Adździeł rasśledavańniaŭ litoŭskaha LRT apublikavaŭ artykuł z krytykaj Paŭła Daniejki
Daniejka prabačyŭsia za svaje słovy z 2019-ha, a voś abvinavačvańni ŭ suviaziach z łukašenkaŭcami i rasijskimi strukturami rašuča abviarhaje. U podbiŭcy artykuła moža być pytańnie, chto maje adkryć fakultet ekanomiki EHU.
14 vieraśnia adździeł raśledavańniaŭ litoŭskaha LRT apublikavaŭ materyjał, pryśviečany biełaruskamu biznesoŭcu i dziejaču hramadzianskaj supolnaści Paŭłu Daniejku. Žurnalisty źviartajuć uvahu na toje, što ŭ chutkim časie pad dacham Jeŭrapiejskaha humanitarnaha ŭniviersiteta maje adkrycca fakultet biznesu i ekanomiki na bazie daśledčaha centra Beroc, dyrektaram u jakim Daniejka.
Na stvareńnie hetaj struktury płanujecca vydatkavać 1 miljon jeŭra finansavańnia ad ES. Adnak, zajaŭlajuć žurnalisty, Daniejka nie tolki nieadnarazova niehatyŭna vykazvaŭsia ŭ bok Litvy, ale i padtrymlivaŭ režym Łukašenki.
Da 2020 hoda jon uvachodziŭ u kansultatyŭnuju hrupu pry Radzie biaśpieki Łukašenki, a taksama zajmaŭ pasadu člena rady dyrektaraŭ Biełhazprambanka i realizoŭvaŭ prajekty z najbujniejšymi bankami, što kantralujucca rasijskim režymam.
Aŭtary rasśledavańnia pryhadvajuć słovy Daniejki, jakija jon skazaŭ u listapadzie 2019 hoda na kruhłym stale z udziełam dypłamatyčnaha korpusa, aficyjnych pradstaŭnikoŭ ułady Biełarusi i šyrokaha koła kiraŭnikoŭ mižnarodnych prajektaŭ.
Tady Daniejka skazaŭ, što Litva pravaliła reformy, a kirujuć tam pravyja nacyjanalisty, jakija chočuć padniać sabie rejtynhi. Na dumku Daniejki, narmalnyja adnosiny pamiž Biełaruśsiu i ES nie raźvivajucca, bo Litva ŭsio błakuje.
Taksama Daniejka skazaŭ, što nazvu Litvie padaravała Kaciaryna II, a Vilniu — Stalin. Žurnalisty LRT śćviardžajuć, što Daniejka nie raz anałahična vykazvaŭsia jak u hramadskim asiarodździ, tak i ŭ pryvatnych razmovach, čamu jany majuć dokazy.
Akramia taho, žurnalisty pišuć pra toje, što Daniejka naležyć da koła ludziej, źviazanych z režymam Alaksandra Łukašenki. Jon nieadnarazova vystupaŭ ekśpiertam u biełaruskich miedyja, a taksama supracoŭničaŭ z rasijskimi kampanijami i bankami, abiraŭsia ŭ kirujučyja orhany. Da lutaha 2022-ha Daniejka zastavaŭsia členam rady dyrektaraŭ Biełhazprambanka. Aficyjna jon pakinuŭ bank tolki ŭ lipieni hetaha hoda.
Pa infarmacyi žurnalistaŭ LRT, pry padačy dakumientaŭ na dazvoł na žycharstva ŭ Litvie Daniejka nie paznačyŭ, što kaliści vykonvaŭ kiraŭničyja abaviazki ŭ Biełhazprambanku.
Pa infarmacyi krynic, na jakija spasyłajucca žurnalisty, Daniejka nie tolki supracoŭničaŭ z rasijskim biznesam. Ën padtrymlivaŭ i kantakty sa słužbami Alaksandra Łukašenki.
Sam Pavieł Daniejka adkazaŭ na abvinavačvańni praz Adździeł kamunikacyi BEROC.
Što datyčyć vykazvańniaŭ na adras Litvy, to Daniejka paprasiŭ prabačeńnia va ŭsich, kaho začapili jaho słovy.
