«Biełaruski miljanier, jaki śpiavaje», daść kancerty ŭ Minsku i Barysavie
U chutkim časie ŭ Minsku adbudziecca kancert biełaruskaha śpievaka, klipy jakoha nabrali zvyš 100 miljonaŭ prahladaŭ na roznych płatformach. Jaho zvać Vasil Suško, i jon prezientuje siabie jak «brutalny, charyzmatyčny mužčyna nie tolki ź miljonnym rachunkam u banku, ale i z ramantyčnaj dušoj». «Naša Niva» pasprabavała razabracca, ci sapraŭdy jon taki papularny.
Historyja hučyć jak kazka. Chłopčyk naradziŭsia ŭ vioscy kala Žodzina, u siem hadoŭ upieršyniu ŭziaŭ u ruki hitaru i zrazumieŭ, što choča być artystam. Kali vučyŭsia ŭ starejšych kłasach, navat vystupaŭ u składzie amatarskaha kalektyvu — hraŭ chity Juryja Antonava i hurtu «Ziamlanie».
A potym pačałosia darosłaje žyćcio — armija, paśla jaje treba było pracavać i zarablać… I biznes. U 2016 hodzie partał «Ježiednievnik» uklučyŭ Vasila Suško ŭ śpis najbolš paśpiachovych i ŭpłyvovych biźniesmienaŭ Biełarusi.
Pra svaju maru biznesoviec zhadaŭ, kali jaho małodšaja dačka pačała zajmacca vakałam. Tady jaje nastaŭnica skazała, što ŭ baćki dobra vychodzić śpiavać. Hetaja dumka nie davała pakoju budučamu artystu.
— Pamiataju, ja pracavaŭ u ofisie — i raptam u hałavie zajhrała kampazicyja, — raskazvaŭ Vasil na pres-kanfierencyi. — Adrazu ŭjaviŭ, jak jana zahučyć sa sceny. Ja zapisaŭ muzyku, słovy… Z taho momantu ŭsio i pačałosia. Ciapier u maim repiertuary kala sta piacidziesiaci kampazicyj — dobrych, z hłybokim sensam. Narešcie zajmajusia lubimaj spravaj!
Paśla hetaha Vasil (pa jaho viersii) pakinuŭ svoj pakiet akcyj kampanii «Biełaviežskija syry» (34%) mamie svaich dziaciej, a sam pačaŭ zajmacca tvorčaściu. Pa viersii byłoj žonki — Śviatłany Suško — jana sama vykupiła ŭ muža pakiet akcyj i samastojna pieratvaryła prablemnaje pradpryjemstva ŭ prybytkovaje.
Šukajem miljony (prahladaŭ)
Najbolš papularny klip Vasila Suško na YouTube maje miljon prahladaŭ i 3,7 tysiač łajkaŭ. Heta klip (śpiavak navat nazyvaje jaho minijaciurnym miuzikłam) na pieśniu «Kachanaja», zapisany razam ź biełaruskim dziaržaŭnym ansamblam «Pieśniary».
«Naša Niva» pračytała ŭsie 977 kamientaryjaŭ pad rolikam, i zaŭvažyła niekalki cikavostak. Pa-pieršaje, kamientaryi davoli typovyja i zdajecca napisany jak pad kapirku.
Kamientatary zachaplajucca jakaściu klipa (navat dobrym mantažom) i hłybokim sensam kampazicyi, dziakujuć za vydatny padarunak da śviata (premjera pieśni adbyłasia napiaredadni 8 Sakavika), adznačajuć, što «heta pieśnia nie toje, što ciapier moładź piaje» — i heta mienavita taja ideja, jakuju sam aŭtar ahučvaje na svaich pres-kanfierencyjach.
Časam adzin i toj ža kamientaryj apublikavany dvojčy zapar z roznych ulikovych zapisaŭ: «Dziakuj vielizarny za vydatnuju pieśniu, ź vielizarnym zadavalnieńniem prasłuchoŭvaju piaty raz!». Niekalki razoŭ ci to Suško, ci to «Pieśniaroŭ» paraŭnoŭvajuć z vytrymanym vinom, jakoje z hadami robicca tolki lepšym.
Pa-druhoje, zdajecca, Vasil Suško ŭvohule nie maje chejtaraŭ, bo siarod 977 kamientaryjaŭ nam udałosia adšukać tolki dva ŭmoŭna niehatyŭnyja. A najbolš krytyčnym možna ličyć vykazvańnie «Pieśnia nie vaŭ».
Darečy, ekśpierty, jakija zajmajucca prasoŭvańniem kantentu ŭ internecie, ličać prykmietami nakrutki adnatypnyja chvalebnyja kamientaryi, a taksama adsutnaść chejtu.
