«Dziŭnaje sacspabornictva, chto bolš napryznaje». TH-kanał, jaki źviazvajuć z Markavym, pakrytykavaŭ siłavikoŭ za toje, što ekstremistami stali ŭsie
Nahodaj dla krytyki staŭ «pohlad zboku» viadomaha rasijskaha prapahandysta Rybara, jaki niezadoŭha da hetaha naviedaŭ Minsk. Svaimi ŭražańniami toj padzialiŭsia ŭ efiry inšaha rasijskaha kanała prapahandy SolovievLive.
![](http://d3kcf2pe5t7rrb.cloudfront.net/img/w840d4webp1/photos/stock/87_20230130_zam_7929_nn-p0xj1.jpg.webp)
Rasijski błohier pabyvaŭ u Biełarusi, i jaho ŭražańni — što tam poŭny pravał u infarmacyjnaj śfiery. Infarmacyjnaje pole nastolki začyščana, što «ŭsie biełarusy pryznajuć, što ŭ ich nastroi blizkija da 2019 hoda, kali «ŭsio dobra, roŭna, prablem niama».
Ale, pa słovach błohiera, «luby vakuum treba zapaŭniać. Ciapier u krainie adsutničajuć kvaziapazicyjnyja ŚMI, niama ŭmoŭnych RTVI, «Fantanki», jašče čahości, što mahło b prapanavać alternatyvu.
Ciapier na telebačańni samaja papularnaja pieradača, heta, daruj boža, kamunalnyja paŭhadziny. Kali ludzi prosta zvoniać u efir i kažuć: «A ŭ mianie trubu prarvała». I heta samaja rejtynhavaja pieradača na miascovym telebačańni».
«Uźnikaje pytańnie: «Chłopcy, što vy čverycie?» — «A što možna zrabić?» — «Toje, toje i toje». — «A chiba tak možna?» — «Tak, možna». — «A my nie ŭmiejem». I na hetym usio», — padzialiŭsia ŭražańniami Rybar.
Mierkavańnie błohiera nie zastałosia biez uvahi spačatku telehram-kanała «Biełaruski siłavik», jaki pačaŭ apraŭdvacca i śćviardžać, što prablemu bačać, ale pakul «na ŭzroŭni kiraŭnictva siaredniaha źviana» i što sapraŭdy «nieabchodna padładžvacca pad sučasnyja realii, pierajmać vopyt miedyjaśfiery, jakaja kantralujecca apazicyjaj».
Na hetyja apraŭdańni adreahavaŭ telehram-kanał «Hrafač», jaki źviazvajuć z kiraŭnikom ANT Maratam Markavym.
Na pohlad aŭtara kanała, «začystka» — heta adkładvańnie prablem u doŭhuju skryniu i bomba zapavolenaha dziejańnia.
«Zakašmaryli ludziej nie padpisvacca na telehram-kanały i što?» — zadaje pytańnie Hrafač i źviartaje ŭvahu na toje, što śpis ekstremisckich materyjałaŭ užo składaje 800 staronak. Adnych ekstremisckich farmavańniaŭ — 150 štuk.
«Hety praces daŭno pieratvaryŭsia ŭ niejkaje dziŭnaje sacspabornictva, chto bolš napryznaje», — ušpiliŭ aŭtar Ministerstva ŭnutranych spraŭ i Kamitet dziaržaŭnaj biaśpieki.
Na jaho dumku, čym bolšyja maštaby nabyvaje kolkaść zabaronienaha, tym bolš razmyvajecca ŭspryniaćcie jaho hramadskaj niebiaśpieki i pieratvarajecca ŭ absurd.
«Niachaj prabačać mnie siłaviki, ale pryznać kanał «Ž**a z u**mi» ekstremisckim farmiravańniem — heta epik fejł. Z našaha MUS parahatali najbolšyja rasijskija th-kanały».
Jak adznačaje Hrafač, zabarony słaba pracujuć na jutubie, dzie «ekstremisckija ŚMI» hladziać našmat-našmat bolš, čym praŭładnyja. A tyja ludzi, chto baicca hladzieć zabaronienaje, mohuć pajści i ŭ rasijski siehmient apazicyjnych kanałaŭ.
Hałoŭnaj pamyłkaj Hrafač ličyć toje, što amal usie błytajuć masavuju prapahandu sa śpiecyjalizavanaj infarmacyjnaj baraćboj. U jakaści apošniaj jany ličać «prasoŭvańnie zusim taksičnych i absurdnych pablikaŭ, škody ad jakich u razy bolš, čym karyści». Jaŭny namiok na Azaronka, Bondaravu, «Biełaruskaha siłavika» i da ich padobnych.
Na dumku aŭtara, treba «stvarać, padtrymlivać ci kantralavać kłastary z alternatyŭnaj i apazicyjnaj infarmacyjaj», kab «prakuratura Žytkavickaha rajona nie pryznała jaje ekstremisckaj na nastupny dzień».
Ale takaja sprava dla siłavikoŭ našmat ciažejšaja za kapijavańnie «stužki chiejtu sa skrynami z paradku dnia apanientaŭ» ci praktykavańnie ŭ tym, «chto bolš kruta pachvalić, što ŭsio dobra».
Hrafač adznačaje, što nie ŭdasca padahnać usich pad adzin kapył. Takoje spadziavańnie — «niebiaśpiečnaja iluzija, u padtrymańni jakoj jość vidavočnyja intarasanty».
«Z začystkaj prablemaŭ niama, a voś z napaŭnieńniem — ź liškam», — kanstatuje Hrafač i vykazvaje spadziavańnie, što mahčyma nastupny Hod jakaści «začepić i hety kirunak».
Čytajcie jašče:
Łukašysty spračajucca, jak być z «pieraabutymi» błohierami — mierkavańni padzialilisia
-
«Ci nie zašmat vy na siabie ŭziali?» Cichanoŭskaja adkazała na vostryja pytańni pra status Nacyjanalnaj lidarki
-
«Vialiki čałaviek dla biełarusaŭ». Łukašenku paprasili nazvać vulicu ŭ Minsku ŭ honar savieckaha maršała
-
Ajcišnik z EPAM, jaki žyvie ŭ ZŠA, naviedaŭ Biełaruś. Ciapier jamu pahražaje da siami hadoŭ kałonii
Kamientary