«Navošta vy tak z nami, ź biełarusami?» Laŭčuk raskazała, što nie moža atrymać dazvoł na žycharstva va Ukrainie
Śpiavačka Marharyta Laŭčuk zajaviła, što choča žyć va Ukrainie, ale nie moža aformić dazvoł na žycharstva. U instahramie jana raskazała pryčynu i źviarnułasia da ŭkraincaŭ.
Laŭčuk kaža, što z 2020 hoda nie žyvie ŭ Biełarusi z-za pieraśledu režymam Łukašenki, što ŭ vyšuku ŭ Biełarusi i Rasii, na jaje zaviedziena kryminalnaja sprava. Ciapier jana va Ukrainie ŭ składzie «kulturnaha desantu» jeździć pa froncie i śpiavaje dla abaroncaŭ Ukrainy.
Marharyta kaža, što choča žyć va Ukrainie, tamu zaniałasia dakumientami, kab atrymać na dazvoł na žycharstva.
«Usie da mianie dobra staviacca: mihracyja, pamiežniki, usie ludzi, našy voiny-hieroi, niahledziačy na toje, što ja biełaruska». A voś strachavyja kampanii admaŭlajucca rabić miedycynskuju strachoŭku praź biełaruski pašpart.
«Usio roŭna, što ty robiš dla Ukrainy, usim pofih. Tolki praz toje, što ŭ ciabie biełaruski pašpart, ty nie atrymaješ vid na žycharstva», — havoryć jana.
Laŭčuk kaža, što strachavyja kampanii damovilisia miž saboju nie davać biełarusam strachoŭki.
«Ja kažu, a dzie taki zakon? Tam nie prapisana!» — «Nie, nie prapisana, prosta my tak damovilisia».
Marharyta raskazvaje, što adnojčy ŭsio ž joj skazali, što daduć strachoŭku, ale zaprasili za jaje 4700 hryvień (400 rubloŭ), chacia nasamreč kaštuje 1400 hryvień (120 rubloŭ). Laŭčuk kaža, što choča, kab usio było pa zakonie, i jana choča strachoŭku atrymać.
Marharyta raspaviadaje, što praz heta ŭsio apuskajucca ruki i hublajecca žadańnie niešta rabić.
«Ludzi, ukraincy, nu nie budźcie vy jak režym Łukašenki i Pucina. Navošta vy tak z nami, ź biełarusami? My vas lubim. I my chočam, kab da nas dobra stavilisia. My nie łukašysty. Nas tysiačy nie žyvuć u Biełarusi, tysiačy znachodziacca ŭ turmach. Ja nie lublu vynosić svarki z chaty, ale mnie kryŭdna za niekatorych ukraincaŭ», — skazała jana.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary