Bajden prapuścić samit miru pa Ukrainie ŭ Šviejcaryi. Jon pierasiakajecca ź pieradvybarčym mierapryjemstvam pa zbory hrošaj u Kalifornii

Prezident ZŠA Džo Bajden, chutčej za ŭsio, prapuścić hłabalny «samit miru» ŭ Šviejcaryi, bo jon pierasiakajecca ź jaho mierapryjemstvam pa zbory srodkaŭ na pieradvybarčuju kampaniju, jakoje projdzie ŭ Kalifornii, piša Meduza sa spasyłkaj na Bloomberg.

Taksama na samicie, pavodle źviestak surazmoŭcaŭ Bloomberg, nie budzie vice-prezidenta ZŠA Kamały Charys.

Samit u Šviejcaryi projdzie 15-16 červienia, a papiaredničać jamu budzie sustreča lidaraŭ krain G7 u Italii. Na joj prysutnaść Bajdena płanujecca, adnak 15 červienia jon źbirajecca vylecieć u Łos-Andželes.

Razam ź im u Kalifornii na mierapryjemstvie pa zbory srodkaŭ buduć akciory Džordž Kłuni i Džulija Robierts, a taksama były prezident ZŠA Barak Abama i viadučy viačerniaha telešou Džymi Kimeł.

Hetaje rašeńnie, jak piša Bloomberg, padkreślivaje pryjarytet pieradvybarnaj kampanii dla Bajdena — asabliva na fonie taho, jak adznačaje vydańnie, što ŭ minułym miesiacy jaho kankurent Donald Tramp upieršyniu abahnaŭ jaho ŭ fandrajzinhu, sabraŭšy 76 miljonaŭ dalaraŭ suprać 51 miljona.

Hłabalny samit, na jakim płanujecca abmierkavać namahańni krain pa dasiahnieńni miru va Ukrainie, byŭ zapłanavany jašče ŭ pačatku 2024 hoda. Na jaho zaprošany bolš za 160 dziaržaŭ, svoj udzieł užo paćvierdzili kala 70. Krainy «hłabalnaha Poŭdnia» taksama atrymali zaprašeńni, adnak Kitaj, najbujniejšaja ź niejtralnych dziaržaŭ, jakija padtrymlivajuć stasunki z Rasijaj padčas vajny, udzielničać u samicie nie budzie.

Rasiju na samit nie zaprasili. Prezident Ukrainy Uładzimir Zialenski tłumačyŭ, što heta zroblena z bojazi taho, što rasijski bok «usio zabłakuje, usio sarvie» i kazaŭ, što pryciahnuć Rasiju da abmierkavańnia płanujecca ŭžo na nastupnym etapie, kali buduć vypracavanyja asnoŭnyja pryncypy pahadnieńnia.

U Rasii zajavili, što nie prymuć zaprašeńnie, navat kali atrymajuć jaho. «Jany nas nie zaprašajuć. Bolš za toje, kažuć, što jany nas tam nie bačać. Nu nie bačać, nie treba», — zajaviŭ Uładzimir Pucin nakont admovy zaprasić Rasiju na samit.

Raniej ad udziełu ŭ samicie admovilisia prezidenty Brazilii i PAR.

• 1
• 0
• 2
• 3
• 0
• 1
• 1
• 0