Jon adznačyŭ, što havaryŭ heta na zakrytaj sustrečy i krytykavaŭ nie Litvu, a litoŭskich palitykaŭ.
«Hetaja słovy prahučali na niefarmalnaj hutarki z kalehami ź Litvy, kali my abmiarkoŭvali šlach Biełarusi da supracoŭnictva ź ES u ramkach prahramy «Uschodniaje partniorstva» i pieraškody, jakija zaminajuć hetamu supracoŭnictvu. Heta była vielmi vostraja i ščyraja dyskusija zakrytaha charaktaru, frahmient jakoj zapisaŭ žurnalist, — havorycca ŭ adkazie spadara Daniejki adździełu rasśledavańniaŭ LRT. — Chaču paprasić prabačeńnia pierad usimi, kaho pakryŭdzili maje słovy. Vybačajcie, choć jany byli tak sfarmulavanyja i pracytavanyja čatyry hady tamu. Ja razumieju, što hetyja słovy mohuć abrazić pačućci litoŭcaŭ. Ja zhodny, što navat u zapale samych haračych debataŭ takija słovy niedapuščalnyja».
Što datyčyć taho, što Daniejka nie paznačyŭ pasadu ŭ Biełhazprombanku, to jon tłumačyć, što nie paličyŭ bank stratehičnym abjektam, a ŭ kiraŭnictvie banka zastavaŭsia ŭ jakaści niezaležnaha člena dziela taho, kab zachavać asnovy jaho dziejnaści. Svaje suviazi z pradstaŭnikami orhanaŭ biaśpieki Biełarusi jon abhruntavaŭ supracoŭnictvam u miežach prajekta «Kastryčnicki ekanamičny forum», u jakim udzielničali jak pradstaŭniki biznesu, tak i ŭłady.
Žurnalisty źviarnulisia z pytańniami da dziaržaŭnych orhanaŭ Litvy, u pryvatnaści Ministerstva zamiežnych spraŭ, jakoje padtrymała chadajnictva Daniejki pra dazvoł na žycharstva. Tam adkazali, što Daniejka ŭžo vybačyŭsia za svaje słovy i zrazumieŭ svaju pamyłku, tamu pretenzij z boku ministerstva da jaho niama.
Pavieł Daniejka ŭ 1996 hodzie byŭ abrany deputatam Viarchoŭnaha Savieta XIII sklikańnia ad Abjadnanaj hramadzianskaj partyi i ŭvachodziŭ u hrupu tych, chto pastavili podpisy pad patrabavańniem impičmientu Alaksandra Łukašenki. Paźniej jon zastavaŭsia aktyŭnym u hramadzianskaj supolnaści Biełarusi i paralelna zajmaŭsia biznesam.
Situacyju žurnalistam prakamientavaŭ Andrus Kubilus, były premjer Litvy, a ciapier deputat Jeŭraparłamienta i siabar kiraŭničaj rady Jeŭrapiejskaha humanitarnaha ŭniviersiteta.
Kubilus skazaŭ, što jon nie zhodny z pracytavanymi vyšej słovami Daniejki, ale moža zrazumieć jaho vykazvańnie z čałaviečaha punktu hledžańnia.
«Možna pa-roznamu aceńvać vykazvańnie čałavieka. Ale treba pamiatać, što jon skazaŭ heta padčas błakavańnia Litvoj damovy ab partniorstvie pamiž Jeŭrapiejskim sajuzam i Biełaruśsiu z-za Astravieckaj AES, — nahadvaje eks-premjer. — Ja i sam krytyčna staviŭsia da takoha błakavańnia, i jano nie ŭsim padabałasia jak siarod navukovaj, tak i siarod hramadzianskaj supolnaści Biełarusi», — nahadaŭ jon.
Razmovy pra mahčymaje adkryćcio pad dacham Jeŭrapiejskaha humanitarnaha ŭniviersiteta dvuch novych fakultetaŭ — biznesu i ekanomiki, a taksama infarmacyjnych technałohij — iduć ad peŭnaha času. Ich adkryćcio mahło b nadać novy impuls raźvićciu ŭniviersiteta. Paśla publikacyi LRT uźnikaje pytańnie, chto budzie hetym zajmacca.
Kamientary