U Šmita jość «tajemnaja dziaŭčyna», jakaja mahła być jaho kantaktam z KDB
Gazeta Wyborcza piša pra dziaŭčynu źbiehłaha sudździ Tomaša Šmita, jakuju toj staranna chavaŭ ad svaich siabroŭ i jakaja mahła zavierbavać jaho na pracu na biełaruskija śpiecsłužby. Ciapier dziaŭčyna źnikła i chutka zamiataje ślady, adznačaje polskaja hazieta.
Pavodle Gazeta Wyborcza i siabroŭ źbiehłaha sudździ Šmita, apytanych partałam Onet, Šmit u apošnija hady žyŭ razam ź dziaŭčynaj, jakuju hazieta nazvała «Jelena K.», a nacyjanalnaść jaje dakładna nieviadomaja.
Alena K. peŭny čas vałodała toj kvateraj, dzie aficyjna byŭ zarehistravany Šmit (ul. Jana Kochanowskiego 6, horad Hrujec kala Varšavy). Susiedzi paćvierdzili haziecie, što žančyna taksama žyła tam, ale sami nie viedajuć pra jaje amal ničoha.
Žurnalisty vyśvietlili, što Alena K. jašče ŭ 2022 hodzie vałodała sałonam pryhažości za 5 chvilin jazdy ad apošniaha miesca faktyčnaha žycharstva Šmita pierad jaho ŭciokami ŭ Biełaruś. Svoj biznes žančyna zakryła ŭ kancy taho ž hoda.
Taksama Alena K. praź niekalki dzion paśla pačatku vajny va Ukrainie (27 lutaha) stvaryła akaŭnt u fejsbuku, jaki byŭ pryśviečany zboru srodkaŭ na patreby sałdat USU i čyj zborny punkt znachodziŭsia ŭ Hrujecy prosta kala zarehistravanaj kvatery Šmita.
Jak tolki žurnalist Gazeta Wyborcza pasprabavaŭ źviazacca z administrataram fejsbuk-akaŭnta i spytać nakont Aleny, to adrazu byŭ zabłakavany, a praz paru hadzin sajt byŭ vydaleny.
Numary telefonaŭ zbornaha punktu i sałona pryhažości Aleny K. akazalisia niadziejnymi.
«Ja ŭvohule nie viedaŭ imia partniorki Tomaša Šmita, jon nie chacieŭ jaho mnie nazvać. Ale ja čuŭ, jak jon havaryŭ ź joj pa telefonie i nazyvaŭ «Lenka».
My nie vielmi časta sustrakalisia sa Šmitam, niekalki razoŭ sustrakalisia ŭ sudzie pa dyscyplinarnych spravach Tomaša. Kali my byli razam za abiedam, hetaja «Lenka» telefanavała jamu i ja paprasiŭ pakazać mnie jaje fatahrafiju, ale Tomaš admoviŭsia. Jon navat nie skazaŭ, dzie žyvie. Jon kazaŭ tolki, što niedaloka ad Varšavy», — raskazvaje adzin ź siabroŭ Tomaša Šmita ŭ kamientarach dla partała Onet.
Pa słovach siabra Šmita, toj niekalki razoŭ kazaŭ jamu, što źbirajecca z «Lenkaj» da jaje siamji va Ukrainu, što hetaja siamja vielmi krutaja. Taksama jon zajaviŭ, što jany z žančynaj chočuć ažanicca ŭ carkvie pavodle pravasłaŭnaha abradu.
Tomaš usprymaŭ jaje surjozna, jak niejki prajekt na žyćcio, kazaŭ pra jaje «maja žančyna», adznačaje siabar źbiehłaha sudździ.
Jašče adzin blizki tavaryš Šmita ŭ kamientarach dla Onet vykazaŭ zdahadku, što «Lenka» była ahientam biełaruskich śpiecsłužbaŭ i mienavita jana mahła zavierbavać polskaha sudździu na supracu z režymam Łukašenki i Pucina.
«Ja b nie vyklučaŭ, što mienavita hetaja žančyna mahła ŭhavaryć Šmita supracoŭničać ź biełaruskimi śpiecsłužbami. Bo toje, što ciapier adbyvajecca — heta zamiatańnie śladoŭ hetaj žančyny ŭ Polščy i heta, vidavočna, padobna na pracu prafiesijanałaŭ i słužbaŭ», — padkreślivaje tavaryš Šmita.
Jon dadaŭ, što Šmit mieŭ dostup da sakretnaj infarmacyi i z-za sudovaha skandału vakoł byłoj kiroŭnaj partyi PiS, fihurantam jakoha staŭ Šmit, toj moh stać vydatnym kandydatam na viarboŭku rasijskimi i biełaruskimi śpiecsłužbami.
U kanałach, jakija «viadzie sudździa Šmit», śmiešnaja polskaja mova
Źbiehły sudździa Šmit choča atrymać biełaruskaje hramadzianstva. Ale maje adnu ŭmovu
Sudździa Šmit pryjšoŭ z prapahandystami i ludźmi ŭ cyvilnym u polskuju ambasadu i pieraśledavaŭ dypłamata
Źbiehły polski sudździa Šmit vypadkova vykłaŭ u telehram svaje kantakty. HUBAZiK i Artur Hajko taksama jość
Rasijski «ekśpiert pa rabocie śpiecsłužbaŭ» zajaviŭ, što kamunikavaŭ z sudździoj Šmitam doŭhija hady
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ8
Kamientary
Sud́ja Šidt iz pistoleta chočiet zastrieliťsia... Mnoho čto-to vnimanija etomu zabułdyhie.