruskaj asacyjacyi strachoŭščykaŭ paviedamili: z 14 mašyn, jakija znachodzilisia na parkinhu i byli zatoplenyja tam u toj dzień, tolki ŭ adnaho aŭtamabila było aformlenaje kaska. Adpaviedna, tolki adzin aŭtaŭładalnik moža raźličvać na strachavyja vypłaty. I voś u hetym vypadku razhladajecca pytańnie ab kampiensacyi tatalnaj straty, to-bok mašynu mohuć pryznać zahinułaj. Heta nie aznačaje, što jaje ŭ teoryi niemahčyma adnavić, ale namahańni i vydatki na takoje adnaŭleńnie aceńvajucca śpiecyjalistami jak niemetazhodnyja.
Možna zrabić adpaviednyja vysnovy. Parkinh adnaŭzroŭnievy, usie aŭto znachodzilisia prykładna ŭ adnolkavych umovach.
Ahulnyja ličby: 788 zvarotaŭ aŭtaŭładalnikaŭ
U Biełaruskaj asacyjacyi strachoŭščykaŭ acanili kolkaść zvarotaŭ u strachavyja kampanii krainy z nahody naniesienaj škody ŭ suviazi ź niespryjalnymi ŭmovami nadvorja, jakija naziralisia ŭ Biełarusi ŭ pieryjad 13-18 lipienia 2024 hoda. Heta nie tolki zaleva ŭ Minsku 18 lipienia, ale i nastupstvy ŭrahannaha vietru, jaki fiksavaŭsia ŭ roznych rehijonach krainy ŭ nazvanyja dni, a taksama hradu.
Dyk voś, paśla hetaha strachoŭščykam pastupiła bolš za 14 tys. zajaŭ ab pryčynienym škodzie. Siarod paciarpiełych strachavalnikaŭ — jak fizičnyja, tak i jurydyčnyja asoby.
— Akramia zvarotaŭ u častcy pryčynieńnia škody damam, istotnuju častku zvarotaŭ pa strachavuju vypłatu składajuć vypadki paškodžańnia kuzava i škleńnia transpartnych srodkaŭ hradam, pavalenymi drevami, halinkami, starońnimi pradmietami ŭ vyniku škvalistaha vietru, a taksama mocnymi apadkami (zatapleńnia), — raspaviali ŭ asacyjacyi.
Pakul tam majuć takija ličby (havorka ab zvarotach strachavalnikaŭ pa vypłatu strachavoj kampiensacyi pa dobraachvotnym strachavańni naziemnych transpartnych srodkaŭ (kaska)): usiaho pryniata 788 zvarotaŭ, ź ich 599 — paškodžańni, naniesienyja hradam, 28 — padtapleńni transpartnych srodkaŭ, 161 — padali na mašyny drevy i inšyja pradmiety.
Ramont «tapielcaŭ» aceńvajuć u sumu ad 1000 da 15 000 rubloŭ
Što kažuć śpiecyjalisty ab ramoncie padtoplenych aŭtamabilaŭ? Z pytańniami «Anłajnier» źviarnuŭsia da kiraŭnika servisnaha centra «DrajvMotars» Ihara Śnitko.
Pavodle jaho słoŭ, vydatki na ramont takich aŭto zaležać ad dźviuch pryčyn: jak mocna aŭtamabil byŭ zatopleny i jak doŭha kiroŭca marudziŭ z naviedvańniem servisnaha centra. U bolšaści vypadkaŭ dastatkova razabrać mašynu, prasušyć i zamianić vadkaści. Kali ŭsio budzie narmalna, to košt takoha ramontu składzie kala 1000 rubloŭ.
— Kali ž patrabujecca zamiena błokaŭ kiravańnia abo, horš za toje, ramont ruchavika, to vydatki stanuć značna bolšyja. Mnohaje, viadoma, zaležyć ad aŭtamabila: čym jon daražejšy, tym vyšejšy košt zapčastak.
Na našaj praktycy samyja darahija ramonty paśla letnich zaleŭ abyšlisia ŭładalnikam u 10-15 tys. Ale heta chutčej redkaść.
Kali kiroŭca adrazu spachapiŭsia i svoječasova pryvioz aŭtamabil da nas, to vydatki buduć u dziasiatki razoŭ nižejšyja. Ale jość i tyja, chto ciahnie da apošniaha, — adznačaje śpiecyjalist.
