Jak viasnoj alerhikam ablehčyć svajo žyćcio?

— Na pryjomie apošnim časam usio bolš baćkoŭ ź dziećmi sa skarhami na zakładzieny nos, mocnyja vadzianistyja vydzialeńni z nosa, ślozaciačeńnie, śvierb u nosie abo ŭ vobłaści vačej, čchańnie. Usio heta moža być prykmietaj palinozu — alerhii na pyłok.

Pavodle statystyki, na hetaje zachvorvańnie pakutuje ad 10 da 30% nasielnictva, i ličba raście z kožnym hodam. Palinoz (alerhičny rynit) maje jarki siezonny charaktar — supadaje ź pieryjadam ćvicieńnia raślin. Usie simptomy zdolnyja da zvarotnaha raźvićcia paśla spynieńnia ŭździejańnia alerhienaŭ ci pry lačeńni.

— Na što najčaściej byvaje alerhija?

— U Biełarusi asabliva značnyja ŭ raźvićci palinozu łuhavyja travy (aŭsianica, rajhras, kupkoŭka i inš.), terminy ćvicieńnia jakich prypadajuć na červień—lipień—žnivień. Voś prykładnyja terminy ćvicieńnia asnoŭnych alerhienaŭ.

Lasny arech kvitnieje ŭ lutym—sakaviku, asina, tapola — 16—30 krasavika, alešyna, laščyna, viarba — 16—25 krasavika, biaroza, klon — 1—15 maja, dub — 20—23 maja, chvoja — 24 maja — 4 červienia, lipa — 18 červienia — 2 lipienia.

Ziołkavyja travy aŭsianica, kupkoŭka, pyrnik ćvituć 5—25 lipienia, lisachvost, rajhras — 5—26 červienia, prosa, žyta, jačmień — 1—20 červienia, kukuruza — 5-20 lipienia, a pustazielnyja travy lebiada, pałyn — u kancy lipienia — žniŭni—vieraśni.

Treba ŭličvać, što pačatak siezona ćvicieńnia moža pieramiaščacca na 1,5-2 tydni ŭ suviazi z klimatyčnymi asablivaściami viasnova-letniaha pieryjadu. Na sajtach mieteasłužbaŭ štodnia možna prasačyć za pakazčykami kancentracyi pyłku ŭ pavietry.

— Jakija asnoŭnyja simptomy palinozu?

— Heta rynit (zapaleńnie ślizistaj nosa), što prajaŭlajecca nasmarkam, zakładzienaściu nosa, čchańniem. Taksama charakterna zapaleńnie ślizistaj abałonki vačej — kanjuktyvit, padčas jakoha nazirajecca pačyrvanieńnie vačej, śvierb, ślozaciačeńnie. Niaredka byvaje krapiŭnica — puchiry na adkrytych učastkach cieła.

Taksama ŭ niekatorych pacyjentaŭ vyjaŭlajecca tak zvanaja pyłkovaja astma. Jak praviła, pavyšajecca reaktyŭnaść branchijalnaha dreva, što prajaŭlajecca branchijalnaj astmaj, asnoŭnyja simptomy jakoj kašal, ciažkaść i šum dychańnia.

Jość i takoje paniaćcie, jak aralny alerhičny sindrom. Heta śvierb u rocie paśla pryjomu ŭ ježu sadaviny, harodniny, zielaniny, arechaŭ, siemak, jakija vyklikajuć pierakryžavanuju alerhiju ź niekatorymi vidami pyłku.

Darečy, što datyčycca pierakryžavanaj alerhii, akazałasia, što dla našaj imunnaj sistemy biaroza padobnaja na jabłyki ci morkvu, łateks (alerhija na łateksnyja palčatki sustrakajecca davoli časta) padobny na kivi, jałavičyna — na soju, klaščy chatniaha pyłu — na łobstara, heta značyć, jany ŭtrymlivajuć ahulnyja ci vielmi padobnyja białki, i imunitet reahuje na ich adnolkava, zapuskajučy alerhičny łancužok u arhaniźmie.

Treba ŭličvać, što apisanyja kliničnyja simptomy časta spałučajucca pamiž saboj, što paharšaje chod zachvorvańnia.

Kali ŭ vas jość padobnyja simptomy i nielha vyklučyć palinoz, treba źviarnucca da doktara-alerhołaha, dzie paśla praviadzieńnia roznych prob i testaŭ budzie vyjaŭleny alerhien i pryznačana lačeńnie.

— Jak ža viasnoj alerhikam ablehčyć svajo žyćcio?

