Maci nie zachacieła skidvacca na pyłasos u dziciačy sadok — jaje papraknuli ŭ skvapnaści
Nieabchodnaść zdavać hrošy na roznyja patreby sadočkaŭ i škoł — ad tualetnaj papiery da novych voknaŭ — sapraŭdny bol mnohich biełarusaŭ. Hamialčanka śćviardžaje ŭ tyktoku: zanadta inicyjatyŭnyja baćki ŭ hrupie jaje dziciaci hatovyja źbirać hrošy na nie vielmi, na jaje dumku, patrebnyja rečy — naprykład, pyłasos. Razharełasia dyskusija.
Błohierka pad nikam za_raza raskazvaje ŭ videa:
— U nas u čacie źjaviłasia novaja zabava. Niejkija mamy vyrašyli, što nam u hrupu patrebny pyłasos — i my sabralisia kuplać jaho, — kaža žančyna. — Šmat času abmiarkoŭvali. Hrošy nie vialikija: 140 rubloŭ na 14 čałaviek — pa 10 rubloŭ ź siamji atrymlivajecca. Ale mnie toj pyłasos niepatrebny. Kali dyvan lažyć, značyć, niejak jaho apracoŭvajuć, pa sanitarnych normach jon prachodzić. Tamu jaki sens nabyvać pyłasos? Kali sprava dajšła da taho, što «skidvajcie hrošy mnie na kartku», ja adrazu papiaredziła, kab na mianie nie raźličvali. Bo kali kamuści niešta ŭ hałavu streliła, zachaciełasia padarunki ŭ hrupu nabyć — kali łaska, zabaŭlajciesia jak chočacie, ale ja ŭ hetym udzielničać nie budu.
Błohierka kaža, što bolšaść baćkoŭ pastaviłasia da takoha rašeńnia z parazumieńniem, ale znajšoŭsia tata, jaki pačaŭ jaje krytykavać.
Videa nabrała 103 tysiačy prahladaŭ, a ŭ kamientaryjach pačałasia aktyŭnaja dyskusija nakont taho, ci pavinny baćki zdavać hrošy i na jakija patreby.
Adny z kamientataraŭ padtrymali žančynu: «Pyłasos u sadočku — heta nie prablema baćkoŭ, heta prablema zahadčycy, joj na heta vydzialajuć dziaržsrodki», «Čamu za baćkoŭskija hrošy treba spraščać pracu piersanału? Kali nie budzie pyłasosa, to i prybirać nie buduć?», «Takimi tempami chutka dziaciej treba budzie sa svaimi łožkami pryvodzić».
Niechta z kamientataraŭ papraknuŭ błohierku ŭ prahnaści: «Aburajeciesia tym, što baćki chočuć stvaryć prystojnyja ŭmovy dla dziaciej. A dla svajho dziciaci škada hetych kapiejek. Voś dzie absurd», «U nas u sadočku varta tolki vychavacielkam ahučyć, čaho nie chapaje, chucieńka źbirajem i nabyvajem. Bo heta dla našych dziaciej». «Pyłasos vielmi patrebny ŭ sadočku. Prosta kryŭdna, kali ŭsie zdajuć nievialikuju sumu, a inšyja biaspłatna karystajucca čystym dyvanom», — piša adna žančyna. «Ja paprašu, kab majho nie puskali na čysty dyvan», — paryruje aŭtarka videa.
Jość jašče adna katehoryja baćkoŭ u kamientaryjach: jany, zdajecca, niezadavolenyja tym, što treba skidvacca, ale ž usio ž zdajuć hrošy. «Za čas, pakul maje dzieci chadzili ŭ sadočak, baćkoŭski kamitet nabyŭ pyłasos, dyvan, televizar, cyrkulatar pavietra, dźviery i akno ŭ raspranalniu», «Syn pajšoŭ u pieršy kłas. Adrazu ŭ vieraśni zdali 45 rubloŭ na televizar. Zdali, kab na majho dzicionka nie hladzieli kosa».
Znajšlisia i tyja, chto ličyć, što nabyvać u sadočak treba jašče bolš usiaho: naprykład, hihromietr (vymiaraje vilhotnaść) i ŭvilhatnialnik pavietra.
Pryjšli ŭ kamientaryi žančyny, jakija śćviardžajuć, što taksama pracujuć vychavacielkami:
«Prosta časam piedahohaŭ prymušajuć zdavać hrošy. My skidvalisia na šafu». Jašče adna biaduje: «Kolki ja nabyvaju sa svajoj žabrackaj zarpłaty, kab dzieci prahramu zasvoili, kab hulali i raźvivalisia». «Nie kuplajcie, — raić joj inšaja. — Ja pracavała ŭ škole, pryncypova ni kapiejki nie ŭkładvała. Nie zvolnili, pajšła sama. Kličuć čaćviorty hod viarnucca kožny žnivień».
Učora błohierka zapisała praciah historyi. Vyśvietliłasia, što minułaje videa vyklikała ažyjataž u Homieli. Jana vyrašyła rastłumačyć niekatoryja momanty:
— Ja nie chacieła pakryŭdzić ani sadočak, ani vychavacielku. Majo videa było nie pra ich, a pra toje, što nadta inicyjatyŭnyja baćki chočuć zrabić ź dziaržaŭnaha sadočka pryvatny. To-bok stvaryć niejkija šykoŭnyja ŭmovy. A astatnija baćki nie majuć prava nie pahadzicca z hetym.
Bolšaść ludziej moŭčki zdajuć hrošy, choć i nie zhodny z takoj situacyjaj. Kali jany skažuć niešta, to pačynajucca manipulacyi: «Vy nie lubicie svajo dzicia!». Majo videa było vyklikam. Kali vy chočacie zdavać hrošy na sadočak — kruta, vy małajcy, rabicie što chočacie. Ale kali niechta nie choča ci nie moža, nie treba kryŭdzić ich.
Błohierka kaža, što jaje historyja ŭžo dajšła da administracyi Savieckaha rajona Homiela: vyličyli, pra jaki sadočak jana kazała, i tam užo ŭsim «dali tryndziulej». Žančyna adznačyła, što ŭ vyniku zrabili vinavataj vychavacielku, jakaja sama ničoha nie prasiła.
Novaje videa ŭžo taksama nabrała bolš za 100 tysiač prahladaŭ i spravakavała čarhovuju chvalu dyskusii. «Časam mamy z 14 ajfonami škadujuć 50 rubloŭ, kab raz na čatyry hady akno ŭ hrupie zamianić», — aburyŭsia prychilnik idei taho, što baćki pavinny finansava dapamahać škołam i sadkam. Błohierka paryravała: «Heta asabistaja sprava tych mam. Jany sami zarablajuć sabie na ajfony».
Čytajcie taksama:
Da 200 rubloŭ za 15 chvilin. Kolki kaštuje vinšavańnie ad Dzieda Maroza i Śniahurki
Pryvatniki zakryvajucca: baćki raspaviali pra sychod hurtkoŭ sa škoł
Pieršaja vice-mer Minska Nadzieja Łazarevič prajšła praz zatrymańnie, muž zastaŭsia ŭ SIZA11
Kamientary