«Nam udałosia vyrvać chłopcaŭ z paščy hetaha krakadziła litaralna ŭ apošni momant». Padrabiaznaści, jak vyzvalali «Bi-2»
Detali taho, jak udałosia nie dapuścić departacyi muzykaŭ «Bi-2» u Rasieju, ŭ efiry «Nastojaŝieho vriemieni» raspavioŭ rasiejski palityk Dźmitryj Hudkoŭ, jaki ŭvieś hety čas znachodziŭsia na suviazi z artystami i advakatam.
— Vy brali ŭdzieł u vyzvaleńni muzykaŭ «Bi-2», kab ich nie departavali ŭ Rasieju. Raskažycie pra heta. Z kim vy kantaktavali?
— Tut nasamreč nijakaha efiru nie chopić, kab usio raskazać. Mahu skazać, što ŭsio atrymałasia dziakujučy ŭdziełu vielizarnaj kolkaści ludziej, dypłamataŭ, jak užo skazali muzyki, i spryjalnamu źbiehu abstavinaŭ.
Tamu što ŭčora byŭ vyrašalny dzień, i kali my atrymali ŭsie ŭzhadnieńni, na rejs, na jakim chłopcy prylacieli, nie było nivodnaha bileta. Potym niejkim cudam Maksim Kac znajšoŭ try.
My spačatku pryniali rašeńnie kupić kvitki tolki tym, chto vałodaje vyklučna rasiejskimi pašpartami. A nastupnyja try my arhanizavali litaralna prama za niekalki hadzin, źviazaŭšysia praź izrailskich dypłamataŭ z avijakampanijaj, znajšli troch pasažyraŭ, jakija sastupili kvitki i hatovyja byli lacieć nastupnym dniom, ich pieraaformili na chłopcaŭ. Uvohule, cełaja śpiecapieracyja.
Ja vielmi rady, što ŭsio skončyłasia stanoŭča, ale treba razumieć, što tut vielizarnaja rola MZS Izraila i asabista konsuła, jaki byŭ z nami ŭsie hetyja piać dzion i praduchiliŭ samaje niebiaśpiečnaje — departacyju ŭ Maskvu pramym rejsam. Ja tak miarkuju, jany chacieli prama z Pchukieta ich vyvieźci, pakul nichto nie zrazumieŭ usiu surjoznaść situacyi. My heta ŭsio adbili.
A dalej užo pryjšłosia padklučyć usich, akramia MZS Izraila: i aŭstralijski MZS, i konsuła, i pasła, i MZS Hiermanii, i amierykanskich dypłamataŭ. Ale, jak mnie ŭžo ŭčora skazali,
kiejs «Bi-2» byŭ na ŭsich stałach va ŭsich jeŭrapiejskich MZS.
Tamu dziakuj bohu, što nam udałosia vyrvać chłopcaŭ z paščy hetaha, tak by mović, krakadziła — litaralna ŭ apošni momant.
Ja vydatna razumieju, što heta była śpiecapieracyja rasiejskich śpiecsłužbaŭ — dla taho, kab prademanstravać usim nam, jakija znachodziacca za miažoj krytykam Pucina, što jany mohuć dastać kaho zaŭhodna dzie zaŭhodna. Im patrebny byŭ taki toŭsty trafiej. Ale voś, dziakuj bohu, nam udałosia heta praduchilić.
— Vy raspaviali pra dziejańni MZS Izraila, MZS Aŭstralii. Ci byŭ niejki supraciŭ z boku ŭłasna rasiejskich uładaŭ? Što jany rabili ŭ hety momant?
— Biezumoŭna. My ž užo ŭzhadnili na treci dzień departacyju ŭ Izrail, kupili kvitki ŭsim, i ŭsio było damoŭlena. A na ranicu prosta prychodzić vysokapastaŭleny dypłamat z rasiejskaj ambasady, niešta z kimści pieracierli ŭ [mihracyjnaj słužbie], i dalej usie kvitki byli anulavanyja, akramia bileta Lovy.
Prosta bilet Lovy jany nijak nie mahli anulavać, jon hramadzianin Izraila i prylacieŭ pa izrailskim pašparcie. A piać muzykaŭ lacieli pa rasiejskich pašpartach.
Tut była hałoŭnaja dypłamatyčnaja bitva mienavita z nahody muzykaŭ, jakija vyklučna hramadzianie Rasiei.
— Jak heta pracuje? Napeŭna, hledačy taksama nie razumiejuć, jak urad krainy moža anulavać avijabilety?
— Nie ŭrad, a mihracyjnaja słužba. Jana pavinna ŭzhadnić bilet, kab ciabie kanvairavali ŭ aeraport i pasadzili na samalot.