Jon pieraścierahaje: samaja vialikaja pamyłka — praciahvać vykarystoŭvać zatopleny aŭtamabil. Navat kali jon sam paprasychaje, vada vykliča praces karozii i akiśleńnia, što potym pryviadzie da karotkich zamykańniaŭ i vychadu z ładu elektraabstalavańnia. Pry hetym aŭtamabil moža niejki čas pracavać narmalna, a potym raptam pasyplucca prablemy.
Stupień nastupstvaŭ možna acanić i samastojna: kali aŭto pry zatapleńni stajała, to pacierpiać elektronika i detali interjeru, a kali jechała, moža vyjści z ładu ruchavik. Kali vada patrapiła ŭ pavietrazabornik, to heta pryvodzić da hidraŭdaru. Nastupstvy byvajuć takimi, što praściej zamianić mator, čym ramantavać.
Kali aŭtamabil raptam «sierbanuŭ» vady, to ekśpiert raić dziejničać, jak tolki sydzie patop. Dla pačatku treba źniać klemy z akumulatara i abiastočyć mašynu. Potym treba chutka prystupić da razborki i suški, kab ćvil nie paśpieła raspaŭźcisia pa sałonie. Taksama varta pravieryć stan techničnych vadkaściaŭ: vada mahła źmiašacca z masłam u ruchaviku, skryncy pieradač abo razdatačnaj skryncy.
— Parada adna: nie marnujcie čas, a dziejničajcie. Kali možacie sami — rabicie sami, kali nie — źviažyciesia z servisnym centram. Kali da nas pastupaje takoje aŭto, my adrazu ž jaho raźbirajem, prasušvajem, mianiajem nieabchodnyja detali i ŭsie techničnyja vadkaści, kab vyklučyć źmiešvańnie ich z vadoj. Čas idzie na hadziny: kali adkłaści abo paspadziavacca, što praniasie, mohuć vyjści z ładu važnyja kampanienty abo źjavicca ćvil. Viadoma, usio papraŭna, ale košt budzie vysoki. Kudy lepš zrabić usio svoječasova i paźbiehnuć nastupstvaŭ, — rekamienduje Ihar Śnitko.
Ci možna damahčysia kampiensacyi, kali niama kaska?
Situacyju raźbirała juryst Taćciana Ravinskaja.
— Rašeńnie razhladanaj situacyi zaležyć ad vidu strachavańnia transpartnaha srodku. Pry strachavańni pa kaska, jak praviła, možna raźličvać na vypłatu strachavoj kampiensacyi, pakolki takija vypadki adniesieny da niepieraadolnaj siły. Pry zvyčajnaj «aŭtahramadziancy» (abaviazkovaje strachavańnie hramadzianskaj adkaznaści ŭładalnikaŭ transpartnych srodkaŭ) taki ŭron, viadoma, całkam nie pakryjecca, — adznačyła jana.
Ale sioje-toje zrabić usio ž možna. Voś pakrokavaja instrukcyja dla tych, čyj aŭtamabil zatapiła i chto maje namier damahacca kampiensacyi.
Pieršy krok: vyklikać supracoŭnikaŭ milicyi.
Jany zafiksujuć toje, što zdaryłasia, składuć pratakoł, pakazaŭšy ŭ im bačnyja i mahčymyja ŭnutranyja paškodžańni. Heta baza, jakaja dazvalaje zafiksavać toje, pry jakich abstavinach byŭ atrymany ŭron.
Druhi krok: źviarnucca ŭ Hidramietcentr pa daviedku ab apadkach.
Aŭtaŭładalnik źbiraje ŭsiu dastupnuju jamu infarmacyju pra toje, što adbyłosia. Sinoptyki mohuć dać źviestki adnosna minułaha zalevy.
Treci krok: pravieści techničnuju ekśpiertyzu paškodžańniaŭ transpartnaha srodku.
Śpiecyjalisty pavinny vyjavić, jakija mienavita paškodžańni atrymaŭ transpartny srodak u vyniku zatapleńnia. Heta asnova dla kalkulacyi škody.
Čaćviorty krok: skłaści pretenziju ŭ adras adkaznaj arhanizacyi.
Aŭtaŭładalnik u piśmovym vyhladzie źviartajecca z pretenzijaj u arhanizacyju, adkaznuju za absłuhoŭvańnie liŭnievaj kanalizacyi, prykładvaje ŭsie dakumienty, pieraličanyja vyšej, i prapanuje pakryć atrymany ŭron.
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»29
Kamientary