Viačorka patłumačyŭ, u čym važnaść vizitu Cichanoŭskaj u Jeŭraparłamient i na Hienasambleju AAN
Daradca Śviatłany Cichanoŭskaj Franak Viačorka raskazaŭ «Našaj Nivie», što znaki ŭvahi da biełaruskaha pytańnia biesprecedentnyja.
Śviatłana Cichanoŭskaja 13 vieraśnia zaklikała Jeŭrapiejski parłamient padtrymać demakratyčnuju Biełaruś i dapamahčy pryciahnuć da adkaznaści Łukašenku. Franak Viačorka adznačaje, što Śviatłana Cichanoŭskaja, jakaja nie źjaŭlajecca kiraŭnikom dziaržavy, vystupała ŭ Jeŭraparłamiencie treci raz za try hady.
«Demakratyčnaja lidarka Biełarusi pramaŭlała 16 chvilin adrazu paśla prezidentki Jeŭrapiejskaj kamisii Ursuły fon der Lajen, što biesprecedentna», — adznačaje Viačorka.
Hetym, jak davodzić Viačorka, Jeŭraparłamient pakazaŭ, što jaho pryjarytet — demakratyčnaja i svabodnaja Biełaruś.
Daradca Cichanoŭskaj adznačaje, što ŭ pryniataj Jeŭraparłamientam rezalucyi pa Biełarusi režym Łukašenki pryznany saŭdzielnikam rasijskaj ahresii suprać Ukrainy i maje być pryciahnuty da adkaznaści za złačynstva. U joj havorycca ab nieabchodnaści ŭviadzieńnia sankcyj i aryštu majomaści Łukašenki.
Viačorka kaža, što rezalucyja choć i maje status miakkaha zakona, jaki nie abaviazkovy da vykanańnia, ale joju Jeŭraparłamient zadaŭ paradak dnia na nastupny pieryjad svajoj pracy.
Daradca Cichanoŭskaj kaža, što zaraz zadača demakratyčnaj supolnaści palahaje ŭ tym, kab rezalucyju zrabić asnovaj dla vypracoŭki stratehii Jeŭrasajuza pa Biełarusi.
«Heta była važnaja siesija pierad Hienasamblejaj AAN, na jakuju źbiarucca ŭsie kiraŭniki dziaržaŭ, i hetak Jeŭraparłamient uvodzić u mižnarodny dyskurs temu vyzvaleńnia Biełarusi, pakarańnia režymu i jaho saŭdzieł u vajnie», — akcentuje ŭvahu Viačorka.
Franak Viačorka kaža, što ŭ abychod pratakołu i zabarony na demanstravańnie z trybuny Jeŭraparłamienta simvoliki Cichanoŭskaj było dazvolena ŭźniać bieł-čyrvona-bieły ściah i pakazać pašpart novaj Biełarusi z trybuny.
Pa jaho słovach, vystup Cichanoŭskaj byŭ nie tolki pra aktualnuju prablematyku, ale ŭ im akcentavałasia ŭvaha na fundamientalnym ubudavańni biełaruskaha kantekstu ŭ jeŭrapiejski.
«Eŭraparłamientary nie zabuduć, što takoje bieł-čyrvona-bieły ściah, chto taki Skaryna. Jany buduć pierakazvać toje, što ahučyła Cichanoŭskaja, u svaich parłamientach i frakcyjach, a kali stanuć ministrami, praciahnuć hetu palityku padtrymki demakratyčnaj Biełarusi», — miarkuje Viačorka.
«Čym bolš ludziej my zaradzim biełaruščynaj, kab im baleła za Biełaruś, tym bolš sajuźnikaŭ budzie ŭ doŭhaterminovaj pierśpiektyvie», — ličyć jon.
Viačorka miarkuje, što takoj uvahi da situacyi ŭ Biełarusi nie było z 2006 hoda, kali Alaksandr Milinkievič byŭ adzinym kandydatam ad apazicyi na prezidenctva. Zatym na 15 hadoŭ nadyšło zacišša i «navat zaihryvańnie z Łukašenkam».
«Ciapier Biełaruś znoŭ u centry ŭvahi, i my možam zbudavać tryvały fundamient adnosinaŭ ź Jeŭrasajuzam, jaki dapamoža pry luboj novaj situacyi mnohaha dabicca», — adznačaje Viačorka.
