Niekali šop-tury ŭ Polšču karystalisia vialikaj papularnaściu, pryčym nie tolki ŭ žycharoŭ pryhraničnaha Hrodna. Na šopinh u Biełastok taksama rehularna adpraŭlalisia aŭtobusy ź Minska. «Naša Niva» pahladzieła, što adbyvajecca na hetym kirunku.
Niama taho, što rańš było
U dakavidnyja časy pajezdki na šopinh u Polšču dla žycharoŭ Hrodna źjaŭlalisia čymści naturalnym. Štodnia z abłasnoha centra ŭ šop-tury adpraŭlalisia dziasiatki maršrutak.
Ceny na bilety pa ciapierašnich mierkach byli bolš, čym demakratyčnyja. Za $20-25 možna było źjeździć z Hrodna ŭ Biełastok naviedać rynak, niekalki handlovych centraŭ i viarnucca nazad. Tak było da pandemii, mihracyjnaha kryzisu i vajny.
Jašče padčas kavidnych abmiežavańniaŭ palaki zakryli punkt propusku «Kuźnica» (ź biełaruskaha boku «Bruzhi») u adkaz na stvareńnie mihracyjnaha kryzisu. Praz heta adlehłaść ad Hrodna da Biełastoka ŭzrasła, ceny na kvitki taksama. Dva hady tamu, viasnoj 2022-ha, šop-tury z Hrodna ŭ Biełastok kaštavali ŭžo 120 rubloŭ (kala 42 dalaraŭ pa tahačasnym kursie).
U lutym 2023 hoda zakryli punkt propusku «Babroŭniki», adlehłaść ad Hrodna da Biełastoka ŭzrasła da 250 kiłamietraŭ, bo treba było dabiracca ŭ Polšču praź Litvu. Ceny na bilety tudy-nazad padlacieli da 160 rubloŭ (kala $60 pa tahačasnym kursie).
Paśla zakryćcia «Pryvałki» z 1 sakavika 2024 hoda ceny na kvitki ŭzraśli da 240 rubloŭ, heta kala 75 dalaraŭ za pajezdku tudy-nazad.
«U Polščy my tracili pad 2000 dalaraŭ»
Surazmoŭca «Našaj Nivy», jaki raniej rehularna jeździŭ u Biełastok na zakupy, kaža, što apošni raz byŭ tam na pačatku lutaha, kali jašče pracavała «Pryvałka».
«Pajechali razam z žonkaj i zakupilisia pa poŭnaj. Kuplali adzieńnie sabie i dzieciam, bytavuju chimiju, kavu, słodyčy, telefon. Praz toje, što ŭ Polščy my patracili pad 2000 dalaraŭ, atrymałasia sekanomić niekalki sotniaŭ paśla taho, jak viarnuli VATy», — raspaviadaje hrodzieniec.
Paśla zakryćcia «Pryvałki» i źmianšeńnia limitaŭ na biaspošlinny pravoz tavaraŭ da 25 kiłahramaŭ i 500 jeŭra dumak jechać na zakupy ŭ Biełastok u jaho bolš nie źjaŭlałasia.
«Toj ža telefon, jaki my nabyli ŭ lutym, pa novych praviłach lehalna pravieźci ŭžo nielha. Niejkaja inšaja bolš-mienš hruntoŭnaja technika taksama kaštuje bolš za 500 jeŭra.
Adbić vydatki na darohu stała składaniej, bo bilety darahija, a limity nizkija. A kali ŭjavić, što takaja pajezdka moža zaniać 2-3 sutak, to nijakaj ekanomii nie zachočaš».
Vilnia zamiest Biełastoka
Inšaja surazmoŭca, jakaja ŭ dakavidnyja časy čaściakom adpraŭlałasia na zakupy ŭ Biełastok, taksama admoviłasia ad hetaj zvyčki.
Žančyna kaža, što apošni raz u Polšču jeździła jašče praz «Bierastavicu». Kolki tady kaštavali bilety, jana ŭžo dakładna nie pamiataje.
«Paśla zakryćcia «Bierastavicy» pa paradach siabroŭ adkryła dla siabie Vilniu. Mahčyma, na niekatoryja pazicyi ceny ŭ Litvie vyšejšyja, čym u Polščy, ale jechać našmat bližej i chutčej. U dadatak u Vilni ciapier žyvuć svajaki, da jakich možna zavitać u hości i biaspłatna zanočyć».
