«Škada, što źbivaju vašyja płany. Ale mianie bolej niama»: tatu-majstrycha ź Viciebska ŭ instahramie raspaviała pra samahubstva
Na akaŭnt moonzytattoo ŭ instahramie padpisana bolš za 23 tysiačy čałaviek. Dziaŭčyna ź Viciebska, jakuju zavuć Kaciaryna, robić vielmi miłyja tatu — u jaje tvorčaści šmat prychilnikaŭ. Ale ŭčora dziaŭčyna vykłała niezvyčajnaje videa. Miarkujučy pa im, možna było zrazumieć, što jana płanuje zabić sabie. Padpisčyki stali šukać varyjanty vyratavać jaje žyćcio.
Pa vielmi emacyjanalnym videa dziaŭčyny, dzie jana amal uvieś čas płača, składana zrazumieć situacyju.
− Darahija siabry, maje klijenty. Ja vymušana admianić vašyja zapisy. Na žal, tak atrymałasia, što majo dzicia pamierła. I adziny čałaviek, jaki musiŭ być sa mnoj, admoviŭsia ad mianie. Z takoj žorstkaściu, što vy navat sabie nie ŭjaŭlajecie. Mnie vielmi škada, što ja admianiaju zapis. Mnie vielmi škada, što ja źbivaju vašyja płany. Ale mianie bolej niama. Ja vielmi mocna starałasia, ja praz usio prajšła sama. Mianie nie padtrymali ni słovam, ničym, nijak… Ja praz usio išła sama, maleńkaja dziaŭčynka Kacia… I ja nie spraviłasia. Mianie bolš niama. Budźcie, kali łaska, dobrymi ludźmi.
Taksama ŭ apisańni profilu tatu-majstrycha napisała: «Byvajcie. Prabačcie mnie, kali łaska». Zrazumieŭšy, što dziaŭčynu patrebna ratavać, jaje padpisčyki pačali šukać varyjanty heta zrabić — uličvajučy toj fakt, što šmat času na heta nie było. Niechta pisaŭ kranalnyja kamientaryi, chtości sprabavaŭ datelefanavacca praź instahram i pa mabilnaj suviazi, chtości źviazvaŭsia z mamaj Kaciaryny. Patelefanavali i ŭ milicyju.
Zaraz siabroŭki dziaŭčyny paviedamlajuć, što Kaciaryna razam z mamaj znachodzicca ŭ balnicy.
Treba adznačyć, što siarod kamientataraŭ znajšlisia i tyja, chto pačaŭ paprakać dziaŭčynu ŭ tym, što jana vykłała emacyjanalna ciažki kantent u internet.
«Naša Niva» źviarnułasia da psichołaha (imia nie nazyvajem pa jaho prośbie) z pytańniem, što rabić, kali raptam ty bačyš u sacyjalnych sietkach, što tvoj znajomy ŭ adnym kroku ad suicydu.
− Kali vy pabačyli ŭ sacyjalnych sietkach jak vaš siabra ci znajomy raspaviadaje pra svajo samahubstva, pasprabujcie źviazacca ź im ci ź jaho svajakami. Abiarycie samy chutki sposab. Prapanujcie svaju dapamohu. Možna skazać, što vy razumiejecie jak ciažka, što ŭ hety čas nie vidna inšaha šlachu, ale treba niejak supakoicca. Adnačasova treba jechać da čałavieka ci znajści taho, chto moža heta zrabić.
Jość dobraja navina: kali čałaviek kaža pra samahubstva publična, heta značyć, što jon jašče sumniavajecca — i jaho mahčyma spynić. Kali raptam vy dumajecie, što čałaviek «choča prosta pryciahnuć da siabie ŭvahu», ustrymajciesia ad acenki. Kali vy nie źbirajeciesia dapamahać čałavieku, ci nie razumiejecie, što rabić, lepš prajści mima, čym asudžać.
Samaje drennaje, što možna zrabić, heta pačać krytykavać i abvinavačvać. Bo čaściej za ŭsio da samahubstva pryvodzić pačućcio viny. Takim čynam, kali idzie havorka pra žyćcio, zaŭsiody treba stavicca da hetaha vielmi surjozna i svajo mierkavańnie trymać pry sabie. Hałoŭnaje — nie naškodzić.
U Minsku dziesiacikłaśnica ździejśniła suicyd. Pierad hetym jana razdała svaje rečy znajomym
Biełaruska, jakaja pieražyła vostry psichoz i dźvie sproby samahubstva, zapuściła prajekt dapamohi ludziam ź mientalnymi prablemami
Pa fakcie śmierci biełarusa ŭ varšaŭskim izalatary zaviedziena kryminalnaja sprava pa artykule «daviadzieńnie da samahubstva»
Kamientary