U Litvie na miažy ź Biełaruśsiu zatrymali pieršy aŭtamabil z rasijskimi numarami. Ciapier tak buduć rabić zaŭsiody
11 sakavika litoŭskija mytniki ŭ Miednikach zatrymali pieršy lehkavy aŭtamabil z rehistracyjnymi znakami Rasijskaj Fiederacyi. Hramadzianin Małdovy jechaŭ na im ź Litvy ŭ Biełaruś, piša Delfi.lt. Ale z hetaha paniadziełka takoha rabić nielha.
Incydent byŭ zarehistravany a 23-j hadzinie. Na KPP u Miednikach pryjechaŭ aŭtamabil Audi Q7 z rasijskimi numarami, jaki byŭ zatrymany. Vyśvietliłasia, što ŭładalnica aŭto — hramadzianka Rasii, a kiroŭca, hramadzianin Małdovy, jechaŭ bieź jaje.
Kiroŭcu aznajomili ź dziejnymi z 11 sakavika 2024 hoda praviłami i infarmavali, što jaho čakaje štraf i kanfiskacyja aŭtamabila. Byŭ składzieny pratakoł ab administracyjnym pravaparušeńni. Mašyna koštam 41 690 jeŭra zatrymanaja. Chutčej za ŭsio, jana budzie kanfiskavanaja i pieradadzienaja dla patreb Ukrainy.
Reč u tym, što z paniadziełka va ŭsim Jeŭrasajuzie nie pavinna ŭvohule zastacca aŭtamabilaŭ z rasijskimi numarami. Da 11 sakavika zarehistravanyja ŭ Rasii aŭtamabili pavinny byli pakinuć jaho terytoryju, a chto patrabavańnie praihnaruje — tym štraf abo kanfiskacyja aŭtamabila. I choć kiroŭca klaŭsia, što hetaha nie viedaŭ, ale niaviedańnie ad adkaznaści nie vyzvalaje.
Vyklučeńnie prymianiajecca tolki da hramadzian Rasii, jakija kirujucca na zarehistravanych u Rasii transpartnych srodkach tranzitam u Kalininhradskuju vobłaść abo ź jaje pa sproščanych tranzitnych dakumientach. Adnak taki pierajezd nie moža doŭžycca bolš za 24 hadziny, i padčas prajezdu tranzitam u transpartnym srodku abaviazkova pavinien znachodzicca jaho ŭładalnik.
Čały: Čym daŭžej Łukašenka marudzić z vybarami, tym bolš arhumientaŭ, kab jamu nie iści15
Kamientary