Kali ŭ dakavidnyja časy hałoŭnaja meta pajezdak była ekanomija, to ciapier asnoŭnym faktaram žančyna nazyvaje bolš šyroki vybar tavaraŭ.
«U Biełarusi ciapier nielha nabyć šerah brendaŭ praź ich zychod z krainy, tamu pajezdki na zakupy ŭ Vilniu — heta ŭ pieršuju čarhu bolš šyroki asartymient».
«Tracić na heta dvoje-troje sutak dakładna niama nijakaha sensu»
Jašče adzin hrodzieniec raskazvaje, što apošni raz jeździŭ u Biełastok praz «Bieniakoni», bo «Pryvałka» ŭžo nie pracavała.
«Jechali mašynaj razam sa znajomymi, tamu vydatki na darohu dzialili 50/50. Ź Biełarusi ŭ Litvu trapili za 9 hadzin, a voś nazad stajali ŭ čarzie amal sutki», — zhadvaje surazmoŭca.
Da pajezdki padšturchnuli naviny pra mahčymaje chutkaje źnižeńni limitaŭ na ŭvoz tavaraŭ.
«Zvyčajna my jeździli na zakupy na majskija, pierad pačatkam navučalnaha hoda i časam pierad Novym hodam. Hetym razam pajechali ŭ siaredzinie sakavika. Z techniki nabyli robat-pyłasos, noŭtbuk i trymier. Niešta z adzieńnia, krychu tavaraŭ dla doma, pralnyja paraški, kavu i h.d. Kali b jechali ŭžo paśla 1 krasavika, to stolki pravieźci nie atrymałasia b, bo adzin tolki noŭtbuk kaštavaŭ bolš za 500 jeŭra», — kaža surazmoŭca.
Mužčyna ŭpeŭnieny, što kali vielizarnyja čerhi zachavajucca, to pierad 1 vieraśnia na zakupy jon dakładna nie pajedzie.
«Navat kali ŭjavić, što i z novymi normami atrymajecca pa vynikach pajezdki sekanomić 50-100 dalaraŭ, to tracić na heta dvoje-troje sutak dakładna niama nijakaha sensu», — ličyć mužčyna.
Kolkaść rejsaŭ skaraciłasia
Pra toje, što šop-tury pa šerahu pryčyn stracili byłuju papularnaść, śviedčyć toj fakt, što častka pieravozčykaŭ bolš nie akazvaje takija pasłuhi.
Šerah pieravozčykaŭ admovilisia ad šop-turaŭ u Biełastok paśla taho, jak z sakavika Litva zakryła jašče dva punkty propusku na miažy ź Biełaruśsiu, paralelna zabaraniŭšy prajezd praz svaju miažu turystyčnym aŭtobusam, jakija nakiroŭvajucca ŭ Polšču.
Ale niekatoryja turahienctvy praciahvajuć pradavać šop-tury ź Minska ŭ Biełastok. Košt bileta — 150-170 rubloŭ u adzin bok. Praŭda, aproč hetaha, treba zakładać jašče kala 30 dalaraŭ na načleh u Biełastoku. Takim čynam atrymlivajecca, što pajezdka na zakupy ź Minska ŭ Polšču abydziecca ŭ 400 rubloŭ (kala $130), i heta tolki vydatki na darohu i načleh.
Pry hetym pradstaŭniki turfirm papiaredžvajuć, što nie zaŭždy mohuć nazvać kankretnuju datu vyjezdu ź Minsku, pakolki heta zaležyć ad kamplektnaści hrupy. Što padkreślivaje nievysoki popyt na padobnyja tury paśla 1 sakavika.
Častka hrodzienskich pieravozčykaŭ taksama admoviłasia ad pajezdak u šop-tury ŭ Biełastok paśla zakrycca «Pryvałki».
Tyja, chto praciahvaje vazić ludziej na zakupy, vymušany jechać u susiedni horad praz Brest.
Jak i ŭ vypadku sa staličnymi pieravozčykami, hrodzienskija papiaredžvajuć, što pajeduć tolki pry nabory hrupy ad 14 čałaviek. Košt biletaŭ — 240 rubloŭ u abodva baki (kala $75).
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary