Z Hrodna ŭ Biełastok — za 43 hadziny. Biełaruski aŭtobus pastaviŭ rekord pa časie na miažy
Čytačka vydańnia «Most» Alena, imavierna, pastaviła rekord pa praciahłaści pajezdki z Hrodna ŭ Biełastok. Daroha na aŭtobusie 8 sakavika zaniała ŭ jaje 43 hadziny. Žančyna raskazała, jak tak vyjšła.
U lepšyja časy z Hrodna ŭ Biełastok možna było dajechać za 2,5-3 hadziny. Ciapier, kali z boku Hrodzienskaj vobłaści punkty propusku na biełaruska-polskaj miažy zakrytyja, šlach lažyć praź Litvu ci Brest i zajmaje našmat bolš času.
Uviečary 7 sakavika na vyjeździe ź Biełarusi ŭtvarylisia vializnyja čerhi. Adbilisia dva faktary: doŭhija vychadnyja ŭ Biełarusi (u takija dni turysty achvotna płanujuć pajezdki za miažu) i padvyšanaja nahruzka na punkty propusku: z 1 sakavika Litva zakryła dva pierachody na miažy ź Biełaruśsiu — «Pryvałku» i «Katłoŭku».
Alena vyjechała z Hrodna aŭtobusam u hadzinu nočy 8 sakavika. Heta byŭ rejs polskaha pieravozčyka, ź jakim žančyna padarožničaje nie ŭpieršyniu. Minuły raz, naprykancy lutaha, jana viartałasia ŭ Biełaruś aŭtobusam toj ža kampanii, daroha ź Biełastoka ŭ Hrodna praz «Pryvałku» zaniała 6 hadzin.
Da doŭhich pierachodaŭ miažy žančyna była hatova. Časam joj davodziłasia pravodzić u darozie 10-12 hadzin, a maksimalny čas, jaki Alena kali-niebudź stajała na miažy, składała 13 hadzin.
Bilety na aŭtobus Alona, jak zaŭsiody, kuplała na sajcie polskaha pieravozčyka, tak što pradčuvańnia, što na hety raz niešta moža pajści nie tak, u jaje nie było.
«Stali 27-mi ŭ čarhu da turystyčnych aŭtobusaŭ»
Kali pasažyry sieli ŭ aŭtobus, Alona spytała, praź jaki punkt propusku jany pajeduć, bo «Pryvałka» začynienaja. Joj adkazali, što praz «Brest», i heta jaje nie naściarožyła.
— Praz try hadziny byli na miažy. I tut vyśvietliłasia, što ŭ hetaha pieravozčyka niama licenzii, kab jeździć jak rejsavamu mienavita na hetym punkcie propusku. My stali 27-mi ŭ čarhu da turystyčnych aŭtobusaŭ. A ŭ rejsavaj čarzie stajała tolki 7-9 aŭtobusaŭ.
Alona padkreślivaje, što navat kali b aŭtobus jechaŭ jak rejsavy, prachodžańnie miažy było b doŭhim. Ale turystyčnaja čarha i zusim amal nie ruchałasia.
— U palakaŭ pracavaŭ tolki adzin «pas», pa jakim prapuskali aŭtobusy, tamu schiema była takaja: brali try rejsavyja aŭtobusy, [potym] adzin turystyčny. Potym znoŭ — try rejsavyja, adzin turystyčny, — raskazvaje Alena.
30 dołaraŭ za miesca da Varšavy
Čarha turystyčnych aŭtobusaŭ była nastolki doŭhaj, što pieravozčyki, kali pryjazdžali, u jaje navat nie stanavilisia — vysadžvali pasažyraŭ na miažy, razvaročvalisia i zjazdžali. A ludzi šukali sposaby prajści miažu ź inšymi aŭtobusami ci lehkavymi aŭtamabilami.
Tak pastupiła i bolšaja častka pasažyraŭ rejsa, jakim jechała Alena. Jany dapłačvali za bilet i šukali miescy ŭ inšych rejsavych aŭtobusach. Dajechać da Varšavy kaštavała da taho momantu kala 30 dołaraŭ, a hrošy za bilet na aŭtobus bieź licenzii im, samo saboj, nie viartali.
— Na praciahu niekalkich hadzin, [paśla taho] jak my pryjechali, bitkom nabity naš aŭtobus razyšoŭsia pa inšych aŭtobusach… U vyniku da Biełastoka z tym ža pieravozčykam dajechała, moža, čałavieki čatyry.
«Im pašancavała zekanomić sutki času»
Da ranicy 8 sakavika situacyja abvastryłasia.
— Stali jechać rejsavyja [aŭtobusy] pa ŭsich napramkach: Hdańsk, Poznań, Hdynia, Terespal… Čarha turystyčnych nie źmianšałasia.
Praz sutki, u hadzinu nočy 9 sakavika, z Hrodna vyjšaŭ nastupny aŭtobus taho ž pieravozčyka. Ale pakolki aŭtobus, u jakim jechała Alona, da taho momantu byŭ amal pustym, usich 33 pasažyraŭ z novaha aŭtobusa pierasadzili ŭ aŭtobus, jaki ŭžo bolš za sutki stajaŭ u čarzie — tak jaho pasažyry zekanomili čas i, naturalna, ničoha nie dapłačvali, tamu što jechali z tym ža pieravozčykam.
— Im pašancavała zekanomić sutki času, — tłumačyć Alena.
Pavodle jaje słoŭ, lehkavyja mašyny prachodzili miažu chutka, tamu metazhodniej za ŭsio było damovicca z kiroŭcami asabistych mašyn i padsieści da ich.
U vyniku 9 sakavika ŭ 13:15 pa biełaruskim časie aŭtobus vyjechaŭ ź miažy.
Ale jahony maršrut pralahaŭ praz Varšavu. Da polskaj stalicy pajezdka zaniała 2,5 hadziny, a ŭžo adtul bort nakiravaŭsia ŭ Biełastok. U punkt naznačeńnia žančyna dabrałasia tolki da 20:00 pa minskim časie.
Žančyna kaža, što zaraz doŭha nie zmoža nabracca sił dla novaha padarožža ŭ Polšču.
«Aŭtobus byŭ zabity jak na Novy hod». Jak z pajezdkami za miažu paśla zakryćcia dvuch prapusknych punktaŭ?
Hruzavikoŭ šmat, lehkavych mała. Što adbyvajecca na miežach Biełarusi praz tydzień paśla zakryćcia dvuch punktaŭ propusku
«Adrazu navat nie zrazumieli, jak usio kiepska». Biełarus raskazaŭ, jak pierasiakaŭ polskuju miažu
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary