«Pałova aŭtobusa była ŭ šoku». Dajechać ź Minska ŭ Varšavu tańniej, čym z Hrodna. Jak takoje mahčyma?
Čytačka «Našaj Nivy», jakaja dniami jechała z Hrodna ŭ Varšavu raskazała, jak pasažyry aŭtobusa, jakija jechali ŭ polskuju stalicu ź Minska, zapłacili za kvitki mienš, čym tyja, chto jechaŭ u Varšavu z Hrodna.
Ahnieška (imia źmieniena ŭ metach biaśpieki) raskazała, što padčas čakańnia ŭ čarzie na miažy, niechta z pasažyraŭ pačaŭ aburana abmiarkoŭvać canu biletaŭ.
«My jechali vialikim aŭtobusam, jaki išoŭ pa maršrucie Minsk — Hrodna — Varšava praz Pryvałku. Častka pasažyraŭ była ź Minska, častka — z Hrodna. U čarzie niejak vyśvietliłasia, što pasažyry ź Minska nabyvali kvitki za 105 rubloŭ, a tyja, chto jechaŭ z Hrodna, — za 110», — kaža čytačka.
Pa słovach žančyny, mnohija, chto jechaŭ z Hrodna, byli aburanyja tym, što za prajezd na mienšuju adlehłaść jany zapłacili bolš, čym tyja, chto prajechaŭ na 300 kiłamietraŭ bolš.
«My padumali, što, moža, heta niejkaja pamyłka, pačali pytacca ŭ kiroŭcy, jak takoje mahčyma, ale toj skazaŭ, što pytańni koštu jon nie rehuluje».
Jak vyśvietliłasia, nijakaj pamyłki niama. Na sajcie atlasbus.by i ciapier možna zaŭvažyć, što bilety na aŭtobus ci maršrutku ŭ Varšavu ź Minska možna nabyć za 105 rubloŭ. Choć sustrakajucca i pa 120, i navat pa 140 rubloŭ.
A voś bilety z Hrodna da Varšavy ŭ toj ža čas kaštujuć 110 rubloŭ, i jość tolki adzin varyjant za 100.
Samaje cikavaje, što ŭ tym ža samym aŭtobusie, jaki jedzie ź Minska praz «Pryvałku» bilety Minsk — Varšava pradajuć pa 105 rubloŭ, a Hrodna — Varšava pa 110.
Numar aŭtobusa i maršrut całkam supadajuć, ale košt rozny, pryčym bolš praciahłaja pa časie i kiłamietražy pajezdka kaštuje na 5 rubloŭ tańniej.
Kab udakładnić, jak takoje mahčyma, źviarnulisia pa kamientaryj da atlasbus. Tyja adkazali: «Košt kvitkoŭ vyznačajecca pieravozčykam».
Čytajcie taksama:
U Hrodnie pieradumali rabić «rasijski» kvartał. U honar kaho vulicy prapanujuć nazvać ciapier?
Ajcišnik z EPAM, jaki žyvie ŭ ZŠA, naviedaŭ Biełaruś. Ciapier jamu pahražaje da siami hadoŭ kałonii3
Kamientary