Bajden sustreŭsia ź Si ŭ San-Francyska. Dźvie samyja mahutnyja dziaržavy śvietu raspružvajuć adnosiny
«My ź im damovilisia, što my abodva možam padniać słuchaŭku, patelefanavać naŭprost i nieadkładna być pačutymi», — skazaŭ Džo Bajden.
Kiraŭnik KNR Si Czińpin i prezident ZŠA Džo Bajden damovilisia na sustrečy pad San-Francyska pra adnaŭleńnie kanałaŭ pramoj suviazi pamiž vajskoŭcami dźviuch dziaržaŭ. Hetaja suviaź była adklučanaja kitajcami letaś paśla vizitu śpikiera Pałaty pradstaŭnikoŭ na Tajvań, piša Bi-bi-si.
Pra damoŭlenaść ab adnaŭleńni pramoj suviazi pamiž vajskoŭcami paviedamiŭ paśla sustrečy Bajdena i Si kitajski dziaržaŭny telekanał CCTV.
«Trymać linii suviazi pamiž našymi vojskami adkrytymi — heta važna, pakolki heta dazvalaje paźbiahać nieparazumieńniaŭ i pamyłak, jakija mohuć pryvieści da kryzisu abo kanfliktu», — zajaviła z hetaj nahody pres-słužba Pientahona.
Kitaj adklučyŭ kanały pramoj suviazi paśla taho, jak śpikier Pałaty pradstaŭnikoŭ Nensi Pełosi ŭ žniŭni minułaha hoda niečakana prylacieła na Tajvań.
Hety žest vielmi aburyŭ Piekin i zaachvociŭ jaho da taho, kab zładzić vakoł Tajvania maštabnyja vučeńni ź imitacyjaj uvarvańnia na vostraŭ.
Pry hetym staršynia Si, jak raspavioŭ žurnalistam na ŭmovach ananimnaści vysokapastaŭleny pradstaŭnik Biełaha doma, zapeŭniŭ Bajdena na sustrečy, što Kitaj nie rychtujecca da ŭvarvańnia na Tajvań i addaŭ by pieravahu mirnamu ŭźjadnańniu — ale tut ža zavioŭ razmovu ab tym, pry jakich umovach KNR moža prymianić siłu.
Prezident Bajden skazaŭ na pres-kanfierencyi pa vynikach sustrečy, što linii suviazi buduć pastajanna adkryty nie tolki pamiž kitajskimi i amierykanskimi vajskoŭcami, ale i na inšych uzroŭniach, uklučajučy samich lidaraŭ.
«My ź im damovilisia, što my abodva možam padniać słuchaŭku, patelefanavać naŭprost i nieadkładna być pačutymi», — skazaŭ Bajden.
Na pytańnie, ci daviaraje jon Si Czińpinu, Bajden adkazaŭ prykazkaj «daviaraj, ale praviaraj», a zatym raspavioŭ, što jany ź Si vielmi šmat sustrakalisia, kali byli vice-prezidentami pry Baraku Abamu i Chu Czińtaa, i jon viedaje Si jak «pramoha i adkrytaha» surazmoŭcu.
Ahulnaje paciapleńnie
Akramia damoŭlenaści ab suviazi pamiž vajskoŭcami, Bajden i Si, jak paviedamlaje kitajskaja dziaržaŭnaja presa, damovilisia stvaryć rabočyja hrupy, jakija zojmucca supracoŭnictvam u halinie štučnaha intelektu i ŭ baraćbie z narkahandlem.
Pra apošniaje pierad sustrečaj pisała amierykanskaja presa: ZŠA chacieli b, kab Kitaj dapamoh pierakryć kanały pastavak inhredyjentaŭ dla fientaniłu.
Akramia taho, Piekin paviedamlaje, što Bajden i Si damovilisia stvaryć «miechanizmy dyjałohu» ab źniešniaj palitycy i biaśpiecy sudnachodstva, a taksama pavialičyć kolkaść avijarejsaŭ, kolkaść studentaŭ, navučencaŭ pa abmienie ŭ dźviuch krainach, i pašyryć suviazi ŭ adukacyi, kultury, sporcie i biznesie.
HUBAZiK pierastaŭ vykładać videa z zatrymanymi. Z dnia, kali da hetaha zaklikaŭ kanał, blizki da Markava1
HUBAZiK pierastaŭ vykładać videa z zatrymanymi. Z dnia, kali da hetaha zaklikaŭ kanał, blizki da Markava
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8282
Kamientary