Staršynia łukašenkaŭskaha Moładzievaha parłamienta Mikita Račyłoŭski praciahvaje svaje napadki na Kakabaja. Ale hetym razam jamu zapiarečyli.
My paviedamlali raniej, što novaja zorka prapahandy Mikita Račyłoŭski, jaki paabiacaŭ pamierci za Łukašenku, u vieraśni ŭ svaim telehram-kanale napisaŭ publičny danos na papularnaha fud-błohiera Paŭła Kramara, viadomaha jak Kakabaj.
Praz dva miesiacy ŭ efiry «Minsk-novosti» Račyłoŭski paskardziŭsia, što niekatoryja ličać, što jaho napadki na Kakabaj źviazanyja z žadańniem adcisnuć hety biznes.
«Heta dełbi niejkaje, jakoje myślić jak kambała niejkaja: vočy ŭ adnuju kropku dy inšych alternatyŭnych punktaŭ hledžańnia nie ŭsprymaje. Ja chacieŭ by jaho adcisnuć z punkta hledžańnia zakonu. Čałaviek idzie ŭ turmu, zapisvaje pakajalnaje videa na fonie HUBAZiKa, niasie ŭsiu ciažkaść svaju pierad zakonam i potym robić što zachoča», —
vykazaŭsia Račyłoŭski i zaŭvažyŭ, što kantent u Kakabaja biaskryŭdny.
U efiry prahramy staršynia Moładzievaha parłamienta źviarnuŭsia da błohiera: «Ja pra ciabie, Pavieł Kramar, nie zabyŭsia. Tamu dajadaj svaje čabureki, darablaj svaju pracu. My pa ciabie pryjdziem».
Račyłoŭski zaŭvažyŭ, što jaho słovy — «nijakaja nie pahroza» i jon havoryć «u ramkach zakona»:
«Ja čałaviek spraviadlivy, hatovy nieści adkaznaść za kožnaje svajo słova. Ale ja nie paciarplu, kab u našaj krainie byli ludzi, jakija zdradzili prezidentu, našamu ściahu, sprabavali na hetym zarabić, a siońnia chodziać, nabivajuć sabie čerava».
Na hučnuju zajavu Račyłoŭskaha źviarnuŭ uvahu telehram-kanał «Hrafač», jaki źviazvajuć z kiraŭnikom ANT Maratam Markavym.
«Ja nie viedaju, chto tam pa kaho pahražaje pryjści, ale vyhladaje heta ŭsio vielmi dziŭna. Navat z hledzišča čystaj łohiki — naŭrad ci siłaviki viedajuć mienš za tavaryša Račyłoŭskaha, jaki praz 3 hady adkryŭ tajamnicu KaKo. A dzie jon byŭ u 2020-2022-m, kab zaraz pa kahości prychodzić? Na moj subjektyŭny pohlad — tyja, kamu treba, užo daŭno razabralisia i zakryli pytańni ź pieraabutymi i nie vielmi», — vykazaŭsia Hrafač.
Račyłoŭskamu Hrafač raić myślić krychu hłabalniej i supakoicca, bo «hetaja bravada doŭžycca ŭžo bolš za miesiac i tak i nie pryviała ni da jakoha vyniku, akramia kłaŭnady. Kampietentnyja ludzi raźbiarucca».
Akramia hetaha, Hrafač pryhadaŭ Račyłoŭskamu jaho krytyku fundamientalnaj navuki: «Darečy, ab kampietencyi. Pierš čym krytykavać fundamientalnuju navuku ŭ krainie, niakiepska było b abaranić kandydackuju dysiertacyju abo napisać chacia b paračku recenzavanych VAKaŭskich artykułaŭ».
Račyłoŭskaha Hrafač adnios da katehoryi «samapryznačanych kamisaraŭ-sensavikoŭ», jakija vystupajuć ź vialikaj kolkaściu «nizkaprobnych skaardynavanych napadak na biełaruskuju movu, kulturu i historyju».
«A mo tak i treba?» — zadaje rytaryčnaje pytańnie Hrafač.
Čytajcie jašče:
«Čamu Kakabaj usio jašče isnuje?» Račyłoŭski napisaŭ publičny danos na papularnaha błohiera Kakabaja
«Pamierci za Łukašenku». Chto taki Mikita Račyłoŭski, novy tvar prapahandy
Zakachanyja ŭ Minsku chacieli sabrać z padpisčykaŭ $10 tysiač na viasielle mary. Kolki ž u vyniku im zadanacili?10
Kamientary