Chłopčyk vyjhraŭ u viendynhavym aparacie IPhone, a atrymaŭ ćviłuju šakaładku. Ci možna tak vieści hety biznes?
Čytač vydańnia «Anłajnier» Viačasłaŭ raskazaŭ, što jahony syn časta zachodziŭ paśla škoły pahulać u aŭtamaty. Niekalki razoŭ jamu šancavała — to navušniki vyjhraje, to žujki. Adnojčy syn znoŭ pajšoŭ hulać i zmoh sabrać piramidu da samaj viaršyni. Aŭtamat prapanavaŭ jamu vybar: navušniki abo ajfon. Viadoma, chłopčyk abraŭ ajfon. Pryjšoŭ dadomu radasny i adrazu pačaŭ raspakoŭvać vyjhryš, a tam… šakaładka ź ćvillu, i čamuści z klučykam u kamplekcie.
«Ja nabraŭ słužbu padtrymki i pytajusia: jak tak, vyjhrali telefon, a tam šakaładka? Na što mnie adkazali: «A chto vam skazaŭ, što tam budzie telefon? Tam moža lažać što zaŭhodna, navat pustaja skrynka», — raskazaŭ Viačasłaŭ.
Jon pryznaŭsia: kali b syn viedaŭ zahadzia, što tam prosta šakaładka, dy jašče i sapsavanaja, to, chutčej za ŭsio, i nie hulaŭ by. Paśla pahrozy źviarnucca ŭ ŚMI słužba padtrymki prapanavała vybrać inšy pryz.
«Ja admoviŭsia, bo zamiest navušnikaŭ tam taksama mahli być takija prykoły. U toj ža viečar pajšoŭ da aŭtamata, na im nie było nijakaj infarmacyi pra toje, što ŭsiaredzinie moža być nie telefon, a niešta inšaje. Skrynka była zapakavanaja jak novaja ŭ cełafan, i ŭsio vyhladała tak, byccam tam sapraŭdy lažyć kaštoŭny pryz. Kali b jany adrazu napisali, što tam šakaładka, nichto b u hetyja aŭtamaty i nie hulaŭ».
Uładalnik aparata, ź jakim «Anłajnier» taksama źviazaŭsia, padzialiŭsia svaim bačańniem situacyi. Pavodle jaho słoŭ, jany z Valancinam spravu ŭžo nibyta byli i vyrašyli, i tamu niezrazumieła, čamu jon źviarnuŭsia ŭ presu.
Damoŭlenaść była nibyta ŭ tym, što syn źviažacca z uładalnikam i jamu dazvolać zamianić toj pryz, jaki rasčaravaŭ, na luby inšy z aŭtamata. Na pytańnie ž adnosna taho, što na skryncy napisana nie toje, što ŭ joj realna lažyć, pradprymalnik zapiarečyŭ, što «kali na skryncy raźmiaścić łahatyp — heta nie značyć, što heta tam lažyć».
Urešcie, padkreśliŭ jon, baćka chłopčyka pavioŭ siabie nieprystojna, parušyŭšy papiarednija damoŭlenaści:
«My pajšli čałavieku nasustrač, prapanavali dva varyjanty: pakryć vydatki na hulniu ci zamianić pryz. Siońnia dzicia pavinna było sa mnoj sustrecca i pamianiać pryz, ale zamiest hetaha jon źviartajecca na Onlíner. Jak ja na heta pavinien reahavać? Dla čaho jon mnie telefanavaŭ? Što jon choča? Atrymać zvyšvyhodu z hetaj situacyi?»
Pavodle słoŭ mužčyny, tyja ludzi, jakija nie zhodnyja z pryzam, mohuć jamu patelefanavać, i ŭsio vyrašajecca paluboŭna:
«Bolšaść ludziej razumiejuć, što 50 kapiejek IPhone nie moža kaštavać, i zabirajuć toj pryz, jaki atrymlivajuć. Dzicia, jakoje ŭčora pryjšło, vydatkavała 5, nu chaj 10 rubloŭ i vyjhrała šakaład za 35 rubloŭ, u kožnym razie ŭ minusie nie zastałosia. Ja zhodny: jon čakaŭ, što tam budzie niešta darahoje, moža, klučy ad aŭtamabila ci smartfon aryhinalny. A jak by jon zrabiŭ, kali b tam apynułasia kitajskaja replika? Vy ŭ kursie, što heta pryzavy aparat, tam pryzy visiać, a nie technika».
Na zaŭvahu, što kali tak, to treba papiaredžvać na samim aparacie, što čakańni mohuć nie supadać z realnaściu, uładalnik techniki zajaviŭ:
«Nie abaviazkova jaho [papiaredžańnie] lapić. Takija ž tavary pradajucca na handlovych placoŭkach, nijakich pytańniaŭ nie ŭźnikaje ŭ ludziej, kali jany ich nabyvajuć. Ludzi pavinny razumieć, što kali košt pryza kaštuje vialikich hrošaj, to košt hulni nie moža być 50 kapiejek.
Takich aparataŭ pa horadzie šmat, u niekatorych lažyć i pa 10 karobak. Jość takija hulcy, jakija raźbivajuć aparaty, ale my — apieratary hetaha biznesu — nie chodzim na Onlíner i nie raskazvajem takija historyi.
Było try vypadki, kali ich raźbivali ab ziamlu, a tut čałaviek za šakaładku hatovy ŭsiu krainu na vušy padniać».
Jak vyhladaje heta situacyja z punktu hledžańnia prava, prakamientavaŭ śpiecyjalist pa pravach spažyŭcoŭ Ivan Rajkievič:
«Adnaznačna adkazać na pytańnie, ci zakonna zrabiŭ pradprymalnik, davoli składana, bo spažyŭcom dadziena mała infarmacyi.
Pierš za ŭsio nieabchodna vyvučyć sam aŭtamat na pradmiet najaŭnaści na im praviłaŭ hulni i apisańnia pryzoŭ. Kali hetaha tam nie źmiaščajecca, a pradprymalnik nastojvaje, što ŭ skryncy ad iPhone budzie znachodzicca šakaład, možna kazać pra toje, što rekłama (vykarystańnie skrynki ad iPhone) uvodzić spažyŭca ŭ zman i źjaŭlajecca nienaležnaj, što ciahnie za saboj niehatyŭnyja nastupstvy dla pradprymalnika.
Ci maje spažyviec prava patrabavać pieradačy telefona, skrynku ad jakoha jon vyjhraŭ?
Całkam mahčyma, kali jość apisańnie, lubyja inšyja dakumienty albo tablički, jakija śviedčać pra toje, što ŭ aŭtamacie možna vyjhrać mienavita iPhone.
U kožnym razie spažyŭcu varta źviarnucca albo ŭ tavarystva pa abaronie pravoŭ spažyŭcoŭ, albo ŭ adździeł handlu i pasłuh miascovaha vykanaŭčaha kamiteta, administracyi dla farmiravańnia pravavoj pazicyi i nakiravańnia pretenzii na adras pradprymalnika z patrabavańniem vykanać abaviazacielstvy pa pieradačy pryza. Pry admovie ad pieradačy telefona abaranić svaje pravy možna budzie ŭ sudovym paradku».
Kamientary
Dołžny dobyvať dieńhi u nasielenija dla vładielca.
A nie razdavať dieńhi vładielca nasieleniju.
Papie stoiło by objaśniť eto riebienku.