«Vypadak sa śviatarom nie adziny». Žurnalist Kulevič pra toje, jak ludziej represujuć za padpiski na jaho instahram
Učora hrodzienskaha pravasłaŭnaha śviatara Andreja Nozdryna asudzili za raspaŭsiud «ekstremisckich materyjałaŭ». Padstavaj dla hetaha stała padpiska na Rusłana Kuleviča, žurnalista z Hrodna. Jaho asabistyja staronki ŭ sacsietkach — «ekstremisckija materyjały». Žurnalist raspavioŭ «Našaj Nivie» pra vypadki pieraśledu padpisčykaŭ.
Z nahody sudu Rusłan apublikavaŭ videa ŭ svaim profili, dzie prosić padpisčykaŭ ź Biełarusi nie rabić reposty ź jaho staronki, nie łajkać dopisy i nie pakidać kamientary. Sacsietki Kuleviča pryznali «ekstremisckimi materyjałami» ŭ studzieni 2023 hoda.
Žurnalist kaža, što pra aryšt śviatara daviedaŭsia raniej, čym navina trapiła ŭ ŚMI. I heta vypadak nie adziny, kali čałaviek paciarpieŭ za padpiski na asabistuju staronku Kuleviča ŭ instahramie.
«Tydzień tamu mnie napisali, što ŭ Hrodnie za padpisku na moj instahram zatrymali dźviuch dziaŭčat. U pastarunak na vulicy Haja ich pryvieźli ŭ kajdankach. Kožnaj dali štaf amal pa tysiačy rubloŭ», — kaža žurnalist.
Aproč hetych vypadkaŭ, pa słovach Kuleviča, ciaham apošnich dvuch miesiacaŭ jamu raspaviali niekalki historyj, što ludzi mieli prablemy na miažy, kali padčas pahłyblenych pravierak telefonaŭ znachodzili padpisku na jaho.
«Ludzi raspaviadali, što ŭ ich pytali niešta nakštałt: «Vy ž viedajecie, što jon ekstremist, navošta na jaho padpisanyja?» Ale tyja ludzi navat i nie viedali pra moj ekstremiscki status. Takich chapaje, ja časam sam vydalaju kamientary pad dopisami, kali viedaju, što čałaviek u Biełarusi.
Tamu ja vyrašyŭ užo čarhovy raz źviarnucca da padpisčykaŭ, kab nahadać im, što kali jany žyvuć u Biełarusi ci prosta byvajuć tam, to im lepiej ad mianie adpisacca. Ja pavažaju i caniu svaju aŭdytoryju, na jakuju pracavaŭ bolš za 10 hadoŭ, ale, na žal, vymušany prasić ich nie łajkać maje dopisy i nie pisać kamientary. Heta treba dla ich ža biaśpieki», — kaža Kulevič.
Žurnalist kaža, što padpisčyki byli asnoŭnymi jaho infarmatarami, jakija zaŭždy dapamahali ŭ pracy.
«Pieršy surjozny ŭdar byŭ, kali maju staronku pryznali «ekstremisckimi materyjałami». Ja tady taksama vykłaŭ dopis, kab papiaredzić ludziej. Paśla za niekalki miesiacaŭ ad mianie adpisałasia bolš za try tysiačy čałaviek», — zhadvaje Rusłan.
Ź jaho słoŭ, na piku jahony profil u instahram naličvaŭ bolš za 16 tysiač padpisčykaŭ. Paśla publikacyi videa ŭčora viečaram jaho aŭdytoryja skaraciłasia jašče na 600 čałaviek. Ciapier u žurnalista 11,5 tysiačy fałovieraŭ. Rusłan kaža, što ŭ asnoŭnym adpisvajucca tyja, chto žyvie ŭ Biełarusi.
«Heta vielmi kryŭdna, što nas takim čynam prosta pazbaŭlajuć aŭdytoryi ź Biełarusi. Mnohija pišuć mnie: «Rusłan, my ŭsio razumiejem, čytajem ciabie, ale adpišamsia».
Tym nie mienš, pa prahladach na sajcie i ŭ jutubie my ŭsio adno bačym, što ludzi ź Biełarusi praciahvajuć čytać i hladzieć nas», — śćviardžaje Kulevič.
Rusłan Kulevič byŭ pieršym biełaruskim žurnalistam, čyje asabistyja staronki ŭ sacyjalnych sietkach łukašysty pryznali «ekstremisckimi materyjałami».
Vaskrasienski: Treba, kab Sikorski pryvioz padarunak Łukašenku. A Bialacki i 20 zavadataraŭ vyjduć apošnimi34
Kamientary