Ciabie davodzić mihracyjnaja da pašpartnaha kantrolu, pravodzić na rejs, i tolki tam tabie addajuć pašpart. To-bok, kali mihracyjnaja nie pryznaje hetyja kvitki, ciabie prosta nikudy nie paviazuć ni na jakim aŭtobusie.
Tut, treba heta razumieć, usio vyrašałasia na ŭzroŭni premjer-ministra Tajłanda. Pra heta skazaŭ Šura, jakoha pravodziŭ ministr zamiežnych spraŭ Tajłanda.
Tam byli pasły, usio ŭzhadniałasia, jak mnie skazali, z premjer-ministram, jaki asabista nie staŭ sustrakacca, navat pieršapačatkova nie płanavaŭ ź im sustreču. Mabyć, jamu patłumačyli, što heta mižnarodny skandał, što heta ŭdaryć pa turystyčnaj halinie, što ŭ Maskvie, u Rasiei muzykaŭ čakaje palityčny pieraśled.
Čamu ŭklučylisia astatnija dypłamaty? Tamu što mižnarodnaje prava praduhledžvaje abaronu ad palityčnych pieraśledaŭ. A tut jany ŭ najaŭnaści: i abvinavačvańni Zacharavaj u sponsarstvie teraryzmu, a deputat Łuhavy prosta pramym tekstam paabiacaŭ muzykam turmu. Heta ŭsio dypłamaty sabrali, pieraviali, prynieśli, i heta ŭsio niekalki hadzin surjozna abmiarkoŭvałasia.
Nam treba było terminova ich evakuiravać, bo my aścierahalisia, što ŭžo siońnia budzie zvarotny chod rasiejskich śpiecsłužbaŭ i rasiejskaha MZS razam z ambasadaj, bo jany mahli padklučyć jakija zaŭhodna suviazi. Ja niadaŭna pračytaŭ, što ledź nie Kavalčuk zjaŭlajecca Hanarovym konsułam u Tajłandzie.
— Davajcie pahavorym padrabiaźniej pra pazicyju ŭładaŭ Tajłanda. Čamu ŭvohule mahčyma, što pa niejkich zapytach Rasiei jany zatrymlivajuć ludziej?
— Tajłand zacikaŭleny ŭ rasiejskich turystach, a rasiejskaja dyjaspara pabiła ŭsie rekordy skupki nieruchomaści. Heta značyć, jany ŭnosiać vialiki ŭkład u ekanomiku Tajłanda. Tamu kali dypłamaty ciabie pra niešta prosiać, to ty hetuju prośbu vykonvaješ.
I kali Hienieralny konsuł Sasnoŭ telefanavaŭ u mihracyjnuju słužbu i palicyju, tam ža nie viedali, pra što havorka: «Nu, niejkija muzyki, dy i chren ź imi, nu, prosiać ich u Maskvu adpravić, a čaho b nie adpravić».
I tolki kali my padniali hetuju chvalu ŭ śviecie, va ŭsich zachodnich ŚMI, u samych rezanansnych, paśla hetaha nam udałosia prosta adbić chłopcaŭ i vynieści heta ŭsio na palityčny ŭzrovień.
Ja mahu skazać, što tam pieršapačatkova płanavałasia. Była abjava ŭ tajskim čacie, prychilniki skinuli. Chłopcy spačatku nie źviarnuli ŭvahu, ale ja adrazu napružyŭsia.
A tam była takaja abjava: «Płacim takija-to hrošy, chto zdymie muzykaŭ «Bi-2» siońnia ŭ aeraporcie Pchukiet, prykładna dziažuryć da 22:00». Ja kažu: «Chłopcy, vy čaho, nu-ka, davajcie hladzieć».
Ja pahladzieŭ na aviasejłz, a tam pramy rejs Pchukiet — Maskva roŭna ŭ 23 hadziny z čymści. Ja kažu: «Treba terminova izrailskamu konsułu telefanavać, treba dziažuryć, treba kantralavać».
My nastojvali na tym, kab ich pryvieźli ŭ Banhkok, a nie ŭ aeraport.
Nam udałosia pieradać im sumku, dzie byŭ telefon, i my sačyli za aŭtobusam u tielehramie live location (hieałakacyja ŭ režymie realnaha času).
«Nam usie kazali, što heta zakaz ruskaha konsulstva, kab nas ekstradavać u Rasiju». «Bi-2» prakamientavała svajo zatrymańnie
Nie tolki «Bi-2». Palavańnie na zorak z antyvajennaj pazicyjaj u Tajłandzie idzie pa zamovie MZS Rasii
Udzielnikaŭ hurta «Bi-2» trymajuć na śpiocy ŭ kamiery pad adkrytym niebam
Kamientary