Pa jaho słovach, na adnoj z sustreč u Jeŭraparłamiencie prahučała prapanova rychtavać pahadnieńnie ab asacyjacyi ź Jeŭrasajuzam.
Viačorka nahadvaje, što takoje pahadnieńnie ŭ 2013 hodzie nie staŭ padpisvać tahačasny prezident Ukrainy Viktar Janukovič i heta pryviało da Majdanu.
«Ale mienavita toje pahadnieńnie adčyniła dźviery dla Ukrainy ŭ Jeŭrasajuz. Nam nie treba čakać, pakul abryniecca dyktatura, a padrychtavać usio zahadzia, kab nie marnavać času na debaty», — adznačaje Viačorka.
Jon spadziajecca, što ŭ śniežni na pasiadžeńni kansultatyŭnaj hrupy «ES — Biełaruś» moža adbycca farmalizacyja adnosinaŭ ź Jeŭrasajuzam.
Daradca Cichanoŭskaj dadaje, što napiaredadni siesii Jeŭraparłamienta była razhornutaja vystava z partretami sotniaŭ palitviaźniaŭ.
Adbyłasia Kanfierencyja Kalinoŭskaha, dzie eŭraparłamientary ź lidarami demakratyčnaha ruchu i hramadzianskaj supolnaści abmierkavali važnyja temy biełaruskaha paradku dnia. U joj udzielničaŭ były palitviazień, pravaabaronca Leanid Sudalenka.
Na samoj siesii vystupiła Natalla Radzina, jakaja zvyčajna krytykuje Cichanoŭskuju. Ale ŭ jaje pramovie, jak zaŭvažaje Viačorka, razychodžańni ŭ pazicyi z demakratyčnaj lidarkaj nie byli nastolki istotnymi.
Franak Viačorka kaža, što «ŭsia sioletniaja vosień budzie pryśviečanaja viartańniu Biełarusi ŭ mižnarodny paradak dnia.
16 vieraśnia pradstaŭniki Kabinieta Cichanoŭskaj nakiroŭvajucca na Hienieralnuju Asambleju AAN. Na jaje pryjedzie i delehacyja aficyjnaha Minska. Heta adbudziecca druhi raz, nahadvaje Viačorka.
«Stanovicca normaj, što demakratyčnaja Biełaruś pradstaŭlenaja na Hienasamblei AAN. Tam adbuducca dziasiatki sustreč, i buduć mahčymaści vykazacca. Naša zadača, kab jak maha bolš aktaraŭ dałučalisia da hetaha ź biełaruskaha i mižnarodnaha bakoŭ», — adznačaje jon.
Viačorka kaža, što pradstaŭniki demakratyčnaj supolnaści zaprošanyja na Varšaŭskuju kanfierencyju pa biaśpiecy, na jakoj zapłanavany sustrečy na vysokim uzroŭni. Potym buduć parłamienckaja sustreča NATA i kanfierencyja ABSIE pa čałaviečym raźvićci. U śniežni maje pačacca stratehičny dyjałoh z ZŠA.
«Dabicca realnaha pośpiechu možna tady, kali demakratyčnyja siły, niezaležnyja arhanizacyi i miedyja buduć pasyłać adny mesedžy, što varta vyzvalić palitviaźniaŭ, demantavać dyktaturu, pakarać złačyncaŭ, vyvieści rasijskija vojski ź Biełarusi», — zaklikaje Viačorka.
Pavodle jaho, «takija paŭtareńni zdajucca nudnymi dla nas, ale jany nieabchodnyja, bo my kankurujem z sotniaj inšych prablem u śviecie. Tamu treba ciarpliva paŭtarać i dabivacca svajho».
«Naša Niva» — bastyjon biełaruščyny
PADTRYMAĆHladzicie taksama:
Rasijanie skardziacca, što ŭ ich niama lidara nakštałt Cichanoŭskaj. Biełarusy im adkazali, čamu tak
Cichanoŭskaja ŭznaharodziła staršyniu Jeŭraparłamienta
Cichanoŭskaja abmierkavała z premjer-ministram Bałharyi prajekt «pašparta novaj Biełarusi»
SK nazvaŭ imiony tych, chto skinuŭ vybuchoŭku na bazu AMAPa ŭ Minsku ŭ 2021 hodzie4
Kamientary