Spačatku znajšła karty, a potym kasiety z porna, jakija baćki chavali ŭ čornaj skryni. Biełaruski raskazali pra toje, jak i adkul upieršyniu daviedalisia pra seks

Alesia (43 hady): «Ź dziećmi pra seks praz paru hadoŭ buduć razmaŭlać u škole»

— Na žal, ja zusim nie pamiataju, jak daviedałasia pra seks. Najchutčej ź filmaŭ kštałtu «Maleńkaja Viera». Padhladała praź dźviery, pakul baćki hladzieli jaho pozna ŭviečary. Taksama ŭ amierykanskich filmach zaŭsiody było šmat seksu.

U mianie jość dva syny. Adnamu šeść hadoŭ, druhomu — vosiem. Ź imi na hetu temu my pakul nie razmaŭlali. Jany sa škoły i chatnich dziciačych encykłapiedyj užo trochi viedajuć fizijałohiju, tamu ŭśviedamlajuć, jak naradžajucca dzieci. Ale toje, što jaho možna mieć dziela pryjemnaści ci kab mieć dziaciej, jašče nie abmiarkoŭvali.

My zaraz žyviom u Vialikabrytanii. Tut u dziaciej u škole paśla hadoŭ adzinaccaci pačynajucca zaniatki pa seks-adukacyi. U maich dziaciej jany taksama buduć, dumaju.

Tata im jašče trochi tłumačyŭ, što na pałavy orhan moža spracoŭvać refleks, navat u maleńkich chłopčykaŭ. My možam doma chadzić hołymi, dla nas heta naturalna. Praŭda, dzieci vaśmi hadoŭ užo pačynajuć saromiecca hetaha.

Niahledziačy na toje, što temu seksu my ź dziećmi pakul nie zakranali, my abmiarkoŭvali ź imi čałaviečyja adnosiny. Jany viedajuć, što mohuć zakachacca i žyć razam ci pabracca šlubam ź dziaŭčynaj abo chłopcam, kali takoje žadańnie budzie.

Pavialičyć

Dyjana (31 hod): «Znajšła ŭ telefonie syna pornaroliki, paśla čaho kupiła knihu pa seks-praśviecie»

— Nie pamiataju dakładna, ci ŭśviedamlała ja ŭ rańnim dziacinstvie, što ŭjaŭlaje saboj seks. Ja nikoli nie zastavała baćkoŭ za hetym zaniatkam, a pieršy ŭspamin, źviazany z hetaj temaj, — ihralnyja seks-karty. Ich ja niejak znajšła ŭ babuli ŭ siekcyi. Dumaju, jany naležali jaje mužu.

Na toj momant mnie było hadoŭ ź dziesiać. Heta zanadta mała, kab całkam zrazumieć, čamu na kartach zamiest zvyčajnych fihur namalavanyja hołyja mužčyny i žančyny. Praŭda, ja ŭžo tady adčuvała, što dakranułasia da niečaha zabaronienaha. Zdavałasia, što mianie mohuć pakarać, raz ja ich pamacała.

Potym u maim infapoli źjavilisia kasiety z porna.

Ja była ŭžo krychu starejšaja, hadoŭ z adzinaccać-trynaccać. Znajšła ich taksama vypadkova: jany byli schavanyja ŭ čornaj karobcy biez nadpisaŭ. Napeŭna, baćki byli ŭpeŭnienyja, što heta nadziejnaje miesca: vidzik biez dazvołu ŭklučać było zabaroniena. Chacia kamu pieraškadžajuć zabarony darosłych, kali ty cikaŭnaje dzicia?

Pamiataju, u jakim ja była šoku, kali ŭklučyła zapis i ŭbačyła, što tam adbyvajecca. Tady ja ŭžo razumieła, što takoje seks, ale nie viedała padrabiaznaściaŭ. Dla mianie stała adkryćciom, što siabie možna łaščyć roznymi cackami.

Asobna temu seksu baćki sa mnoj nikoli nie abmiarkoŭvali.

Ciapier majmu synu dziesiać. Ja vychoŭvaju jaho adna. Niadaŭna kupiła jamu knihu pra seks. My pakul jaje nie čytali razam: čakaju prydatnaha momantu, kali budzie lepš zahavaryć pra heta. Padsoŭvać jamu dla samastojnaha vyvučeńnia ja nie chaču, ci mała jak jon usio ŭsprymie.

A voś pra nabyćcio śpiecyjalnaj litaratury ja zadumałasia paśla taho, jak znajšła ŭ jaho na telefonie multyplikacyjnyja pornaroliki. Jamu na toj momant było dzieviać hadoŭ. Ja moŭčki vydaliła ŭsio, pačyściła braŭzier i prosta addała telefon, nie pradjaŭlajučy za heta.

Nasamreč, dumaju, jon užo ź siabrami ŭsio abmierkavaŭ. Ciapier dzieci inšyja: jany raniej atrymlivajuć infarmacyju, čym heta rabili my. Zdajecca, navat u knizie niama sensu.

Ź dziciem ja imknusia padtrymlivać daviernyja adnosiny. Mnie važna, kab nam dvaim było kamfortna havaryć absalutna na roznyja topiki. Adnak usio ž časam škaduju, što pobač niama mužčyny, jaki na roŭnych, jak mužčyna z mužčynam, abmierkavaŭ by z synam usie dalikatnyja temy.

Maryja (22 hady): «Hadoŭ u 10 pačała hladzieć porna»

— Pra seks sa mnoj u dziacinstvie nichto nie razmaŭlaŭ. Mnie kazali, što dzieci biarucca z žyvocikaŭ. Dziakuj, choć biez busłoŭ i kapusty abyšlisia.

Chutčej na moj seks-praśviet paŭpłyvała masavaja kultura. Pamiataju, adnojčy natknułasia na tataŭ časopis Playboy. Potym znajšła ŭ brata karcinki eratyzavanych žančyn.

Vialiki ŭpłyŭ na mianie akazali pornaroliki. Ja pačała ich hladzieć davoli rana, prykładna hadoŭ u dziesiać. Tady ž ja pačała masturbavać, choć mnie i było strašna heta rabić. Spačatku zdavałasia, što ad porna ja zmahu zaciažaryć. Zatym hety strach źmianiŭsia aściarohaj taho, što ad ułasnych piaščot ja, naadvarot, nie zmahu ŭ budučyni zaciažaryć. Tak, seksualnaj adukacyi na toj momant mnie vidavočna nie chapała.

Da razumieńnia taho, što takoje seks, čamu važna i treba zaścierahacca, ja pryjšła sama.

Užo pastaleŭšy, ja pytałasia ŭ mamy, čamu jana nie razmaŭlała sa mnoj u dziacinstvie pra seks. Jana adkazała, što navat nie zadumvałasia pra heta, bo ź joju taksama nichto takich hutarak nie pravodziŭ. Dla siabie ja vyrašyła, što dakładna budu ŭzdymać hetu temu z budučymi dziećmi. Nie chočacca, kab jany bajalisia, jak ja ŭ svoj čas, zaciažaryć ad masturbacyi.

Pavialičyć

Kacia (26 hadoŭ): «Znajšła časopis, u jakim byli pošłyja aniekdoty i eratyčnyja karcinki»

— Upieršyniu pra seks ja zadumałasia, kali hadoŭ u šeść znajšła na dačy ŭ babuli stary i patrapany časopis z pošłymi aniekdotami. Aproč darosłych žartaŭ tam byli karcinki z namalavanymi hołymi mužčynami i žančynami. Pamiataju, što hetyja ilustracyi vyklikali ŭ mianie sumieś cikaŭnaści i ahidy: ludzi tam vyhladali karykaturna i krychu pałochali mianie svaimi nienaturalnymi hołymi ciełami.

Tady ŭ darosłych ja vyrašyła nie pytacca pra znachodku: bajałasia pakarańnia za toje, što biez dazvołu prabrałasia na paddašak.

Zatym ja ŭbačyła svajo pieršaje ŭ žyćci porna. Heta byŭ eratyčny film, jaki krucili nočču pa śpiecyjalnym kanale 18+. Jaho mnie ŭklučyła starejšaja siastra, jakaja pryjšła ŭ toj viečar u moj pakoj sa słovami: «Chočaš pakažu niešta niezvyčajnaje?» Mnie tady było hadoŭ ź siem ci vosiem, siastry — kala piatnaccaci.

Było krychu strašna nazirać za seksam tam, tamu što pra jaho sa mnoj tady nie razmaŭlali. Zdavałasia, što ŭ filmie robiać niešta niapravilnaje i zabaronienaje. Anturažu dadavała i toje, što hladzieli my jaho biazhučnym, kab darosłyja nie daviedalisia, čym my zajmajemsia za začynienymi dźviaryma.

U toj ža viečar siastra mnie zusim krychu raskazała pra seks, paśla čaho my hetu temu nie ŭzdymali. Samoj ładzić razmovu mnie zdavałasia niapravilnym, a siastry vidavočna było cikaviej abmiarkoŭvać seks z adnahodkami.

Zatym nastupiŭ pieryjad pornaapaviadańniaŭ.

Internet tady tolki što źjaviŭsia ŭ šyrokim karystańni. Kaštavaŭ jon dastatkova doraha, tamu treba było ekanomić trafik. Pa hetaj pryčynie ja asabliva nie mahła hladzieć vialikija pornavidea: važyli jany šmat, i ja nie mahła sabie dazvolić marnavać kuču hrošaj dziela 20-chvilinnaha zadavalnieńnia. Na dapamohu pryjšli eratyčnyja apaviadańni, u jakich vielmi padrabiazna apisvaŭsia ŭvieś praces. Časam tam navat byli karcinki, što dadavała anturažu.

Dla mianie sajty z padobnymi tekstami stali niečym nakštałt encykłapiedyi, pa jakoj ja i vyvučała sieks. Baćki tak sa mnoj i nie zahavaryli pra jaho.

Nasamreč ja i sama nie viedaju, jak budu razmaŭlać na takija temy z maimi budučymi dziećmi. Z adnaho boku, seksualnaja adukacyja — važnaja častka staleńnia. Mnie b chaciełasia, kab pra heta havaryli ŭ škole. Ź inšaha boku, mnie nie zusim zrazumieła, jak hetu razmovu pravieści karektna. Pamiataju, što mianie navat ciešyła adsutnaść hutarak pra seks z baćkami. Zdavałasia, što mnie budzie niajomka i niekamfortna.

Kali ja aktyŭna pačała cikavicca hetaj temaj u padletkavyja hady, to ŭžo mieła mahčymaść troški pahuhlić patrebnyja mnie rečy. U dziaciej ciapierašniaha pakaleńnia internet našmat bolš dastupny, čym było ŭ maim dziacinstvie. Mahčyma, im taksama nie buduć patrebny razmovy pra seks z baćkami.

• 12
• 0
• 3
• 2
• 2
• 1
• 3
• 0