Biełaruski artyst źniaŭsia ŭ sieryjale ad Netflix i stvaralnikaŭ «Hulni tronaŭ»
21 sakavika na płatformie Netflix vyjdzie sieryjał «Zadača troch cieł» (3 Body Problem) — šmatabiacalnaja fantastyka ad stvaralnikaŭ «Hulni tronaŭ». U pierśpiektyŭnym prajekcie źniaŭsia 37-hadovy biełaruski akcior Micia Saviełaŭ.
Dla Saviełava, byłoha dyrektara Change.org pa Uschodniaj Jeŭropie i Centralnaj Azii, «Zadača troch cieł» — nie pieršy hučny prajekt. Hod tamu jon zaśviaciŭsia ŭ piatym siezonie sieryjała «Karona», dzie syhraŭ pierakładčyka Jelcyna, a ciapier, jak bačym, trapiŭ u novy bujny sieryjał. Pra heta biełarus napisaŭ u svaim fejsbuku.
Prajekt «Zadača troch cieł» zasnavany na viadomym ramanie kitajskaha piśmieńnika Lu Cysinia, heta adna z samych papularnych navukova-fantastyčnych knih apošniaha času. Ciaham vaśmi sieryj Netflix praviadzie hledačoŭ pa roznych kantynientach i epochach — ad Kitaja 1960-ch i tahačasnaj «kulturnaj revalucyi» da ciapierašnich vulic brytanskaha Oksfarda i pamiaškańniaŭ AAN u Ńju-Jorku.
Heta pieraplacieńnie šmatlikich historyj, abjadnanaje adnoj vialikaj ekzistencyjalnaj pahrozaj — sustrečaj ź inšapłaniecianami, jakaja, pavodle «Zadačy troch cieł», adbudziecca praz peŭny čas. Da jaje varta padrychtavacca, ale jakim musić być pieršy kantakt? Čałaviectva nie moža vyrašyć.
Micia Saviełaŭ pakul nie kamientuje sieryjała i svajoj roli ŭ im — kaža, da premjery heta zabaroniena. Ale akcior trapiŭ u trejler prajekta. U im mužčyna nosić bieły chałat — vyhladaje, što hraje rolu navukoŭca.
Hruntoŭnaja litaraturnaja asnova — nie adzinaja pryčyna čakać premjery «Zadačy troch cieł». U sieryjała vydatnyja šouraniery, heta stvaralniki «Hulni tronaŭ» Den Uajs i Devid Bieniaf. «Zadača troch cieł» — ich nastupny prajekt paśla jaje, i ad sieryjała šmat čaho čakajuć.
«Naša Niva» — bastyjon biełaruščyny
PADTRYMAĆČytajcie taksama:
Biełarusy źnialisia ŭ topavym sieryjale ad Netflix. Adzin ź ich — u roli Jelcyna
«Apošnija z nas», «Ukryćcio» i «Pierapoŭnieny pakoj». Najlepšyja sieryjały 2023 hoda
«Pahladzicie navierch». Vyjšaŭ film pra biełaruskija pratesty, jaki doryć nadzieju
Kamientary