Valeryj Sachaščyk zarehistravaŭ novuju kampaniju i pašyryŭ svoj biznes na Bielhiju
Valeryj Sachaščyk niadaŭna pakinuŭ pasadu «ministra abarony» ŭ Abjadnanym pierachodnym kabiniecie, zajaviŭšy siarod inšaha, što «pryniaŭ rašeńnie zasiarodzicca na raźvićci svajho biznesu». Vydańnie Plan B. daviedałasia, u jakim stanie ciapier hetaja śfiera, u jakuju ŭkładaje svaje siły i enierhiju były vajskoviec i palityk.
Zamiest praciahu palityčnaj dziejnaści stała viadoma, što Sachaščyk zarehistravaŭ novuju biznes-strukturu i naroščvaje partfiel zakazaŭ za košt novaha rynku — bielhijskaha.
Ciapier jon vałodaje tracinaj dolaŭ i źjaŭlajecca staršynioj praŭleńnia siamiejnaj hrupy kampanij SK — Bud & Sahaty — najbujniejšaha budaŭničaha biznesu siarod bolš čym 400 anałahičnych kampanij biełarusaŭ u Polščy i prykładna 500 va ŭsim Jeŭrasajuzie.
Jak vyśvietliŭ Plan V., pa vynikach 2023 hoda hałaŭnaja struktura siamiejnaha biznesu Sachaščykaŭ — kampanija Sahaty — zarabiła amal 15 młn jeŭra vyručki i 150 tys. jeŭra čystaha prybytku. Pa vyručcy — heta pieršaje miesca siarod usich pryvatnych biełaruskich budaŭničych kampanij nie tolki ŭ Polščy, ale i ŭ ES. I, prynamsi, adno ź miescaŭ u top-50 usich biznesaŭ suajčyńnikaŭ u Jeŭropie.
U paraŭnańni z papiarednim pieryjadam finansavyja pakazčyki Sahaty skaracilisia. U 2022-m było, adpaviedna, 20 młn i 200 tys. jeŭra. Ale rehres charakterny dla ŭsiaho biełaruskaha budaŭničaha, dy i nie tolki biznesu ŭ Polščy, aprača tolki IT-haliny.
Hetyja abjomy letaś siamja Sachaščyka zarabiła na bolš čym 50 budoŭlach, u asnoŭnym na subpadradzie. U bolšaści jany byli ŭ Polščy, ale taksama ŭ Hiermanii i ŭ Bielhii, rynak jakoj pačaŭ asvojvacca z kanca 2023-ha.
U Polščy Sahaty budavaŭ žyłyja kompleksy ŭ Hdańsku, Varšavie, Krakavie, Poznani, Chožavie. U hramadzianskim siektary firma ŭdzielničała va ŭźviadzieńni studyi na terytoryi štab-kvatery Polskaha telebačańnia (TVP Warszawa), budynkaŭ muzyčnych akademij u Bydhaščy i Katavicach, transpartna-pierasadačnaha vuzła ŭ Zabže, čyhunačnaha vakzała ŭ Tłuščy.
Byli ŭ partfieli i pramysłovyja abjekty: pašyreńnie kandytarskaj fabryki Lotte Wedel u Varšavie i ŭźviadzieńnie cecha bujnoha vytvorcy blašanak BallPackaging u Lublinie.
U Hiermanii, dzie dziejničaje daččynaja kampanija Sahaty, biełaruskija bryhady pracavali ŭ Bierlinie, Miunchienie, Miunstary, Hanoviery i inšych haradach krainy.
U 2024-m Sachaščyk zarehistravaŭ novuju budaŭničuju kampaniju Chicago Urban Development, zaviaršaje pačatyja budoŭli i pašyraje partfiel zakazaŭ. Z polskich samy znakavy — heta ŭdzieł va ŭźviadzieńni treciaj čarhi terminała zvadkavanaha hazu imia Lecha Kačynskaha ŭ Śvinavuści, jaki zabiaśpiečvaje niezaležnaść Polščy ad rasijskaha hazu.
Tam ža, na ŭźbiarežžy Bałtyki, Sahaty buduje žyłyja kompleksy i hateli, u inšych častkach Polščy i ŭ Hiermanii — damy i hramadzianskija abjekty.
U pačatku biahučaha hoda kampanija zdała pieršy abjekt na novym rynku — u Bielhii, a taksama atrymała ŭ hetaj krainie novyja zakazy. Samy značny — udzieł u budaŭnictvie bujnoha žyłoha kompleksu ŭ Miechielenie.
Sachaščyk: Ja stvaryŭ padraździaleńnie, jakoje 15 miesiacaŭ vajavała biez ratacyi na pieradavoj. I nivodnaha zahinułaha
Cichanoŭskaja pra adstaŭku Sachaščyka: z Valeryjem Ściapanavičam zastajemsia ŭ narmalnych adnosinach
«Ministr abarony» Valeryj Sachaščyk zajaviŭ pra vychad z Abjadnanaha pierachodnaha kabinieta
«Biełaruski Čerčyl» — usio? Ci zastaniecca Sachaščyk u kamandzie Cichanoŭskaj paśla kanfierencyi ŭ Vilni
Zamiest Sachaščyka ŭ Abjadnanym pierachodnym kabiniecie ciapier budzie Kabančuk
Biez Paźniaka i Sachaščyka, ź niervovymi dyskusijami pamiž Łatuškam i Jahoravym. Jak prachodziła kanfierencyja «Novaja Biełaruś»
«Damokłaŭ Mieč». Kanał «Biełorusskij siłovik» nastolki prarasijski, što mnohija mierkavali, što heta rasijanie jaho viaduć. Nie, za im staić supierahient Łukašenki25
Kamientary