Aŭtobus «Varšava — Hrodna» ŭnačy ŭrezaŭsia ŭ palicejskuju i pažarnuju mašyny kala Biełastoka
17 śniežnia kala 4-j hadziny nočy aŭtobus «Varšava — Hrodna» sutyknuŭsia z aŭtamabilami pažarnaj słužby i palicyi na trasie pablizu Biełastoka. Padrabiaznaści pra hety incydent raskazaŭ čytač vydańnia «AvtoHrodno».
Pavodle słovaŭ mužčyny, u aŭtobusie było 6 čałaviek pasažyraŭ i 2 kiroŭcy. Pasažyry spali, ale ŭ niejki momant adčuli mocny ŭdar i pračnulisia.
Akazałasia, što napieradzie na hetym miescy na trasie S8 za dźvie hadziny da taho adbyłosia sutyknieńnie lehkavoha aŭtamabila i hruzavika. Kiroŭca aŭtobusa pa niejkaj pryčynie nie zmoh abjechać słužbovyja aŭtamabili ratavalnikaŭ i supracoŭnikaŭ palicyi, jakija pryjechali na miesca zdareńnia. Mašyny byli pryparkavanyja ŭzdoŭž uzbočyny.
«Spačatku pravym bokam my ŭdaryli hruzavy aŭtamabil pažarnaj słužby, a zatym pa iniercyi ŭdaryli i lehkavy aŭtamabil palicejskich. U im jakraz znachodziŭsia aficer, jaki zapaŭniaŭ dakumienty pa pieršym zdareńni. Jon atrymaŭ traŭmy i jaho špitalizavali miedyki», — raskazaŭ čytač «AvtoHrodno».
Što da pasažyraŭ i kiroŭcaŭ aŭtobusa, to byli tolki prablemy z adnoj dziaŭčynaj. Pieršuju hadzinu paśla DTZ jana adčuvała siabie dobra, ale potym joj stała drenna, i daviałosia vyklikać joj chutkuju, kab advieźci ŭ balnicu. Ale paśla jana patelefanavała i skazała, što ź joj usio dobra.
Udar pa kuzavie aŭtobusa pryjšoŭsia nižej linii škła, pry hetym adno škło absypałasia całkam, a niekatoryja raźbilisia častkova. Aŭtobus svaim chodam praciahnuŭ ruch na placoŭku za palicyjaj.
Kiroŭcu aŭtobusa pravieryli na ałkatestary. Ekśpiertyza paćvierdziła, što na momant sutyknieńnia jon byŭ ćviarozy. Mužčyna zatrymany.
Chalezin: Nieŭźlin finansuje Chartyju'97 jašče z prezidenckich vybaraŭ 2010 hoda38
Kamientary