22 dni nižniaja pałata amierykanskaha parłamienta žyła bieź śpikiera.
Majk Džonsan, 51-hadovy respublikaniec z Łuizijany, prychilnik Trampa i krytyk dalejšaj dapamohi Ukrainie, aficyjna abvieščany novym śpikieram Pałaty pradstaŭnikoŭ ZŠA, piša Bi-bi-si.
Jon nabraŭ 220 hałasoŭ, apiaredziŭšy demakrata Chakima Džefrysa (209).
Hałasavańnie zaviaršaje 22-dzionny pieryjad adsutnaści śpikiera ŭ Pałacie pradstaŭnikoŭ, bo papiaredni śpikier Kievin Mak-Karci byŭ adpraŭleny ŭ adstaŭku try tydni tamu.
Vielmi pravyja respublikancy ličać Džonsana stojkim kansiervataram i prychilnikam Donalda Trampa.
Umieranyja respublikancy bačać u im prahmatyčnaha i razvažlivaha lidara, jaki budzie padtrymlivać kansiervatyŭnyja kaštoŭnaści, pry hetym spryjajučy prachodžańniu praz Pałatu zakonaŭ.
«Jon adzin z tych ludziej, jakija ładziać z usimi i karystajucca vialikaj pavahaj», — skazaŭ CNN respublikaniec z Kałarada Kien Bak.
Demakraty, adnak, aścierahajucca, što Majk Džonsan zanadta pravych pohladaŭ. Jany ŭkazvajuć na toje, što Džonsan hałasavaŭ suprać paćviardžeńnia vynikaŭ vybaraŭ u 2020 hodzie, zaklikaŭ Trampa «praciahvać baraćbu» i «vykarystoŭvać usie dastupnyja srodki pravavoj abarony».
Džonsan zajmaje strohuju kansiervatyŭnuju pazicyju pa šerahu palityčnych pytańniaŭ, vystupajučy, naprykład, suprać prava na abort i adnapołych šlubaŭ.
Džonsan taksama suprać dalejšaj dapamohi ZŠA Ukrainie.
Jon rašuča padtrymaŭ Ukrainu adrazu paśla rasijskaha ŭvarvańnia ŭ lutym 2022 hoda.
«My pavinny ŭvieści źniasilvajučyja sankcyi suprać ekanamičnych intaresaŭ Rasii», — padkreśliŭ tady Džonsan u zajavie, apublikavanaj u sacsietcy X (były Twitter).
«My pavinny viarnucca da ŭstojlivaj amierykanskaj vytvorčaści enierhii, kab zabiaśpiečyć stabilnaść i biaśpieku tut i dla našych jeŭrapiejskich sajuźnikaŭ. My pavinny vyklučyć Rasiju z hłabalnaha handlu i mižnarodnych instytutaŭ. Choć najlepšy čas dla hetych dziejańniaŭ prajšoŭ, my pavinny dziejničać rašuča», — zajaviŭ tady jon.
U krasaviku 2022 hoda Džonsan prahałasavaŭ za zakon ab lend-lizie ŭ abaronu demakratyi va Ukrainie 2022 hoda, metaj jakoha było palehčyć praces adpraŭki ZŠA vajskovaj dapamohi Ukrainie.
Adnak z časam Majk Džonsan pačaŭ zajmać skieptyčnuju pazicyju adnosna dapamohi Ukrainie, nahadvajučy, što jon prahałasavaŭ suprać dvuch zakonaprajektaŭ ab asihnavańniach, jakija praduhledžvali dapamohu Ukrainie — u 2022 hodzie i ŭ vieraśni 2023 hoda.
«Amierykanskija padatkapłacielščyki letaś nakiravali Ukrainie dapamohu na sumu bolš za 100 miljardaŭ dalaraŭ, — napisaŭ Džonsan u lutaŭskim paście ŭ sacsietcy X. — Jany zasłuhoŭvajuć taho, kab viedać, ci dziejańni ŭkrainskaha ŭrada całkam adkrytyja i prazrystyja ŭ dačynieńni da vykarystańnia hetaj vielizarnaj sumy resursaŭ padatkapłacielščykaŭ».
Pry hetym Majk Džonsan pierakanany prychilnik akazańnia dapamohi Izrailu, jon zaklikaje da źniščeńnia CHAMAS.
Novy śpikier Pałaty pradstaŭnikoŭ viadomy jak jevanhieličny chryścijanin i maje ciesnyja suviazi z pravymi partyjami Izraila, jakija apošnija hady stvarajuć asnoŭny palityčny kirunak u krainie.
Prychilniki praciahu dapamohi Ukrainie spadziajucca, što Džonsan pastavić na hałasavańnie ahulny pakiet dapamohi Ukrainie i Izrailu, prapanavany prezidentam Džo Bajdenam.
Pakiet praduhledžvaje 61 miljard dalaraŭ dapamohi Ukrainie.
Bieź śpikiera ŭ Pałacie pradstaŭnikoŭ hety pakiet byŭ faktyčna zabłakavany.
Abrańnie Džonsana moža razbłakavać praces uchvaleńnia, kali ŭ Kanhresie budzie zhoda nakont metazhodnaści adzinaha pakieta dapamohi dla Ukrainy i Izraila.
Ideja adzinaha pakieta padabajecca ŭ Kanhresie daloka nie ŭsim.
Paśla danosu Bondaravaj raptoŭna admianili vystavu ŭ muziei Janki Kupały. Ciapier jana patrabuje na muziei šyldy pa-rusku29
Paśla danosu Bondaravaj raptoŭna admianili vystavu ŭ muziei Janki Kupały. Ciapier jana patrabuje na muziei šyldy pa-rusku
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu55
Kamientary