Zasnavalnik Jandeksa daŭ pieršaje intervju paśla ŭciokaŭ z Rasii. Pryznaŭ svaje pamyłki
«Ahladajučysia nazad, ja razumieju, što šmat jakija rečy zaŭsiody možna zrabić pa-inšamu, ale ja ŭžo ničoha nie mahu źmianić».
Pieršaje z pačatku vajny intervju daŭ suzasnavalnik i były hienieralny dyrektar «Jandeksa» Arkadź Vołaž. Jaho publikuje niamieckaje vydańnie Der Spiegel.
U červieni 2022 hoda ŭ adnosinach da Vołaža byli ŭviedzienyja piersanalnyja sankcyi Jeŭrapiejskaha Sajuza. Paśla hetaha mužčyna pakinuŭ usie pasady ŭ kampanii i źjechaŭ u Izrail, dzie zaniaŭsia inviestycyjnaj i pradprymalnickaj dziejnaściu.
Pra novy biznes
15 lipienia hetaha hoda rasijski «Jandeks» abviaściŭ, što jahonaja byłaja maciarynskaja kampanija — hałandskaja Yandex N.V. — poŭnaściu vyjšła sa składu akcyjanieraŭ hrupy. Z 16 lipienia 2024 hoda Yandex N.V. stała nazyvacca Nebius Group i abviaściła, što Arkadź Vołaž stanie jaje hałoŭnym vykanaŭčym dyrektaram (SIEO).
U intervju Vołaž raskazaŭ, što Nebius Group, u adroźnieńnie ad «Jandeksa», jaki byŭ V2S-kampanijaj (biznesam dla spažyŭca), budzie T2T — pastaŭščykom technałohij dla inšych technałahičnych kampanij.
Biznesmien spadziajecca, što jahony novy biznes, jaki jon pačaŭ u svaje 60 hadoŭ, stanie prybytkovym mienš čym za hod, i što buduć adnoŭlenyja tarhi akcyjami na amierykanskaj biržy Nasdaq.
Vołaž patłumačyŭ, što na rašeńnie zastacca ŭ biznesie paŭpłyvali pracesy, jakija ciapier adbyvajucca ŭ halinie:
«Šmat chto z ekśpiertaŭ miarkuje, što štučny intelekt usiaho za niekalki hadoŭ moža dasiahnuć uzroŭniu, jaki pieravyšaje čałaviečy. (…) Ja chaču paŭpłyvać na napramak, u jakim raźvivajecca heta revalucyja».
Pra vajnu
Pieršy raz z asudžeńniem vajny Vołaž vystupiŭ u žniŭni 2023 hoda, kali raspaŭsiudziŭ zajavu, u jakoj napisaŭ: «Ja kateharyčna suprać varvarskaha ŭvarvańnia Rasii va Ukrainu».
U svaim intervju biznesmien skazaŭ, što «zaŭsiody ličyŭ, što hetuju vajnu ŭvohule nie treba było pačynać. Heta varvarstva, i Ukraina płacić za heta strašnuju canu».
«Ništo z taho, što adbyłosia sa mnoju za apošnija dva hady, navat blizka nie mahło paraŭnacca z pakutami, jakija cierpiać ludzi ŭ čas vajny va Ukrainie kožny dzień», — adznačyŭ mužčyna.
Vołaž upeŭnieny, što vajna «śviedčyć pra kaniec epochi ŭ Rasii», padčas jakoj u krainy «była mahčymaść pajści inšym šlacham».
«My zaŭsiody byli častkaj hetaj sproby pabudavać inšuju, lepšuju i sučasnuju Rasiju». Na jahonaje mierkavańnie, adziny šaniec stvaryć «niešta pa-sapraŭdnamu daŭhaviečnaje» — heta praca ŭ libieralnaj demakratyi.
Datyčnaść «Jandeksa» da Z-prapahandy
U intervju Vołaž adznačyŭ, što škaduje pra toje, što razam z kalehami nie zakryŭ «Jandeks. Naviny» jašče ŭ 2017 hodzie, kali ŭstupiŭ u siłu zakon ab ahrehatarach navin.
Vołaž pryznaŭ, što były kiraŭnik «Jandeks. Naviny» Leŭ Hieršenzon mieŭ racyju, kali kazaŭ pra toje, što z pačatkam vajny servis staŭ dapamahać prapahandzie.
«Ale paśla lutaha 2022 hoda my mała što mahli zrabić, bo pakinuli krainu. My bolš nie mieli apieratyŭnaha kantrolu nad kampanijaj. My pradali «Jandeks. Naviny» adrazu paśla pačatku vajny», — zaŭvažyŭ biznesmien i dadaŭ:
«Ahladajučysia nazad, ja razumieju, što šmat jakija rečy zaŭsiody možna zrabić pa-inšamu, ale ja ŭžo ničoha nie mahu źmianić».
Kamientary
Čarhovy raz hety eŭfiemizm, zamiest naŭprost pisać pra RASIEJSKUJU PRAPAHANDU.