— Najpierš pramyvać nos izataničnym solevym rastvoram (fizrastvor i jaho anałahi). Hetym prostym sposabam uvilhatniajecca ślizistaja nosa i zmyvajucca čaścicy pyłku. Zvyčajna ŭ pieryjad abvastreńnia vykarystoŭvać rastvor treba da 6-8 razoŭ u sutki pa 2-4 dozy ŭ kožnuju nozdru.

Abmiažujcie prahułki ŭ park, les, na łuh u siezon pyleńnia asnoŭnych alerhienaŭ. Vykarystoŭvajcie akulary, jany dapamohuć abaranić vočy ad uździejańnia pyłku.

Nieabchodna ŭličvać, što šerah pakajovych raślin (hierań, prymuła) i kvietak (bez, jaźmin, ruža, łandyš, fijałka) majuć pierakryžavanuju alerhiju z pyłkom dreŭ, łuhavoj travy i pustaziella, apasrodkavana zapuskajučy alerhičny praces.

Doma ŭstalujcie filtr dla pavietra. Padtrymlivajcie hipaalerhienny pobyt: prybiarycie dadatkovyja razdražnialniki — cyharetny dym, parfumieryju, chimičnyja pary, fiermienty ŭ sastavie pralnych paraškoŭ.

Na pieryjad ćvicieńnia raślin vokny ŭ kvatery varta začyniać, asabliva ŭ ranišnija hadziny, vialikaja častka pyłku vykidvajecca raślinami mienavita ŭ hety čas (ad uschodu sonca da 9 hadzin ranicy). Pravietryvajcie ŭviečary — niadoŭha, ale intensiŭna.

Doma rekamiendujecca pieraapranacca z vuličnaha adzieńnia. Možna pryniać duš, kab zmyć ź cieła reštki pyłku.

Kali ŭ vas jość pierakryžavanaja alerhija, prytrymlivajciesia dyjety z vyklučeńniem tych praduktaŭ, jakija vyklikajuć simptomy. Zvyčajna pry alerhii da pyłku biarozy vyklučajucca jabłyki, čarešnia, piersiki, ślivy, arechi, morkva, sielderej, bulba; da pyłku złakaŭ — ščaŭje i pradukty na asnovie złakaŭ; da pyłku pałynu — cytrusavyja, cykoryj, miod.

— Apošnim časam šmat havorać pra lačeńnie alerhii mietadam śpiecyfičnaj imunaterapii. Raskažycie pra jaho.

— Sapraŭdy, najbolš efiektyŭnym prafiłaktyčnym mierapryjemstvam pry palinozie źjaŭlajecca likvidacyja pryčynnaha alerhienu mietadam śpiecyfičnaj imunaterapii. Nasamreč jon nie novy i vykarystoŭvajecca bolš za 100 hadoŭ. Sutnaść mietadu zaklučajecca ŭ tym, što ŭ arhanizm čałavieka rehularna ŭvodziać raźviedzieny alerhien z pastupovym naroščvańniem kancentracyi da maksimalna dapuščalnaj.

Z časam heta pryvodzić da taho, što imunnaja sistema pierastaje baluča reahavać na razdražnialnik i nie prymaje jaho za čužarodny ahient. Pastupova hety sposab lačeńnia alerhii całkam likviduje zachvorvańnie. Takim čynam, alerhienśpiecyfičnaja imunaterapija (ASIT) źjaŭlajecca lačebna-prafiłaktyčnaj praceduraj, nakiravanaj na karekcyju imunnaha statusu z nastupnym lačeńniem alerhičnaha zachvorvańnia. Praciahłaść takoj terapii — 3-5 hadoŭ, padbiraje jaje alerhołah.

Lačeńnie palinozu kompleksnaje i pryznačajecca indyvidualna alerhołaham, u zaležnaści ad skarh i ciažaru zachvorvańnia. Preparaty prymajucca pierad pačatkam siezona ćvicieńnia ci adrazu z pačatku ćvicieńnia «vašych» alerhienaŭ, nie čakajučy ŭźniknieńnia simptomaŭ. Nahadvaju, što ciažarnym i žančynam, jakija kormiać dzicia, mnohija ź lekaŭ dazvoleny, tamu nie treba ciarpieć i mučyć siabie.

Uličvajučy aktualnaść dadzienaj prablemy ŭ paliklinikach pracujuć «alerhaškoły», dzie rehularna pravodziacca sieminary, lekcyi i dajecca padrabiaznaja infarmacyja. Prafiłaktyčnyja mierapryjemstvy, vykonvańnie schiem lačeńnia dazvalajuć dabicca stojkaj remisii chvaroby i palepšyć jakaść žyćcia pacyjentaŭ.

• 0
• 0
• 1
• 0
• 0
• 0
• 1
• 0