U «dziońnikach» strałkoŭ z Prahi i Branska vyjaviłasia adnolkavaja pamyłka. I ŭvohule jany vielmi dziŭnyja
U telehram-kanałach, jakija, jak miarkujecca, źviazanyja z Davidam Kozakam, što zładziŭ stralaninu ŭ Karłavym univiersitecie ŭ Prazie, i Alinaj Afanaskinaj, što stralała ŭ škole ŭ Bransku, prysutničajuć vielmi padobnyja pasty. Akramia hetaha, aboje vykarystoŭvali kanstrukcyi, jakija nie adpaviadajuć normam maŭleńnia, a taksama z pamyłkaj pisali adno i toje ž słova.
Jak paviedamlaje telehram-kanał «Ahientstvo. Novosti», Alina Afanaskina stvaryła telehram-kanał «biomusor.» 2 lutaha, a kanał «David Kozák / David» źjaviŭsia 9 śniežnia. Spačatku jany byli zakrytymi, ale ŭ dzień stralaniny stali ahulnadastupnymi.
U abodvuch kanałach jość vielmi padobnyja pasty: «Mianie prosta ŭsie nienavidzieli, nienavidziać i buduć nienavidzieć» (Kozak) i «MIANIE ABSALUTNA USIE NIENAVIDZIAĆ» (Afanaskina). Akramia hetaha, aboje amal adnolkava tłumačać pryčyny, jakija ich pryviali da złačynstva: «Ja zaŭsiody chacieŭ zabivać» (Kozak) i «Ja ŭsio macniej chaču zabivać» (Afanaskina).
Padabienstva zaŭvažna i ŭ nastupnaj pary pastoŭ: «Prosta ciapier hladžu na zbroju baci i chočacca zastrelicca» (Afanaskina), «Pju čaj i chaču zastrelicca» (Kozak).
Žurnalisty taksama źviartajuć uvahu, što aboje strałki vykarystoŭvajuć padobnuju słoŭnuju kanstrukcyju dla apisańnia stralby ź dziejasłovam «rabić»: «rabić stralaninu» (Afanaskina) i «zrabić skułšutynh», «zrabić stralaninu» (Kozak), što nie adpaviadaje normam maŭleńnia.
U pastach u abodvuch telehram-kanałach vykarystoŭvajecca litara «jo» i nieprystojnaja (abscennaja) leksika. A słova «budto» pišacca praz defis — «bud-to». Takaja pamyłka, pa słovach «Radio Svoboda», vyklučaje mahčymaść taho, što tekst byŭ napisany z dapamohaj mašynnaha pierakładu.
Jašče adnym padazronym supadzieńniem zjaŭlajecca zhadka ŭ abodvuch «dziońnikach» inšych strałkoŭ. I Kozak, i Afanaskina pišuć pra Ilnaza Halavijeva, jaki rasstralaŭ školnikaŭ u Kazani ŭ 2021 hodzie. A ŭ kanale Kozaka jość zapis ad 10 śniežnia, dzie jon piša: «Ja vielmi natchniŭsia Alinaj… vielmi». U pastach Afanaskinaj taksama zhadvajecca Dyłan Klibołd, jaki ŭ 1999 hodzie zładziŭ stralaninu ŭ škole «Kałumbajn» u ZŠA.
Takija supadzieńni vyklikajuć pytańni da abodvuch «dziońnikaŭ». Aŭtarstva ich stavicca pad sumnieŭ. Na karyść hetaha śviedčać niekatoryja fakty.
Tak, pieršy post ad 9 śniežnia ŭ zakrytym akaŭncie ŭ telehram-kanale Davida Kozaka paźniej redahavaŭsia i na momant, kali kanał staŭ adkrytym, vyhladaŭ tak: «Heta budzie moj dziońnik, jak ja idu da skułšutynhu». Adzin z žurnalistaŭ vydańnia «Miedyjazona» źviarnuŭ uvahu na tuju akaličnaść, što hety post redahavaŭsia 21 śniežnia ŭ 16:55 pa češskim časie, kali zabojca ŭžo byŭ miortvy.
Aŭtar kanała @Kozak_David taksama ŭ adnym z pastoŭ piša pra toje, što «hety kanał budzie doŭhi čas zakrytym», chacia jon «chacieŭ zrabić jaho z samaha pačatku adkrytym, ale potym pračytaŭ adnu instrukcyju, što pravilniej za niekalki hadzin za stralaniny adkryć kanał».
Dziŭnym, na pohlad adnaho z žurnalistaŭ «Češskaha radyjo», zjaŭlajecca toje, što Kozak u svaich zapisach zhadvaje tolki dva vypadki stralaniny ŭ rasijskich škołach. Pry hetym niama nijakich spasyłak na padobnyja vypadki ŭ inšych krainach.
Pa infarmacyi The New York Times, niekatoryja naziralniki adznačyli vielmi vysoki ŭzrovień viedańnia ruskaj movy, jaki nie ŭłaścivy nianośbitu. Niezrazumieła, jak čech, jaki vyras u maleńkaj vioscy, moh avałodać moładzievym słenham i bahata vykarystoŭvać nienarmatyŭnuju leksiku.
Vydańnie taksama źviartaje ŭvahu na toje, što pozna ŭviečary ŭ dzień stralaniny kanał znoŭ staŭ pryvatnym. U toj čas David Kozak užo byŭ miortvym. A paźniej kanał zusim byŭ vydaleny.
Što ž tyčycca kanała Aliny Afanaskinaj, to, na mierkavańnie jaje baćki, u «dziońniku» «darosły tekst», napisany pad čyimści ŭździejańniem».
Usie hetyja akaličnaści vyklikajuć dadatkovyja pytańni da abodvuch «dziońnikaŭ».
Čytajcie jašče:
Što viadoma pra strałka, jaki zabiŭ nie mienš za 15 čałaviek u Prazie
Školnica zładziła stralaninu ŭ škole ŭ rasijskim Bransku i zabiła siabie
Kamientary