U novym vypusku TOKu palitołah Roza Turarbiekava patłumačyła, čamu pačała supracoŭničać ź Vitalom Rymašeŭskim, i vykazałasia adnosna pretenzij Zianona Paźniaka da Śviatłany Cichanoŭskaj.
Na zaŭvahu ab tym, što ŭ Rymašeŭskaha ŭ demakratyčnym asiarodździ davoli sprečnaja reputacyja, Roza Turarbiekava adznačyła, što viedaje ab hetym. Ale zhadała, što Rymašeŭski byŭ adnym ź niešmatlikich ludziej, chto padtrymaŭ jaje siamju i dapamoh paśla pierajezdu za miažu, u tym liku sa stvareńniem Biełaruskaj asacyjacyi adukacyi i navuki.
«Kali vy čujecie mierkavańnie ab čałavieku — heta adno. A kali vy bačycie i atrymlivajecie dapamohu ad hetaha čałavieka — heta zusim inšaje. Mahčyma, niešta ŭ kahości i było niekali. Ja hetaha nie admaŭlaju. Ale ja zaŭsiody składaju mierkavańnie ab ludziach sama.
Mianie składana byvaje ŭpeŭnić, kali niama dokazaŭ. A ich pradstaŭlena nie było. Kali łaska, zadakumientavanyja fakty na stoł. Heta vielmi važny momant. Bo heta ŭ pryncypie pytańnie ab niehatyviźmie ŭ biełaruskim palityčnym asiarodździ», — adznačaje Turarbiekava.
Jana źviartaje ŭvahu na važnaść dla biełaruskich demakratyčnych siłaŭ instytutu reputacyi i instytutu adkaznaści:
«Šmat rečaŭ apraŭdanyja, ale šmat i nieapraŭdanych. Bulinh, składańnie niejkaha niehatyŭnaha imidžu… Kali vy robicie takija zajavy, asabliva publična, to pavinny adkazvać za heta, dakazvać, što heta sapraŭdy tak, a nie prosta plotki. I voś heta samaje strašnaje, što ja ŭbačyła», —
adznačaje Turarbiekava i pryvodzić ŭ prykład abvinavačvańnie z boku Zianona Paźniaka ŭ bok Śviatłany Cichanoŭskaj u tym, što jana — «ahientura».
«Hetaj zajavy dastatkova dla taho, kab pavieryć u toje, što jana ahientura?» — zadaje pytańnie Turarbiekava i zaŭvažaje, što «prablema našaj palityčnaj kultury zaklučajecca jakraz u tym, što my nie cenim ludziej i nie pavažajem čałavieka».
Adzin z kiraŭnikoŭ BCHD abvinavaciŭ Rymašeŭskaha ŭ falsifikacyi podpisaŭ na vybarach-2010. Toj adkazaŭ
«Vam tut u Varšavie dobra siadzieć na telebačańni!» Jak u efiry Biełsata pasvarylisia Rymašeŭski i viadučy Padsasonny
Paźniak patłumačyŭ, čamu nie ŭznačaliŭ pratesty ŭ 2020-m: Maskva kinuła b vielizarniejšuju siłu
Roza Turarbiekava patłumačyła, čamu pajšła z Kaardynacyjnaj rady
«Niejkaja šval u Hrodnie». Marzaluk prajšoŭsia pa Bondaravaj i jaje paplečnikach10
Kamientary
Adnoj zajavy, kaniečnie, niedastatkova. Važna praanalizavać dziejnaść i vyniki dziejnaści.
A voś vyniki dziejnaści Cichanoŭskaj i ludziej vakoł jaje śviedčać, što ŭsio źniščana i razvalena, pratest zadušany, ludziej u Biełarusi rehularna źlivajuć, arhanizacyi za miažoj razvalenyja. Navat sama spadarynia Roza syšła z KR u vybarach jakoha pryniało ŭdzieł mieniej za 7 tysiač čałaviek. Heta pry tym, što ŭ raniejšyja časy pa 700 tysiač hałasavała na płatformie Hołas za niejkija tam pieramovy, jakija prapanavaŭ ofis Cichanoŭskaj. To bok 99% ad tych, chto hałasavaŭ na Hołasie tady, zaraz praihnaravali vybary ŭ Kaardynacyjnuju Radu, stvoranuju Cichanoŭskaj.
Za čatyry hady možna było b dać vyšejšuju adukacyju moładzi za miažoj i padrychtavać kvalifikavanyja kadry dla novaha Urada Biełarusi. Nijakich krokaŭ u hety bok ad Cichanoŭskaj i jaje atačeńnia zroblena nie było.