BDUIR nabiare bolš metavikoŭ. Ajcišnikaŭ zabiaruć siłaviki, vajenpram, «Kamunarka»

Usiaho sioleta ŭniviersitet źbirajecca nabrać 62 metavikoŭ. Padčas minułaj ustupnaj kampanii metavikam było adviedziena 41 miesca, usiaho było padadziena 60 zajavak, piša Devby.io.

Asablivaści naboru metavikoŭ u BDUIR

• Abituryjentaŭ adbiraje zakazčyk ź liku hramadzian Biełarusi, zamiežnych hramadzian i asob biez hramadzianstva, jakija pastajanna pražyvajuć u Biełarusi i źjaŭlajucca vypusknikami ŭstanoŭ adukacyi Biełarusi.
• Pryjom dakumientaŭ: ad 27 červienia da 2 lipienia.
• Praviadzieńnie ŭstupnych ispytaŭ: ad 4 da 10 lipienia.
• Abituryjenty, jakija pastupajuć dla atrymańnia vyšejšaj adukacyi na ŭmovach metavaj padrychtoŭki, za vyklučeńniem asobnych śpiecyjalnaściaŭ, zdajuć adnoje ŭnutranaje ŭstupnaje vyprabavańnie pa vučebnym pradmiecie, jaki vyznačany pradmietam pieršaha profilnaha vyprabavańnia.
• Zaličeńnie: da 12 lipienia.

Sioleta bolš za ŭsio miescaŭ (14) BDUIR zareziervavaŭ dla kampanii «Intehrał». U 2023 «Intehrału» vydzielili 12 miescaŭ dla metavikoŭ.

Pradpryjemstva raspracoŭvaje i vyrablaje mikraelektronnyja kampanienty i vyraby elektronnaj techniki, uklučajučy vajennuju techniku. Jamu patrebnyja novyja supracoŭniki, jakija navučajucca na troch śpiecyjalnaściach: «elektronnyja sistemy i technałohii», «nanatechnałohii i nanamateryjały», «mikra– i nanaelektronika».

Niekalki miescaŭ vydzielena dla metavikoŭ, jakija płanujuć pracavać na inšych pradpryjemstvach vajenpramu, u pryvatnaści, «Pielenh» i «558 Avijacyjny ramontny zavod». Darečy, abodva pradpryjemstvy razam z «Intehrałam» — pad sankcyjami.

Pavialičyłasia kolkaść miescaŭ dla ajcišnikaŭ, jakija patrebnyja siłavym strukturam. Letaś dla navukova-techničnaha centra KDB i Departamienta zabieśpiačeńnia apieratyŭna-vyšukovaj dziejnaści MUS było zareziervavana 7 miescaŭ. Sioleta 9 miescaŭ zareziervavana dla MUS. 

Jak i letaś, BDUIR płanuje rychtavać pa metavych napramkach śpiecyjalistaŭ dla mytni. Dva miescy zareziervavanyja dla pradpryjemstva «Kamunarka».

Pavialičyć

Jak źmianiałasia palityka dziaržavy ŭ dačynieńni da metavikoŭ

U 2022 hodzie ŭ abnoŭlenym Kodeksie ab adukacyi źniali abmiežavańni dla arhanizacyj i pradpryjemstvaŭ, jakija pretendavali na metavy nabor śpiecyjalistaŭ. Raniej takija arhanizacyi i pradpryjemstvy musili znachodzicca albo ŭ małych haradach (z nasielnictvam nie bolšym za 20 tysiač) albo na zabrudžanych terytoryjach. 

Heta dazvoliła VNU pavialičyć nabor metavikoŭ. U 2022 hodzie płanavy nabor skłaŭ 3,2 tysiačy, u 2023 hodzie — kala 4 tysiač. 

VNU miedycynskaha profilu dali mahčymaść nabirać da 80% metavikoŭ ad ahulnaj kolkaści (było 50%). Na śpiecyjalnaści, źviazanyja ź sielskaj haspadarkaj, vieterynaryjaj, rybnaj haspadarkaj, achovaj pracy, moža pastupać da 70% abituryjentaŭ z metavym napramkam (było 60%). Pa inšych śpiecyjalnaściach — da 60% ad kantrolnych ličbaŭ pryjomu (było 40%).

Taksama źmianiŭsia farmat pastupleńnia metavikoŭ u VNU. Raniej jany zdavali dva abo try CT u zaležnaści ad śpiecyjalnaści. U 2023 hodzie dla metavikoŭ uviali adzin unutrany ekzamien u vusnaj abo praktyčnaj formie pa profilnym pradmiecie śpiecyjalnaści.

Darečy, pakul paśla metavaj padrychtoŭki vypuskniki VNU musiać adpracavać u zakazčyka nie mienš za 5 hadoŭ. Ale letaś Łukašenka prapanavaŭ razhledzieć mahčymaść pavialičyć u Biełarusi terminy adpracoŭki. U pryvatnaści, dla metavikoŭ — da 7 hadoŭ.

• 1
• 0
• 2
• 0
• 2
• 3
• 5
• 0