Aktrysa hraje paranaidalnaha kanclera vydumanaj jeŭrapiejskaj krainy ŭ novym sieryjale HBO, jaki vyjšaŭ na ekrany 3 sakavika.
Varjactva — niedaacenieny elemient suśvietnaj historyi, jaki, adnak, jarka pakazany ŭ novym sieryjale «Režym», dzie hałoŭnuju rolu vykonvaje viadomaja Kiejt Uinślet. Hetuju biesturbotnuju čornuju kamiedyju možna ličyć u niejkim sensie ahladam varjactva XX stahodździa — choć, vierahodna, vykarystoŭvać hety film u jakaści navučalnaha dapamožnika dla tych, chto piša kursavuju rabotu, nie varta, piša ahladalnik Džon Andersan dla WSJ.
Alena Viernem (u anhlijskaj movie jaje proźvišča lohka zbłytać z suhučnym vermin — škodnik) — psichična niezdarovaja caryca, čyja kraina lažyć «niedzie ŭ Siaredniaj Jeŭropie». Pałac urada spałučaje šyryniu Łuŭra z estetykaj Ermitaža. Abstanoŭku ŭ im možna acharaktaryzavać jak paranaidalnuju: Alena poŭnaja fobij, patałahična naściarožanaja, pomślivaja i narcysičnaja. Jana nievypadkova źjaŭlajecca «kancleram» svajoj krainy, a jaje muža nievypadkova zavuć «Niki» (u honar Ramanavych). U pačatku sieryjała jość padabienstva z satyryčnaj kamiedyjaj «Śmierć Stalina» 2017 hoda, i nie tolki tamu, što aktrysa Andrea Rajzbara hraje ŭ abiedźviuch stužkach (tam jana hraje dačku Stalina, a ŭ novym sieryjale — adnu sa šmatlikich achviar-pasobnic Aleny).
Kali pakinuć ubaku temu aŭtarytarnaści, «Režym» možna nazvać nadzvyčaj śmiešnym i zabaŭlalnym, za što šmat u čym varta dziakavać Kiejt Uinślet. Jaje styl biezdakorny i paznavalny na praciahu ŭsiaho sieryjała: raśpieščanaja, fihurystaja i ŭ toj ža čas nieruchomaja, jak skulptura, jana amal «ulitaja» ŭ sukienki kaściumierki Kansałaty Bojł, jakija znaročysta trochi ciesnyja i niazhrabnyja.
Alena — sporafob i ćvilafob, jaki patrabuje pastajannaha kantrolu vilhotnaści ŭ pałacy. Adnak, niahledziačy na svaju fanatyčnuju luboŭ da hihijeny, jana zachoŭvaje trup svajho baćki-palityka ŭ šklanoj skryni, jak Cho Šy Mina. Jana razmaŭlaje ź im padčas kryzisu. Časam jon adkazvaje. Heta asabliva važna paśla taho, jak Alena dazvalaje svajmu praŭleńniu zachapić «miaśnika» Hierbierta Zubaka — sałdata, jaki stanovicca Raspucinym u hetaj historyi. Ci budzie Hierbiert pabity, atručany, zastreleny abo ŭtopleny? Mahčyma. Ale adrazu raskazać pra heta budzie zanadta vialikim spojleram.
Hierbierta pryvodziać u pałac paśla niepryjemnaha incydentu: 12 šachcioraŭ pa zdabyčy kobaltu pratestavali suprać svaich umoŭ pracy i byli zabityja jaho sałdatami. Čamu jon prosta nie źnik? Tamu što jaho žorstkaść jakraz daspadoby Alenie. Spačatku jana najmaje jaho ŭ jakaści kantralora ŭzroŭniu ćvili, što patrabuje ad jaho ŭvachodzić u kožny pakoj napieradzie jaje i pahadžacca z kožnaj jaje vysnovaj pra «atručanuju» atmaśfieru. Ale Hierbiert — zmučany samabičavalnik i ŭ peŭnym sensie — balšavicki idyjot — zusim nie durań, kali sprava datyčyć čałaviečych instynktaŭ. Jon uvachodzić u davier da Aleny i ŭrešcie pačynaje ŭpłyvać na palityku: jamu navat udajecca dadać hraź u mieniu pradstaŭnikoŭ urada i, da ździŭleńnia Aleny i adčaju jaje ministraŭ, abjavić palityku ziamielnaj reformy i izalacyjanizmu. Kraina voś-voś moža razvalicca. Jaje siabroŭstva z ZŠA razarvanaje. Treba terminova niejak vypravić situacyju.
Chju Hrant źjaŭlajecca na ekranie prykładna ŭ siaredzinie sieryjała — vyhladaje na toje, što z uzrostam jon tolki lepšaje. Nu a Kiejt Uinślet zasłuhoŭvaje našaj nieasłabnaj uvahi, bo pieratvaraje biassprečna zvarjaciełuju i hidkuju Alenu ŭ adno z najvyšejšych dasiahnieńniaŭ svajoj karjery.
«Apienhiejmier» i «Niebaraki» stali tryumfatarami, a «Barbi» zastałasia ni z čym
Čaćviorty siezon «Sapraŭdnaha detektyva»: zima, ciemra, žančyny i vuściš
Andrej Dźmitryjeŭ źjeździŭ u Bundestah, kab davieści nieabchodnaść udziełu Łukašenki ŭ mirnych pieramovach10
Kamientary