Biełaruski taksist u Biełastoku — pra niuansy pracy, pretenzii pasažyraŭ i zarobki
Dzianis razam z žonkaj i dvuma dziećmi z vosieni 2020 hoda žyvie ŭ Biełastoku. Za hety čas mužčynie davodziłasia pracavać na roznych pracach: ad budoŭli da składa internet-kramy. Apošnija niekalki miesiacaŭ jon pracuje ŭ taksi. Pra zarobki polskich taksistaŭ, tonkaści pracy i płany pačać pracavać na siabie Dzianis raspavioŭ «Naša Nivie».
Chadziŭ na pratesty, byŭ zatrymany
Ź Biełarusi Dzianis źjechaŭ praz bojaź kryminalnaha pieraśledu za ŭdzieł u akcyjach pratestu. Na pačatku listapada budzie try hady, jak jon žyvie ŭ Polščy.
«Mianie zatrymali viečaram 10 žniŭnia na hanku hrodzienskaha dramatyčnaha teatra. Sudździa dała mnie 5 sutak aryštu, ale całkam adbyć termin nie atrymałasia, bo 14 žniŭnia mianie i inšych zatrymanych vypuścili bieź jakich-niebudź tłumačeńniaŭ, tamu ŭ mianie zastalisia jašče sutki i 6 hadzin aryštu», — zhadvaje Dzianis.
U Biełarusi mužčyna praciahvaŭ brać udzieł u akcyjach. Taksama jon źniaŭ paboi, jakija atrymaŭ pry zatrymańni, i napisaŭ skarhu ŭ SK. Razdabyŭ videa svajho zatrymańnia i naniaŭ advakata.
A kali bližej da kanca kastryčnika zrazumieŭ, što na jaho chočuć zavieści kryminałku, to razam ź siamjoj uciok u Polšču.
500 jeŭra za arendu aŭto
Niahledziačy na toje, što ŭ jaho jość vyšejšaja adukacyja i dośvied pracy ŭ škole i banku, u Polščy Dzianisu daviałosia pracavać fizična.
Mužčyna pracavaŭ roznarabočym na budoŭli, rabočym na składzie internet-kramy.
U lipieni biahučaha hoda Dzianisu prapanavali pasprabavać siabie ŭ taksi. Z taho času jon pracuje na arendnaj mašynie, ale ŭžo nabyŭ svaju i ciapier rychtuje jaje dla pracy.
Za arendu Toyota Prius jon płacić 2200 złotych na miesiac, heta kala 500 jeŭra. Siarod inšych vydatkaŭ — paliva, a taksama pracent Bolt i firmie-prakładcy, jakaja musić być pamiž kiroŭcam i płatformaj.
U pracoŭny dzień jon nakručvaje pa Biełastoku i vakolicach pa 250-300 kiłamietraŭ. U piatnicy i suboty vychodzić kala 400. Pa słovach Dzianisa, u pikavyja hadziny piatnicy i suboty zakazaŭ nastolki šmat, što možna pracavać nie spyniajučysia.
Kolki možna zarablać u taksi?
Sabie mužčyna taksama nabyŭ Toyota Prius. Za aŭtamabil vykłaŭ 3100 jeŭra, jašče tysiaču na renavacyju batarei, zamienu techničnych vadkaściaŭ i inšyja raschodniki. Kab mašyna była całkam hatovaja da pracy ŭ taksi, jon płanuje inviestavać u jaje jašče kala tysiačy jeŭra. Takim čynam hatovy da pracy Prius vyjdzie jamu ŭ sumu kala piaci tysiač jeŭra.
Dzianis padličyŭ, što kali jon budzie pracavać na ŭłasnym aŭto, to jaho čysty miesiačny zarobak budzie składać kala 1250-1350 jeŭra.
Surazmoŭca adznačaje, što ŭ Biełastoku ciapier žyvie šmat biełarusaŭ i ŭkraincaŭ. Pa jahonych nazirańniach, u pracoŭnyja dni da 30% pasažyraŭ — mihranty. A voś u vychodnyja taksi ŭ asnoŭnym karystajucca tolki palaki.
«Adkul čałaviek, možna ŭbačyć praz prahramu. Kali ŭ profili pasažyra zapisana «Biełostok», to heta buduć ludzi, u jakich telefon na ruskaj, a kali «Biłostok», to heta dakładna ŭkraincy. Taksama mnohich bačna pa imieni», — tłumačyć Dzianis.
«Časam davodzicca pravodzić nievialiki ŭrok historyi»
Mužčyna kaža, što, niahledziačy na toje, što ŭžo try hady žyvie ŭ Polščy i źjaŭlajecca palakam z nacyjanalnaści, pa-polsku jon usio adno razmaŭlaje z akcentam, tamu pry razmovie pasažyry razumiejuć, što jon nie miascovy. Heta časam pryvodzić da nieparazumieńniaŭ.
«Adnojčy za piatnicu-subotu z 10 viečara da hadziny nočy amal kožny klijent mieŭ pretenzii da majho akcentu. Na hetaj hlebie adnojčy navat była nievialikaja pierapałka», — pryznajecca Dzianis.
«Časam davodzicca pravodzić nievialiki ŭrok historyi, što ŭ roznyja časy miežy Polščy byli roznymi, što ŭ Biełarusi žyvie kala 500 tysiač etničnych palakaŭ.
Ale jość i takija, što ty havoryš im, što z nacyjanalnaści taksama palak, a jany ŭ adkaz kažuć: nie, jaki ty nafih palak. Jany śćviardžajuć, što ŭ Biełarusi palakaŭ niama, tam tolki biełarusy i ruskija.
Niekatorym davodzicca kazać, što kali b palak pryjechaŭ, naprykład, z Amieryki, to vy, napeŭna, razmaŭlali b ź im pa-inšamu. I ŭžo tady źmianiajecca ton razmovy na bolš zyčlivy», — kaža Dzianis.
Pry hetym mužčyna adznačaje, što ŭ asnoŭnym staŭleńnie da mihrantaŭ z boku palakaŭ stanoŭčaje, bo ty pracuješ i płaciš padatki.
«Niekatoryja cikaviacca, jak nam Polšča, jak nam tut žyviecca. Niehatyŭ zvyčajna kali i byvaje, to vyklučna ad darosłych mužčyn».
Adnojčy, kaža Dzianis, pasažyr-palak padumaŭ, što jon z Ukrainy, i tamu pačaŭ vykazvać pretenzii i raspaviadać jamu historyi pra Vałynskuju raźniu.
«U niekatorych palakaŭ da ŭkraincaŭ tak i zastałosia nie vielmi dobraje staŭleńnie. Tak, jany ličać, što dapamahać im treba ŭ tym liku, kab vajny nie było ŭ ich, ale peŭnyja histaryčnyja i ŭžo navat sučasnyja pretenzii da ŭkraincaŭ u častki palakaŭ usio adno jość», — kaža Dzianis.
U samoha Dzianisa za čatyry miesiacy pracy nie było kanfliktaŭ z ukraincami praz toje, što jon ź Biełarusi.
«Hałoŭnaje, što tabie nie treba adprošvacca ŭ načalnika»
U pracy taksistam Dzianisu padabajecca volny hrafik, adsutnaść načalnika i davoli hodny ŭzrovień zarobkaŭ.
«Da taho ž heta pryjemna psichałahična, ty siadaješ za styrno i hałoŭnyja tvaje dumki — kancentracyja na darozie. Taksama pryjemna, što kali tabie raptam spatrebilisia hrošy, to ty možaš vyjści na liniju i za paru hadzin zarabić svaje 50-70 złotych (kala 10-15 jeŭra) najaŭnymi.
I hałoŭnaje, što tabie nie treba adprošvacca ŭ načalnika, kali tabie nieabchodna vyrašyć asabistyja spravy, advieźci žonku, dziaciej ci schadzić da doktara», — kaža Dzianis.
Bolšaść klijentaŭ raźličvajecca bieznajaŭna, tamu asnoŭnaja častka hrošaj prychodzić praz tydzień. Taksama niekatoryja pakidajuć čajavyja. Jak hatoŭkaj, tak i praz prahramu.
«Čajavyja čaściej pakidajuć miascovyja, u asnoŭnym u vychodnyja. Ale i ŭ pracoŭnyja dni byvaje. Sumy roznyja, byvaje, i 10 złotych pakinuć. Čaściej prosta kažuć, što rešty nie treba, kali tam paru złotych zastajecca», — raspaviadaje surazmoŭca.
Aproč pracy ŭ taksi, Dzianis praciahvaje naviedvać akcyi biełarusaŭ u Biełastoku. A taksama viadzie niekalki prajektaŭ u sacsietkach.
Pra žyćcio ŭ Polščy z nula, zarobki ŭ taksi i cikavyja vypadki padčas pracy Dzianis aktyŭna raspaviadaje ŭ svaim profili ŭ instahramie.
Čytajcie taksama:
«Iści viesialić 20-hadovuju paru na viasielli — užo, napeŭna, nie». Były papularny radyjoviadučy pajšoŭ u dalnabojniki i nie škaduje
-
U Rečycy pad palityčny pieraśled trapiŭ adzin z samych pavažanych u horadzie daktaroŭ
-
«Dzimka? Dyk jaki jon špijon? Heta prosta śmiešna». Znajomyja pamierłaha ŭ kałonii Dźmitryja Šlethaŭera raskazali pra jaho i jaho siamju
-
Źjaviłasia infarmacyja pra zatrymańni na BIEŁAZie. Pravaabaroncy źviazvajuć ich z kpinami ź firmovych botaŭ
Amierykanka raskazała, jak vykładała va ŭniviersitecie ŭ Viciebsku i navat dała paru ŭrokaŭ milicyi4
Kamientary