Dla paraŭnańnia voźmiem YouTube-kanał Alony Łanskoj, imia jakoj usio ž zbolšaha viadoma biełaruskaj publicy. U jaje kanała 29,8 tysiač padpisčykaŭ (suprać 7,27 tysiač padpisčykaŭ u Vasila Suško). Najbolš papularnaje videa śpiavački (biez uliku aficyjnaha videa z «Jeŭrabačańnia-2013») — heta klip «Nikoli», jaki maje 588 tysiač prahladaŭ i 197 kamientaryjaŭ. I navat tam, siarod łaviny chvalebnych kamientaryjaŭ pieryjadyčna sustrakajecca niešta ščyraje nakštałt: «Alona, idzi ty na budoŭlu pracavać».
Možna padumać, što miljon prahladaŭ klipa Suško razam ź biełaruskimi «Pieśniarami» — vynik taho, što ludzi stałaha ŭzrostu šukajuć VIA, jaki byŭ papularnym u časy ich maładości. Ale nie, kanał «Biełaruskija pieśniary» na YouTube nielha nazvać vielmi papularnym: tam kala 2 tysiač padpisčykaŭ, a maksimalnaja kolkaść prahladaŭ klipa — 66 tysiač.
U supołcy «Vasil Suško — aŭtar i vykanaŭca» va Ukantakcie ŭsiaho 1639 padpisčykaŭ. Kolkaść prahladaŭ apublikavanych tam videa časam ździŭlaje: naprykład, videa, apublikavany za apošnija paŭhady nabirali ad 1 da 299 prahladaŭ. U 2022 hodzie na praciahu piaci miesiacaŭ čamuści byŭ rezki vybuch cikavaści da klipaŭ Suško — jaho videa nabirali da 115 tysiač prahladaŭ.
Kali havaryć pra 2019 hod — pačatak tvorčaj dziejnaści Vasila — dyk tam taksama jość dziŭnyja situacyi: premjery klipaŭ «Dziaŭčyny» i «Vodar kvietak», apublikavanyja prykładna ŭ adzin i toj ža pieryjad, atrymali 40 (štuk, a nie tysiač) i 353 tysiačy prahladaŭ adpaviedna. I navat kali kolkaść prahladaŭ pieravalvaje za try sotni tysiač, pad klipam časam byvaje tolki adzin kamientaryj.
U instahramie Suško 196 tysiač padpisčykaŭ. Ale, niahledziačy na heta, asablivaj aktyŭnaści na staronkie śpievaka niabačna. Apošnija 25 ryłz nabrali ad 25 da 88 łajkaŭ. Kamientaroŭ amal niama.
U Adnakłaśnikach u supołcy Vasila Suško amal 24 tysiačy ŭdzielnikaŭ, a klipy nabirajuć ad 561 da siami ź lišnim miljonaŭ prahladaŭ. Abjektyŭna kažučy, heta najbolš paśpiachovaja sacyjalnaja sietka dla śpievaka. My naličyli 18 videa, jakija nabrali bolš za miljon prahladaŭ. Rekord u klipa na pieśniu «U svaim Suśviecie»: 7 387 481 prahladaŭ, 7619 «kłasaŭ» i 84 kamientaryja (bolšaść ź ich — prosta smajły).
U 2019 hodzie, kali Vasil Suško tolki pačynaŭ, jon arhanizavaŭ dva vialikija solnyja kancerty — u KZ «Minsk» i ŭ Pałacy Respubliki. Tady jon ščodra razdavaŭ bilety ŭsim achvotnym — ad žurnalistaŭ da vieteranaŭ.
U pres-relizach taho času paznačałasia, što jon — «brutalny, charyzmatyčny mužčyna nie tolki ź miljonnym rachunkam u banku, ale i z ramantyčnaj dušoj i vialikim patencyjałam talentu — i… sa svabodnym miescam u sercy!».
Zdajecca, ciapier, niahledziačy na «zvyš 100 miljonaŭ prahladaŭ na roznych płatformach», situacyja nie vielmi viasiołaja. Kvitki na kancert «Nierazhadanaja tajamnica Kachańnia…», jaki adbudziecca ŭ Moładzievym teatry estrady 17 vieraśnia, na sajcie bezkassira pradajucca niejak dziŭna: 7 vieraśnia na servisie adlustroŭvałasia, što ŭsie volnyja miescy pa cikavym supadzieńni apynulisia stroha ŭ dvuch šerahach — u 12 i 15. Pakul pradać 256 kvitkoŭ nie ŭdałosia. Pry hetym, cana ich usiaho 20—25 rubloŭ.
A 30 vieraśnia Vasil Suško płanuje vystupić u Barysavie, u Pałacy kultury imia Maksima Horkaha. Tam bilety navat krychu tańniejšyja — pa 15-20 rubloŭ.
Kamientary